ساعادات قوجاحمەت ۇلى قازاقستان رەسپۋبليكاسىنىڭ تۇڭعىش قورعانىس ءمينيسترى رەتىندە دە ەگەمەن ەلدىڭ ايبىندى اسكەرىن قۇرۋعا ۇلكەن ۇلەس قوستى. تاۋەلسىز مەملەكەتتىڭ تۇڭعىش حالىق قاھارمانى رەتىندە دە ەسىمى تاريحقا التىن ارىپپەن جازىلدى. اتى اڭىزعا اينالعان تۇلعا ساعادات نۇرماعامبەتوۆتىڭ ءومىر جولى ونەگەگە تولى. وتان ءۇشىن وت كەشكەن ازامات بەيبىت زاماندا دا ۇلتتىڭ دامۋى جولىندا ەڭبەكتەندى. سوندىقتان ءوزى ومىردەن وتسە دە تۋعان حالقى باتىرىن ۇمىتپاي, جادىندا تۇتىپ كەلەدى. قورداي اۋدانى, گۆاردەيسك قالاشىعىنىڭ ورتالىعىنان ساياباق جانە باتىرعا ارنالعان بيۋست اشىلدى. ايتۋلى شاراعا قازاقستان رەسپۋبليكاسى قورعانىس ءمينيسترىنىڭ ءبىرىنشى ورىنباسارى, قازاقستان رەسپۋبليكاسى قارۋلى كۇشتەرى باس شتابىنىڭ باستىعى, گەنەرال-لەيتەنانت مۇرات مايكەەۆ, حالىق قاھارمانى, پارلامەنت ءماجىلىسىنىڭ دەپۋتاتى, گەنەرال-لەيتەنانت باقىتجان ەرتاەۆ, تۇڭعىش قورعانىس ءمينيسترىنىڭ ورىنباسارى بولعان گەنەرال-لەيتەنانت فەدور ششەرباكوۆ جانە وزگە دە گەنەرالدار مەن وفيتسەرلەر قاتىستى. سونداي-اق اۋدان اكىمى بولاتبەك بايتولە, قازاقستان رەسپۋبليكاسى قارۋلى كۇشتەرىنىڭ ارداگەرلەرى مەن اۋىل اقساقالدارى دا بولىپ, ارداگەر ازاماتتى ءبىر مينۋت ۇنسىزدىكپەن ەسكە الدى. بۇدان كەيىن سالتاناتقا ارنايى قاتىسقان گەنەرال-لەيتەنانت مۇرات مايكەەۆ ءسوز الىپ, ارداقتى ازامات تۋرالى ويىن ءبىلدىردى. «ساعادات نۇرماعامبەتوۆ ءوزىن تۇتاستاي وتانعا قىزمەت ەتۋگە ارناعان ناعىز پاتريوت ادام ەدى. قازاقستان رەسپۋبليكاسى قارۋلى كۇشتەرى جوعارعى باس قولباسشىسىنىڭ جەتەكشىلىك ەتۋىمەن ول زاماناۋي قارۋلى كۇشتەردىڭ ىرگەسىن قالادى. قازاقستاننىڭ تۇڭعىش قورعانىس ءمينيسترى, ۇلى وتان سوعىسىنىڭ ارداگەرى, كەڭەس وداعىنىڭ باتىرى, تۇڭعىش حالىق قاھارمانى, ارميا گەنەرالى ساعادات قوجاحمەت ۇلى ەل ءۇشىن كۇرمەۋى قيىن كەزەڭدە اسكەردى باسقارا وتىرىپ, ونىڭ قالىپتاسۋى مەن دامۋىنا باعا جەتپەس ۇلەس قوستى. ونىڭ ەسىمى تاۋەلسىز قازاقستاننىڭ تاريحىندا التىن ارىپتەرمەن جازىلىپ, حالقىنىڭ جادىندا ماڭگىگە ساقتالماق», – دەدى م.مايكەەۆ. سونداي-اق, گەنەرال-لەيتەنانت فەدور ششەرباكوۆ تا ءوز سوزىندە ساعادات نۇرماعامبەتوۆتىڭ قازاقستان اسكەرىن قۇرۋداعى ەرەكشە ءرولىن, ادالدىعى مەن ەڭبەكقورلىعىن اڭگىمەلەدى. «مەن ەكى اكادەميانى ءتامامدادىم, ال ساعادات نۇرماعامبەتوۆتەن العان ءتالىمىمدى مەن ءۇشىنشى ۇلى اكادەميا دەپ ەسەپتەيمىن», دەپ جۇرەكجاردى لەبىزىن جەتكىزدى. سونىمەن قاتار, ساعادات نۇرماعامبەتوۆتىڭ قۇرمەتىنە ارنالعان سالتاناتتى جيىنعا قازاقستان رەسپۋبليكاسىنىڭ قىرعىزستانداعى توتەنشە جانە وكىلەتتى ەلشىسى ايىمدوس بوزجىگىتوۆ جانە ارميا گەنەرالىنىڭ ۇزەڭگىلەس دوسى, قىرعىزستان رەسپۋبليكاسى قارۋلى كۇشتەرىنىڭ تۇڭعىش ءمينيسترى, گەنەرال-پولكوۆنيك مىرزاكان سۋبانوۆ قاتىستى. ارىپتەستەرى اتىنان ءسوز العان قۇرمەتتى قوناق ءوزىنىڭ اسكەري ۇستازى جايلى اڭگىمە قوزعاپ, ساعادات قوجاحمەت ۇلىنىڭ قىرعىز اسكەرلەرىنىڭ دە تابانىنان تىك تۇرۋىنا دا ءوز سەپتىگىن تيگىزگەنىن, ونىڭ ءار باسقان قادامى جاستارعا ونەگە بولىپ وتىرعانىن ايتتى. كەلەسى كەزەكتە ساعادات نۇرماعامبەتوۆتىڭ قىزى ايسۇلۋ نۇرماعامبەتوۆا ءسان-سالتاناتى جاراسقان ساياباق اشىپ, ەسكەرتكىش ورناتقانى ءۇشىن شارانىڭ ۇيىمداستىرۋشىلارى مەن 40-شى «وتار» اسكەري بازاسىنىڭ باسشىلىعىنا العىسىن ايتسا, سالتاناتتى جيىندى قورىتىندىلاعان حالىق قاھارمانى باقىتجان ەرتاەۆ اتى اڭىزعا اينالعان ابىز تۇلعانى ەسكە الىپ, ەستەلىگىمەن ءبولىستى. «ساعادات نۇرماعامبەتوۆتىڭ ەسىمى ماڭگىگە ءبىزدىڭ جۇرەگىمىزدە ساقتالادى. ول مۇنداعى تۇرعان بارلىعىمىزدىڭ اعامىز, اكەمىز, اقىلشىمىز. ونىڭ ءار ايتقان ءسوزى وسيەت ەدى. ءبىز ارداگەرلەر ونىڭ رۋحىنا باس يەمىز», – دەدى حالىق قالاۋلىسى ءوز سوزىندە. حاميت ەسامان, «ەگەمەن قازاقستان». جامبىل وبلىسى
قوردايدا ساعادات نۇرماعامبەتوۆكە ارنالعان ەسكەرتكىش اشىلدى
460 رەت
كورسەتىلدى
جيىرمادان جاڭا اسقان شاعىندا ۇلى وتان سوعىسىندا ەرلىك كورسەتىپ, كەڭەس وداعىنىڭ باتىرى اتاعىن العان ساعادات نۇرماعامبەتوۆ ەسىمى ەرلىك شەجىرەسىندەي بولىپ ەل ەسىندە ساقتالدى.