قازاقستان اۋسىلدان تازا ەل اتاندى

ق.ايتۋعانوۆتىڭ حابارلاۋىنشا, اتالعان مارتەبەنى بەرۋگە حالىقارالىق ەپيزووتيالىق بيۋرونىڭ (حەب) باس اسسامبلەياسىنىڭ وتىرىسىنا قاتىسقان 180 ەلدەن كەلگەن حالىقارالىق ەپيزووتيالىق بيۋرونىڭ دەلەگاتتارى ءبىراۋىزدان داۋىس بەرگەن. وسىنداي ناتيجەگە اۋسىلدىڭ الدىن الۋعا باعىتتالعان ماقساتتى جۇمىستار, حالىقارالىق تالاپتارعا سايكەس اۋسىلمەن كۇرەس ستراتەگياسىن قاتاڭ قاداعالاۋدىڭ ارقاسىندا قول جەتكىزىلگەن.  بۇرىنعى كەڭەستىك كەڭىستىكتە بەلارۋس پەن ۋكراينا اۋەل باستان اۋسىلدان تازا ايماق رەتىندە تانىلعان ەكەن. ال 2016 جىلدان باستاپ رەسەيدىڭ جەكەلەگەن وڭىرلەرى عانا اۋسىلدان تازا مارتەبەسىنە يە. تمد-نىڭ وزگە ەلدەرىنە بۇنداي مارتەبە ازىرگە بەرىلمەگەن.  «ەلىمىزدە وسى مارتەبەنىڭ بولۋى مال جانە وسىمدىك شارۋاشىلىعى ونىمدەرىن دسۇ-عا مۇشە مەملەكەتتەرگە ەكسپورتتاۋعا مۇمكىندىك بەرەدى. بۇل ءوز كەزەگىندە اگروونەركاسىپ كەشەنىنىڭ ەكسپورتتىق الەۋەتىن ىسكە اسىرۋعا, سونىمەن قاتار وتاندىق كاسىپكەرلەردىڭ سىرتقى ساۋدا قىزمەتىن دامىتۋعا وڭ ىقپال ەتەدى», دەدى ق.ايتۋعانوۆ.  سونداي-اق, ول قىتايدىڭ ۆەتەريناريا بويىنشا قۇزىرەتتى ورگانى (گينكيك) وتكەن جىلدىڭ قىركۇيەگىندە حەب شەشىمى نەگىزىندە 9 وبلىستا اۋسىل بويىنشا شەكتەۋدى الىپ تاستاعانىن ەسكە سالدى. اشم ۆەتەرينارلىق باقىلاۋ كوميتەتى قىتايلىق تاراپپەن جاڭا عانا الىنعان مارتەبە نەگىزىندە قالعان بەس وبلىستان شەكتەۋدى الىپ تاستاۋ بويىنشا جۇمىستى جالعاستىرادى. سونىمەن قاتار, پارسى شىعاناعى ەلدەرى, يران مەن يزرايل الىنعان مارتەبە نەگىزىندە قازاقستانمەن رەسپۋبليكانىڭ بارلىق اۋماعىنان مال شارۋاشىلىعى ونىمدەرىن ەكسپورتتاۋعا رۇقساتتى ماقۇلداۋعا دايىن ەكەن.  ءباسپاسوز ءماسليحاتىنا سونداي-اق, ۆەتەرينارلىق باقىلاۋ جانە قاداعالاۋ كوميتەتى توراعاسىنىڭ ورىنباسارى تۇرسىن قابدىلدانوۆ, «مەركە ەت» جشس ۆيتسە-پرەزيدەنتى بەكسۇلتان ەلۋباەۆ, «قازاقتىڭ اقباس تۇقىمىنىڭ رەسپۋبليكالىق پالاتاسىنىڭ» باس عىلىمي قىزمەتكەرى انۋاربەك سەيىتمۇراتوۆ قاتىسىپ, ەلىمىزدىڭ اۋسىلدان تازا ايماق مارتەبەسىن الۋى ەت ەكسپورتىنا مۇمكىندىك اشاتىنىن ايتتى. ماسەلەن, جامبىل وبلىسىنىڭ «مەركە ەت» جشس ۆيتسە-پرەزيدەنتى ب.ەلۋباەۆ قازاقستاندى اۋسىلدان تازا ايماق رەتىندە تانۋ ەت وڭدەۋ زاۋىتتارىنىڭ ءوندىرىس كولەمىن ۇلعايتۋعا مۇمكىندىك بەرەتىنىن, سايكەسىنشە قازاقتىڭ ەتتى اقباس ءىرى قارا مال تۇقىمىنىڭ سانى ارتاتىنىن اتاپ ءوتتى. ونىڭ ايتۋىنشا, ەلىمىزدىڭ جاڭا مارتەبەگە يە بولۋ ءوندىرىستى ۇلعايتادى. ماسەلەن, كومبينات كۇن سايىن 10 مىڭ قۇتىعا جۋىق كونسەرۆىلەنگەن ەت ونىمدەرى مەن 300-400 كگ-عا دەيىن «حالال» ماركاسى بار شۇجىق ونىمدەرىن شىعارۋعا ءازىر. قوسىمشا 70-تەن استام جۇمىس ورنى اشىلاتىن بولادى. كومبينات اۋسىلدان تازا ايماق مارتەبەسىنىڭ ارقاسىندا مال بورداقىلاۋ الاڭىنداعى ءىرى قارا مال باسىن 3 مىڭ باسقا دەيىن ۇيعايتا الادى.  «بىزگە, اۋىل شارۋاشىلىعى تاۋارىن وندىرۋشىلەرگە, اۋسىلدان تازا ايماق مارتەبەسىنە يە بولۋ مال شارۋاشىلىعى ونىمدەرىنىڭ ەكسپورتتىق الەۋەتىن كەڭىنەن پايدالانۋعا مۇمىندىك بەرەدى», دەدى ب.ەلۋباەۆ.  ءوز كەزەگىندە, «مال شارۋاشىلىعى جانە ۆەتەريناريا عىلىمي-يننوۆاتسيالىق ورتالىعىنىڭ» باس عىلىمي قىزمەتكەرى انۋاربەك سەيىتمۇراتوۆ قابىلدانىپ جاتقان اوك مەملەكەتتىك قولداۋ شارالارىنىڭ ارقاسىندا سوڭعى 5 جىلدا قازاقتىڭ اقباس تۇقىمى 230 مىڭ مال باسىنا دەيىن ارتقانىن حابارلادى. «قازاقستاندا وسىرىلەتىن 10 ەتتى تۇقىمىنىڭ ىشىندە قازاقتىڭ اقباس تۇقىمى ەڭ ءىرى بولىپ تابىلادى. ەندىگى, اۋسىلدان تازا ايماق مارتەبەسىنە يە بولعاننان كەيىن مال وسىرۋشىلەر ءۇشىن ەتتىڭ ەكسپورتتىق الەۋەتىن دامىتۋعا ەلەۋلى ۇلەس قوسۋعا جانە وزدەرىنىڭ قاجىرلى ەڭبەكتەرىنىڭ جەمىسىن كورۋگە مۇمكىندىك پايدا بولادى», دەدى ءا.سەيىتمۇراتوۆ.  وسىلايشا, وتاندىق تاۋار وندىرۋشىلەر ءۇشىن جاڭا مۇمكىندىكتەر اشاتىن جاقسى جاڭالىق جاريا بولدى. ارينە, بۇل حالىقارالىق ەپيزووتيالىق بيۋرو شەشىمى قازاقستان رەسپۋبليكاسىنىڭ اوك دامىتۋدىڭ 2017-2021 جىلدارعا ارنالعان جاڭا مەملەكەتتىك باعدارلاماسى اياسىندا ەلدىڭ ۆەتەرينارلىق قىزمەتىنىڭ جۇيەلى وزگەرىستەرىنىڭ ناتيجەسى.  دينارا بىتىكوۆا,  «ەگەمەن قازاقستان»