«اتامەكەن» ۇكپ القاسىنىڭ توراعاسى سولتۇستىك قازاقستاندا بولدى

ول قىزىلجار اۋدانىندا ورنالاسقان «رادۋگا» جشس-ىندە باسەكەگە قابىلەتتى ونىمدەر شىعارۋ بارىسىمەن تانىستى. مۇندا پلاستماسسا ونىمدەرىنىڭ 200-گە جۋىق ءتۇرى جاسالادى.  كومپانيا ديرەكتورى دميتري شاراپاەۆتىڭ ايتۋىنشا, تسەحتار ەۋروپانىڭ وزىق تەحنولوگيالارىمەن جاراقتالعان. جەڭىلدىكتى سۋبسيديالىق قاراجاتتىڭ ۇشتەن ءبىرى جىلدام دايىندالاتىن كەسپە وندىرەتىن زاۋىت تۇرعىزۋعا جۇمسالعان. سونىڭ ارقاسىندا قازىر ايىنا 140 ميلليون تەڭگەنىڭ كەسپە تۇرلەرى وندىرىلەدى. ونىمدەر ىشكى نارىقپەن قاتار, رەسەيدىڭ ومبى, ەكاتەرينبۋرگ, چەليابى, ءنوۆوسىبىر ايماقتارىنا دا جونەلتىلەدى.  ايماقتىق وتىرىسقا تيمۋر ق ۇلىباەۆ پەن وبلىس اكىمى قۇمار اقساقالوۆ قاتىسىپ, شاعىن جانە ورتا بيزنەس سالاسىن دامىتۋدىڭ وزەكتى ماسەلەلەرى تالقىعا سالىندى. «اتامەكەن» ۇكپ القاسىنىڭ توراعاسى ءوز سوزىندە بۇگىنگى كۇنى كاسىپكەرلىكتى جاپپاي ورىستەتۋگە مەملەكەت تاراپىنان جان-جاقتى قامقورلىق جاسالىپ وتىرعانىن, ۇلتتىق پالاتا قۇرىلعانننان بەرگى ءۇش جىل ىشىندە اۋقىمدى جۇمىستار اتقارىلعانىن اتاپ كورسەتتى. بيزنەس وكىلدەرى ۇكىمەتتىك ورگاندارمەن ىسكەرلىك قارىم-قاتىناستار ورناتىلىپ, ءوز قۇقىقتارى مەن مىندەتتەرى شەڭبەرىندە ناقتى شارالار اتقارىپ كەلەدى. «دامۋدىڭ ايماقتىق كارتاسى» شەڭبەرىندە كاسىپكەرلەردىڭ الەۋەتىن كوتەرۋ, اۋىلداردا ينفراقۇرىلىمدار قۇرۋ, وزىق جوبالاردى ىسكە اسىرۋ, بىلىكتى كادرلار دايارلاۋ باعىتتارى بويىنشا جاقسى تاجىريبەلەر قالىپتاسقان.  جيىندا وبلىستىق كاسىپكەرلەر پالاتاسىنىڭ ديرەكتورى تۇرار ىسقاقوۆتىڭ ەسەبى تىڭدالدى. بىلتىر 3,5 مىڭعا جۋىق كاسىپكەر قايرىلىپ, 264 ماسەلە وڭ شەشىم تاپقان. ولاردىڭ پايداسىنا 364 ميلليون تەڭگە وندىرىلگەن.  قۇمار ىرگەباي ۇلى وڭىردە 28 مىڭداي شاعىن جانە ورتا بيزنەس سۋبەكتىسى قۇرىلعانىن, ولاردا 100 مىڭنان استام ادام جۇمىس ىستەيتىنىن جەتكىزدى. سوڭعى بەس جىلدا ءونىم ءوندىرۋ كولەمى 269 ملرد تەڭگەدەن 385 ملرد تەڭگەگە دەيىن, ال سالىق مولشەرى 29 ملرد تەڭگەدەن 50 ملرد تەڭگەگە ۇلعايعان. الايدا, جالپى ءونىم شىعارۋدا ۇلەسىنىڭ تومەندەگەنى بايقالادى. مونيتورينگتىك تالداۋ بويىنشا وڭىرلىك كاسىپكەرلەر پالاتاسى رەسپۋبليكادا ەڭ سوڭعى ورىندا كەلەدى. بۇل ورايدا جەرگىلىكتى اتقارۋشى ورگاندارى اتىنا ءبىراز سىندار ايتىلدى. جەر تەلىمدەرىن ءبولۋ, قارجىلىق رەسۋرستاردى شەشۋ, جىلۋ, جارىق جۇيەلەرىنە قوسۋ ماسەلەلەرىندە, قاجەتتى قۇجاتتاردى راسىمدەۋدە بيۋروكراتتىق كەدەرگىلەر, قاعازباستىلىقتار از كەزدەسپەيدى. اسىرەسە, بوس جەر تەلىمدەرى, ولاردى ساۋداعا قويۋ ماسەلەلەرىندە اقپاراتتىڭ اشىقتىعى, قولجەتىمدىلىگى قامتاماسىز ەتىلە بەرمەيدى.  القالى باسقوسۋدا اۋىل شارۋاشىلىعىن قولداۋ قورى جانە شاعىن قارجىلىق ۇيىمدار ارقىلى ەلدى مەكەندەردە كاسىپكەرلىك سالانىڭ وركەندەۋىنە ىقپال جاساۋ, وتاندىق تاۋار وندىرۋشىلەردى جان-جاقتى قولداۋ, ەكسپورتقا مامانداندىرىلعان ءوندىرىس ورىندارىن كوبەيتۋ ماسەلەلەرى تالقىلاندى.  ءومىر ەسقالي,  «ەگەمەن قازاقستان». سولتۇستىك قازاقستان وبلىسى.