قورعانىس جانە اسكەري قىزمەت ماسەلەلەرى بويىنشا تۇزەتۋلەر قابىلداندى

قۇجاتتاردىڭ ەرەجەلەرى قايتارىلاتىن ادامداردى انىقتايدى, ولاردىڭ رەتتەلگەن جانە قاۋىپسىز ءترانزيتىنىڭ تەتىكتەرىن رەتتەيدى, رەادميسسيا, ترانزيت نەمەسە اڭگىمەلەسۋدى جۇرگىزۋ تۋرالى سۇراۋ سالۋدى جۇزەگە اسىرۋ ءۇشىن قاجەتتى قۇجاتتار تىزبەسىن قامتيدى, ادامداردى بىرگە ءجۇرۋ ارقىلى بەرۋدىڭ شارتتارى مەن ءتارتىبىن ايقىندايدى.  قۇجاتتاردى راتيفيكاتسيالاۋ ەكى مەملەكەت اراسىنداعى زاڭسىز كوشى-قونعا قارسى ءىس-قيمىل سالاسىنداعى ىنتىماقتاستىقتى جەتىلدىرۋگە ىقپال ەتەدى.  قازاقستان مەن رەسەي اراسىنداعى تەمىرجول كولىگى كاسىپورىندارىنىڭ, مەكەمەلەرى مەن ۇيىمدارىنىڭ قىزمەتىن قۇقىقتىق رەتتەۋدىڭ ەرەكشەلىكتەرى تۋرالى ۇكىمەتارالىق كەلىسىمگە وزگەرىستەر ەنگىزۋ تۋرالى حاتتاما راتيفيكاتسيالاندى.  حاتتامانى راتيفيكاتسيالاۋ قازاقستاننىڭ شەكارالىق وبلىستارىنىڭ تۇرعىندارىنا رەسەي فەدەراتسياسىنىڭ اۋماعى بويىنشا شەكارالىق باقىلاۋدى جۇرگىزبەي ترانزيتپەن وتۋلەرىنە مۇمكىندىك بەرەدى. ەكى مەملەكەتتىڭ اتقارۋشى بيلىك ورگاندارى تەمىرجول جولاۋشىلار تاسىمالىن جۇزەگە اسىراتىن تاسىمالداۋشىلاردى ايقىنداۋ جونىندەگى قاعيدانى, شىعىستاردىڭ كولەمدەرىن ايقىنداۋ جانە ولاردى سۋبسيديالاۋ ادىستەمەسىن بەلگىلەيتىن بولادى.  زاڭناماعا وسىمدىكتەر مەن جانۋارلار دۇنيەسى ماسەلەلەرى بويىنشا تۇزەتۋلەر ءبىرىنشى وقىلىمدا قارالىپ, ماقۇلداندى.  وندا 14 زاڭنامالىق اكتىگە, ونىڭ ىشىندە 7 كودەكسكە وزگەرىستەر مەن تولىقتىرۋلار ەنگىزۋ كوزدەلىپ وتىر.  ەنگىزىلەتىن وزگەرىستەر مەن تولىقتىرۋلار: ۇكىمەتكە سيرەك كەزدەسەتىن جانە جويىلىپ كەتۋ قاۋپى تونگەن وسىمدىكتەردىڭ تۇرلەرىن الىپ قويۋ تۋرالى شەشىم قابىلداۋ جونىندەگى قۇزىرەت بەرۋدى; ورمان شارۋاشىلىعى سالاسىنداعى ۋاكىلەتتى ورگانعا باسقا ساناتتاعى جەردى ورمان قورى جەرىنە اۋىستىرۋ قاعيداسىن ازىرلەۋ جانە بەكىتۋ جونىندەگى قۇزىرەتتى بەرۋدى; ۇزاق مەرزىمدى جانە قىسقا مەرزىمدى ورمان پايدالانۋ تۇرلەرىن ناقتىلاۋدى; ۇزاق مەرزىمدى ورمان پايدالانۋ تەندەرلەرىنە قازاقستان ازاماتتارىنا جانە ءبىزدىڭ ەلىمىزدەگى شەتەلدىكتەر قاتىسپايتىن زاڭدى تۇلعالارعا عانا قۇقىق بەرۋدى; جانۋارلار تۇرلەرىن ينترودۋكتسيالاۋ كەزىندەگى ەكولوگيالىق تالاپتاردى ناقتىلاۋدى; جانۋارلاردى قازاقستانعا اكەلۋ جانە ەلدەن اكەتۋ ماسەلەلەرىن رەتتەۋدى; جەكەلەگەن زياندى جانە اسا قاۋىپتى زياندى ورگانيزمدەرمەن كۇرەسۋ ءۇشىن پەستيتسيدتەردى ۋاقىتشا تىركەۋدى; بالىق رەسۋرستارىن جانە باسقا دا سۋ جانۋارلارىن قورعاۋدى, ءوسىمىن مولايتۋدى جانە ورنىقتى پايدالانۋدى جۇزەگە اسىرۋ ءۇشىن يحتيولوگيالىق بايقاۋدى; جانۋارلار الەمىن قورعاۋدى, ءوسىمىن مولايتۋدى جانە ورنىقتى پايدالانۋدى جۇزەگە اسىرۋ ءۇشىن جەرگىلىكتى اتقارۋشى ورگانداردىڭ مامانداندىرىلعان ۇيىمداردى قۇرۋىن; ەرەكشە قورعالاتىن تابيعي اۋماقتاردىڭ ۋچاسكەلەرىندە بيوسفەرالىق رەزەرۆاتتاردى قۇرۋدى; ورمان شارۋاشىلىعى مەن تابيعات قورعاۋ مەكەمەلەرىنىڭ ماماندارىن قۇقىقتىق جانە الەۋمەتتىك قورعاۋدى جانە باسقالاردى كوزدەيدى.  وتىرىستا قورعانىس جانە اسكەري قىزمەت ماسەلەلەرى بويىنشا زاڭناماعا تۇزەتۋلەر جان-جاقتى تالقىلانىپ, قابىلداندى.  زاڭ جوباسىنىڭ ماقساتى قۇقىقتىق ولقىلىقتاردى, ءارتۇرلى زاڭنامالىق اكتىلەردىڭ قۇقىق نورمالارى اراسىنداعى قايشىلىقتاردى جويۋ ارقىلى اسكەري قىزمەت جانە قورعانىس سالاسىنداعى قولدانىستاعى زاڭنامانى جەتىلدىرۋ, سونداي-اق اسكەري قىزمەتشىلەردىڭ الەۋمەتتىك جانە قۇقىقتىق قورعالۋىن قامتاماسىز ەتۋ بولىپ تابىلادى.  اتاپ ايتقاندا, تۇزەتۋلەر قورعانىس مينيسترلىگىنىڭ, قارۋلى كۇشتەر باس شتابىنىڭ, اسكەري باسقارۋ ورگاندارىنىڭ فۋنكتسيالارىن ناقتىلايدى جانە تولىقتىرادى.  قورعانىستىق تاپسىرىستى ورىنداۋ كەزىندەگى وپەراتورلاردىڭ, ۋاكىلەتتى ۇيىمنىڭ جانە اتقارۋشىلاردىڭ فۋنكتسيالارى ايقىندالعان.  ماتەريالدىق-تەحنيكالىق قامتاماسىز ەتۋ اسكەرلەرىن جانە اۋماقتىق اسكەرلەردى قوسۋ ەسەبىنەن قارۋلى كۇشتەردىڭ جالپى قۇرامى كەڭەيتىلدى.  ازاماتتاردى كەلىسىمشارت بويىنشا اسكەري قىزمەتكە ىرىكتەۋگە ارنالعان سيپاتتامالار بەلگىلەنگەن. ماسەلەن, كەلىسىمشارت بويىنشا اسكەري قىزمەتكە زاڭدا بەلگىلەنگەن تارتىپپەن وتەلمەگەن نەمەسە الىپ تاستالماعان سوتتىلىعى بار ادام قابىلدانبايدى, ال تىزبەسىن ۋاكىلەتتى ورگاننىڭ باسشىسى بەكىتەتىن لاۋازىمدارعا ورنالاسۋ ءۇشىن ادامنىڭ پسيحوفيزيولوگيالىق نەمەسە پوليگرافولوگيالىق زەرتتەۋدەن ءوتۋ مىندەتى بەكىتىلدى.  سەناتورلار كونستيتۋتسيالىق كەڭەستىڭ مۇشەسى ۇبايدوللا مىرزاعالي ۇلى ستامقۇلوۆتىڭ وكىلەتتىگىن توقتاتۋ تۋرالى جانە پارلامەنت سەناتى توراعاسىنىڭ كونستيتۋتسيالىق كەڭەستىڭ مۇشەسى قىزمەتىنە راحمەت مۇقاشەۆتى تاعايىنداۋ تۋرالى ۇسىنۋىن دا قارادى.  وتىرىس بارىسىندا سەناتورلار ساۋالدارى جاريا ەتىلدى. دەپۋتات مۇرات باقتيار ۇلى «وسىمدىكتەر الەمىن قورعاۋ تۋرالى» زاڭ قابىلداۋدىڭ قاجەتتىگى جونىندەگى جانە ەمدىك شوپتەردى قورعاۋدىڭ كەشەندى شارالارى تۋرالى; ءالي بەكتاەۆ كەنتاۋ قالاسىنىڭ جانە قالا ماڭىنداعى ەلدى مەكەندەردىڭ ەكولوگيالىق احۋالى تۋرالى دەپۋتاتتىق ساۋال جولدادى.