ايتاقىر اسفالت بەتىنە قىزىل بوياۋمەن بويالعان, بالكىم, كوپ ۇستالعاندىقتان الدە بوياۋدىڭ اسەرىنەن جىپ-جىلماعاي, شەتتەرى مۇجىلگەن قىزىل اسىق شورشىپ ءتۇستى.
– الشى ءتۇستى! – دەپ ايقايلادى اسىقتى يىرگەن بالا, قۋانىشتان ءوڭى بال-بۇل جانىپ.
ۇلكەن قالادا, اسفالت بەتىندە اسىق ويناعان بالانى تۇڭعىش كورۋىم. الدە بۇرىن كوردىم بە ەكەن. ايتەۋىر, بايقاماپپىن. قىم-قۋىت قالا ءتىرشىلىگىندە, بار ادامنىڭ ساناسى كومپيۋتەرلەندىرىلگەن زاماندا اسىق ويناعان ءبىرتۇرلى توسىن كورىنەدى ەكەن.
– الشى تۇسكەن دەگەن نە؟ – دەپ سۇرادىم مەن. باياعىدا, بالا كەزدەگى كوكىرەكتە جاتتالىپ قالعان كونە سۋرەتتەردى تىرىلتكىم كەلىپ.
سونى دا بىلمەيسىز بە دەگەندەي, اسىق ويناعان بالا ۇزاق تاڭىرقاپ قارادى. سودان سوڭ اسىق جايىن اڭگىمەلەپ كەتتى.
– ءبىز «ءۇش تابان» ويناپ جاتىرمىز. ويىن شارتى بويىنشا بەرىكتىڭ اسىعىن مەن ساقاممەن ءدال تيگىزىپ ۇشىرسام, اسىق تۇرعان جەر مەن اسىقتىڭ تۇسكەن ورنىنىڭ اراسىنا ءۇش تابان سىيسا, اسىق مەنىكى. مەنىڭ اياعىم كىشكەنتاي عوي, اعا. ال بەرىك مايتابان. ونىڭ تاباندارى پىلدىكىندەي. قانشا ۇشىرسا دا, ءۇش تابانى سىيمايدى, – دەپ قۋاقىلانا كۇلدى اسىقشى بالا.
اسفالت بەتىندە اسىق ويناعان بالالارمەن جاعالاسىپ, اسىق ويناۋدىڭ ەرەجەسىن ۇيرەنگىم كەلىپ كەتتى. الشىسى – اسىقتى يىرگەندە تابانى جەرگە ءتيىپ, تۇرىق ءتۇسۋى ەكەن. ەڭ ءبىرىنشى وسىعان ءمان بەرىلەدى, ياعني ءبىرىنشى ورىن. اسىقتى يىرگەندە شۇڭقىرلاۋ تابانى جەرگە تيسە, ول تايكە دەپ اتالادى ەكەن. دوڭەس جونى ۇستىنە قاراپ, ەتپەتىنەن جاتسا, بۇك تۇسكەنى. ول – ءۇشىنشى ورىن. شۇڭقىر قۇرساق جاعى ۇستىنە قاراپ, ەتپەتىنەن جاتىق تۇسسە, ءتورتىنشى دارەجە, ول شىك ءتۇستى دەپ اتالادى ەكەن.
ايتاقىر اسفالت بەتىندە اسىق ويناعان ەكى بالامەن قوسىلىپ, بىرگە ويناعىم كەلىپ كەتكەنى. بۇل دا وزىنشە ءبىر دەنە شىنىقتىرۋ, بالالاردى شالت قيمىلعا, توسىن شەشىم قابىلداۋعا ماشىقتاندىراتىن تيىمدىلىگى مول دۇنيە. ءارى سوناۋ بالا كەزدەن جادىمىزدا جاتتالعان ويىننىڭ تىلسىم سىرىنا قۇشتارلىعىمىزدى ارتتىرعان ەستەلىك ءتارىزدى.
بايقال ءبايادىلوۆ,
جۋرناليست