بريتاندىق «British Civilians For Peace in Libya» ۇكىمەتتىك ەمەس ۇيىمى تريپوليدە, زاۋيدە, بين-ۆاليدتە جانە ليۆيانىڭ باتىسىنداعى باسقا دا قالالاردا ءبىر اپتا ينسپەكتسيا وتكىزگەن سوڭ, ەلدە مۋاممار كاددافيدىڭ قىلمىستىق رەجىمى بولماعان دەگەن ءمالىمدەمە جاساعان.
ول از بولسا, ۇيىمنىڭ الدىن الا جاسالعان بايانداماسىندا ناتو اۆياتسياسىنىڭ بومبالاۋى سالدارىنان بەيبىت تۇرعىنداردىڭ قازا تاپقانى تۋرالى ايعاقتار تابىلعانى ايتىلعان. ال ۇكىمەت اسكەرىنىڭ بەيبىت حالىققا قارسى شابۋىل ۇيىمداستىرعانىنا دالەل جوق كورىنەدى. ساپار قورىتىندىسى بويىنشا باتىستىق جۋرناليستەر, شىندىقتى بۇرمالاي وتىرىپ, جۇرتشىلىققا ءادىل حابار تاراتۋ جونىندەگى ءوز مىندەتتەرىن ورىنداماعان دەگەن ءتۇيىن جاسالعان.
ءۇندىستاندا جەر سىلكىندى
جەكسەنبى كۇنى ءۇندىستاننىڭ ءسولتۇستىك-شىعىسىندا بولعان كۇشتى جەر سىلكىنىسىنەن 42 ادام قازا تاپقان.
قازىرگى ۋاقىتتا سيككيم شتاتىندا جانە وعان جاقىن اۋدانداردا اسكەري تىكۇشاقتاردىڭ قاتىسۋىمەن ىزدەستىرۋ-قۇتقارۋ جۇمىستارى جۇرگىزىلۋدە. وڭىرگە 5 مىڭ اسكەري قىزمەتشى اتتاندىرىلعان. قايعىلى ستاتيستيكانىڭ بۇدان دا گورى وسە ءتۇسۋى مۇمكىن دەگەن كۇدىك بار. كوپتەگەن شالعاي اۋداندار كوشكىن سالدارىنان قورشاۋدا قالعان, بىرقاتار ەلدى مەكەندەردە ەلەكتر جارىعى مەن بايلانىس جوق.
ۇكىمەت جاساقتاۋ تۇيىققا تىرەلدى
ليۆيا كوسەمى مۋاممار كاددافيدى جاقتايتىن كۇشتەر ەرەۋىلشىلەردىڭ سيرت جانە بەني-ۆاليد قالالارىنا جاساعان شابۋىلىنا تويتارىس بەرگەن.
سونىمەن بىرگە, ۇكىمەت جاساقتاۋمەن اينالىسىپ جاتقان وتپەلى ۇلتتىق كەڭەس وپپوزيتسيا ىشىندەگى الاۋىزدىق سالدارىنان كابينەت قۇرامىن حابارلاۋدىڭ كەيىنگە قالدىرىلاتىنىن مويىنداپ وتىر. وتپەلى ۇلتتىق كەڭەس اتقارۋ كوميتەتىنىڭ باسشىسى ماحمۋد ءدجيبريلدىڭ ايتۋىنشا, بىرقاتار كانديداتۋرالار بويىنشا كەلىسىمگە قول جەتكەنىمەن, قالعان ورىندارعا تالاس ناقتى ناتيجە بەرمەي وتىرعان كورىنەدى.
تاۋەلسىزدىكتى مويىنداۋعا شاقىردى
پالەستينا ۇلتتىق اكىمشىلىگىنىڭ باسشىسى ماحمۇد ابباس دۇيسەنبى كۇنى يزرايل بيلىگىن پالەستينانى تاۋەلسىز مەملەكەت رەتىندە مويىنداۋعا شاقىردى.
نيۋ-يورككە كەلگەن سوڭ ابباس جۋرناليستەرگە تەل-ءاۆيۆتىڭ پالەستينانىڭ تاۋەلسىزدىگىن مويىنداۋى تاياۋ شىعىستا بەيبىتشىلىككە قول جەتكىزۋ ءۇشىن جاقسى مۇمكىندىك بولار ەدى دەپ تۇسىندىرگەن. وسى اپتادا ابباس پالەستينا مەملەكەتىنىڭ 1967 جىلعى شەكاراسىن مويىنداۋ جونىندە بۇۇ-عا سۇراۋ جىبەرمەك نيەتتە. يزرايل وكىمەتى بولسا بۇل باستاماعا قارسىلىق ءبىلدىرىپ وتىر.
بەرليندەگى سوتسيال-دەموكراتتار جەڭىسى
بەرليننىڭ جەر پارلامەنتىنە وتكەن سايلاۋدا سوتسيال-دەموكراتتار جەڭىسكە جەتتى.
ولار جەكە فەدەرالدىق جەر مارتەبەسىنە يە گەرمانيا استاناسىنىڭ دەپۋتاتتار پالاتاسىندا 28,3 پايىز داۋىس العان. ءسويتىپ, استانالىق سوتسيال-دەموكراتتار جەتەكشىسى كلاۋس ۆوۆەرايت ءۇشىنشى رەت بەرليننىڭ باسقارۋشى بۋرگوميسترى بولىپ وتىر. فرگ كانتسلەرى انگەلا مەركەل باسقاراتىن حريستيان-دەموكراتيالىق وداعى ءوز پوزيتسياسىن جاقسارتقانىمەن, سايلاۋدا جەڭىلىس تاپتى.
تۇركيا ەگيپەتپەن وداقتاسپاق ويدا
تۇركيانىڭ سىرتقى ىستەر ءمينيسترى احمەد داۆۋتوعلۋ تۇرىك ۇكىمەتىنىڭ ەگيپەتپەن اليانس قۇرۋعا قارسى ەمەس ەكەنىن مالىمدەگەن.
ول ءوز شەشىمىن ەگيپەتتىڭ ەلدىڭ بۇرىنعى پرەزيدەنتى حوسني مۇباراكتىڭ بيلىگىنەن شىعىپ, دەموكراتيانى قايتا قۇرا باستاۋىمەن نەگىزدەگەن. سونىمەن بىرگە, تۇرىك ءمينيسترى ءوز ەلىنىڭ ەگيپەتپەن وداعىنىڭ يزرايلگە, يرانعا نەمەسە باسقاداي ءبىر ەلگە قارسى باعىتتالمايتىنىن اتاپ كورسەتكەن. سونداي-اق ول تۇركيانىڭ ەگيپەتكە سالاتىن ينۆەستيتسياسىنىڭ ەكى جىلدا 5 ميلليارد دوللارعا جەتۋى مۇمكىن ەكەنىن دە ايتقان.
اۆياشوۋداعى ۇشاق اپاتى
اقش-تىڭ باتىس ۆيرگينيا شتاتىندا وتكەن اۆياشوۋدا 1958 جىلى شىققان ءبىر موتورلى ۇشاق اپاتقا ۇشىراعان.
«ترويان سالت اتتىلارى» كومانداسىنىڭ مۇشەسى بولىپ تابىلاتىن ۇشقىش قازا تاپقان. امەريكالىق باق-تاردىڭ حابارلاۋىنشا, ۇشاق بەلگىسىز سەبەپتەن انگار سىرتىنا قۇلاپ, جارىلىپ كەتكەن. وسى ورايدا امەريكالىق اۆياشوۋ بارىسىندا ءبىر اپتادا ەكى ۇشاقتىڭ اپاتقا ۇشىراعانىن ايتا كەتۋ كەرەك.
نيۋ-يوركتەگى «اشۋ-ىزا كۇنى»
جەكسەنبى كۇنى «اقش-تاعى اشۋ-ىزا كۇنى» شەڭبەرىندە ۋولل-ستريت جانىنا بىرنەشە جۇزدەگەن ادام جينالعان.
ەرەۋىلشىلەر, ءوز پىكىرلەرىنشە, قاتارداعى ازاماتتاردىڭ مۇددەلەرىنە قايشى كەلەتىن امەريكالىق قارجى جۇيەسىنە قارسىلىق بىلدىرگەن. ولاردىڭ ايتۋلارىنشا, امەريكانىڭ قارجى جۇيەسى قاراپايىم ازاماتتاردىڭ ءال-اۋقاتىن بايلاردىڭ مۇددەسى جولىندا قۇرباندىققا شالىپ وتىر. حالىق قولدارىنا قارجى توپتارى مەن ءىرى كورپوراتسيالارداعى جەمقورلىقپەن كۇرەسكە شاقىرعان پلاكاتتار ۇستاعان.
قىتاي عارىش اپپاراتىن ۇشىردى
قىتاي ەلدىڭ وڭتۇستىك-باتىسىنداعى سىچۋان پروۆينتسياسىنداعى سيچان عارىش ايلاعىنان «چجۋنسين-1 ا» بايلانىس اپپاراتىن عارىشقا تابىستى ۇشىردى.
سپۋتنيكتى «چانچجەن-3ۆ» زىمىران ۇشىرعىشى وربيتاعا الىپ شىققان. اپپاراتتى قىتاي اەروعارىش عىلىمى مەن تەحنيكاسى كورپوراتسياسى جانىنداعى قىتاي عارىشتىق تەحنولوگيالار اكادەمياسى ازىرلەپ, جاساپ شىققان. ول بۇكىل قحر اۋماعىندا جوعارى ساپالى بايلانىس ورناتۋعا جانە حابارلار تاراتۋعا ارنالعان.
ينتەرنەت ماتەريالدارى نەگىزىندە ازىرلەندى.