اقش-تىڭ قازاقستانداعى ۋاقىتشا سەنىمدى وكىلى دجون وردۆەي قوستانايدا بولدى. ول وبلىس اكىمى سەرگەي كۋلاگينمەن جانە ل.تولستوي اتىنداعى وبلىستىق كىتاپحانادا جەرگىلىكتى ستۋدەنت جاستارمەن كەزدەستى.
اكىممەن بولعان كەزدەسۋدە ەلشى قوستاناي جەرىن العاش باسىپ تۇرسا دا استىقتى ءوڭىر تۋرالى ءبىلىپ-تۇيگەنى از ەمەس ەكەنىن جەتكىزدى. سەرگەي كۋلاگين دە ءمارتەبەلى مەيمانعا «قۇتتى قوناق كەلسە, قوي ەگىز تابادى» دەگەندى ايتىپ, بيىلعى بىتىك ەگىننىڭ كورسەتكىشتەرىن اڭگىمەلەدى.
مۇنان كەيىن ەلشى وبلىستىق كىتاپحاناداعى «امەريكا بۇرىشىندا» ستۋدەنت جاستارمەن, جۇرتشىلىق وكىلدەرىمەن, جۋرناليستەرمەن كەزدەستى. ەلشى اقش پەن قازاقستاننىڭ سان-سالالى بايلانىسى جونىندە كوپتەگەن سۇراقتارعا جاۋاپ بەردى. «قازاقستان – الەم ەلدەرىمەن جان-جاقتى قارىم-قاتىناس ورناتقان مەملەكەتتەردىڭ ءبىرى. اقش قازاقستانمەن كوپتەگەن حالىقارالىق, سونىڭ ىشىندە لاڭكەستىككە قاتىستى ءماسەلەلەردى بىرلەسىپ شەشۋدە. جاقىندا قوستاناي وبلىسىمەن عىلىم جانە تەحنيكا سالالارى بويىنشا ورتاق كەلىسىمگە قول قويدىق», – دەدى دجون وردۆەي.
ءنازيرا جارىمبەتوۆا.
قوستاناي.