قازاقستان-يزرايل ساۋدا-ەكونوميكالىق ىنتىماقتاستىعى جونىندەگى 7-ءشى وتىرىستا ەكى ەلدىڭ استانالارى اراسىندا تىكەلەي اۋە رەيسىن اشۋ ماسەلەسى تالقىلاندى.
«ۇكىمەتارالىق كوميسسيا وتىرىسىندا كوتەرىلگەن تاعى ءبىر وزەكتى ماسەلە ءبىزدىڭ ەلدەرىمىزدىڭ استانالارى اراسىندا تىكەلەي اۋە رەيسىن اشۋ بولدى. قازاقستان ءوز تارابىنان ەكسپو كورمەسىنە دايىندىق اياسىندا كەلەسى جىلى مۇنداي اۋە رەيستەرىنىڭ ورىندالۋىنا كەدەرگى كەلتىرەتىن بارلىق توسقاۋىلداردى الىپ تاستاۋدى جوسپارلاۋدا», - دەدى ول.
سونىمەن قاتار كوميسسيا وتىرىسىندا بيىل جەلتوقسان ايىنىڭ ورتاسىندا يزرايل پرەمەر-ءمينيسترى بينيامين نەتانياحۋ قازاقستانعا ساپارمەن كەلەتىنى ايتىلدى.
«بۇگىن ءبىز قازاقستان رەسپۋبليكاسى مەن يزرايل مەملەكەتى اراسىنداعى ۇكىمەتارالىق كوميسسيانىڭ 7-ءشى وتىرىسىن وتكىزىپ جاتىرمىز. بۇل - يزرايل پرەمەر-ءمينيسترى ب.نەتانياحۋدىڭ ەلىمىزگە جوسپارلانعان ساپارى الدىنداعى ماڭىزدى كەزدەسۋ. ساپار وسى جىلدىڭ جەلتوقسان ايىنىڭ ورتاسىنا جوسپارلانعان. ءبىز بۇگىن ەلدەرىمىز اراسىنداعى ءتيىمدى ىنتىماقتاستىقتىڭ بىرقاتار باعىتتارىن تالقىلادىق. ناقتى بىرقاتار كەلىسىمگە قول قويىلادى جانە وزگە دە قوسىمشا شەشىمدەر قاراستىرىلىپ جاتىر. ول قۇجاتتار ساۋدا-ەكونوميكالىق, ينۆەستيتسيالىق جانە ءتۇرلى سالالارداعى ءبىزدىڭ ەلدەرىمىزدىڭ ىنتىماقتاستىعىن كوزدەيدى. ارينە, اگروونەركاسىپ كەشەنىن دامىتۋ, سۋ رەسۋستارى, يننوۆاتسيا سالالارىنداعى ىنتىماقتاستىق وزگە دە باعىتتارعا تىڭ سەرپىن بەرەتىندىگى ءسوزسىز», - دەدى كوميسسيا وتىرىسى اياسىندا باق وكىلدەرىنە سۇحبات بەرگەن قارجى ءمينيسترى باقىت سۇلتانوۆ.