قاي قوعامدا بولسىن ءمانىن دە, وزەكتىلىگىن دە جويمايتىن ءبىر قۇندىلىق بار ەكەنى راس. ول – قايىرىمدىلىق. ادامداردىڭ ءبىر-بىرىنە قايىرىمدىلىعى نەمەسە جەكەلەگەن كومپانيالاردىڭ كەيبىر جاندارعا قولۇشىن سوزىپ, جاسايتىن قايىرىمدىلىعى, ءتىپتى وعان قاتىسى جوق ادامنىڭ دا كوڭىلىنە جىلۋ سىيلايدى. نەگە دەسەڭىز, ونداي جاعىمدى جاڭالىقتىڭ, يگى ءىستىڭ جاقسى شاراپاتى بولادى. «قۋانىشتى بولىسسەڭ كوبەيەدى» دەگەندەي, مۇنداي ءىس ادامداردى قاشاندا قايىرىمدىلىق جاساۋعا يتەرمەلەپ تۇرادى. وسىنداي قايىرىمدى ءىستىڭ ءبىرى جۋىردا «ەمبىمۇنايگاز» اكتسيونەرلىك قوعامىنىڭ جۇمىسكەرلەرى تاراپىنان كورسەتىلدى. ولار وزدەرىنىڭ جەكە قارجىسىن شىعارىپ, نوسەر جاۋىننىڭ كەسىرىنەن ءۇيىن سۋ باسقان اتىراۋلىق ءبىر وتباسىنا جاڭا ءۇي سالىپ بەردى.
وسى جىلدىڭ مامىر ايىندا اتىراۋ قالاسى جاۋىن-شاشىندى بولدى. كۇندى كۇنگە, ءتۇندى تۇنگە جالعاعان قاتتى جاۋىننىڭ سالدارىنان گۇلباعىت قىزىلتاشتىڭ ءۇيىن سۋ باسقان ەدى. سالدارىنان تۇرعىن ءۇي تۇرۋعا جارامسىز دەپ تانىلىپ, قاۋىپسىزدىك ءۇشىن گاز جۇيەسىنەن دە اجىراتىلىپ تاستالدى. ءدال وسى شاقتا شاڭىراقتىڭ وتاعاسى جول-كولىك اپاتىنا ۇشىراپ, گۇلباعىتتىڭ ءوزى ءتورتىنشى بالاسىنىڭ ومىرگە كەلۋىنە بايلانىستى دەكرەتتىك دەمالىستا ۇيدە وتىرعان-دى. وعان قوسا وتباسىنداعى ەكى بىردەي ناۋقاس بالانىڭ جايى تۇرمىس تاۋقىمەتىن ابدەن تارتقان كەلىنشەكتى وبلىستىق اكىمدىك وكىلدەرىنىڭ حالىقپەن كەزدەسۋىندە مۇڭ شاعۋىنا, ءوز جاعدايىن ايتىپ, كومەك سۇراۋىنا ماجبۇرلەدى. مىنە, سول كەزدە «قازمۇنايگاز» بارلاۋ ءوندىرۋ» اكتسيونەرلىك قوعامىنىڭ ەنشىلەس كومپانياسى – «ەمبىمۇنايگاز» اكتسيونەرلىك قوعامىنىڭ باسشىلىعى قيىنشىلىققا تاپ بولعان وتباسىعا جاردەم بەرۋگە شەشىم قابىلدايدى. «جۇمىلا كوتەرگەن جۇك جەڭىل» دەمەكشى, بۇل وتباسىنىڭ ءۇيىن سالىپ بەرۋگە «ەمبىمۇنايگازدىڭ» مۇنايشىلارى اتسالىسىپ, ءوز قارجىلارىن اۋدارادى.
– «قازمۇنايگاز» اكتسيونەرلىك قوعامىنىڭ كومپانيالار توبى الەۋمەتتىك دامۋعا قاتىستى بارلىق ماسەلە بويىنشا جەرگىلىكتى بيلىكپەن تىعىز ارىپتەستىكتە جۇمىس اتقارادى. ءبىز بۇل جولى اتىراۋ وبلىسىنىڭ اكىمى نۇرلان نوعاەۆتىڭ ۇسىنىسىن قابىلداپ, اتىراۋلىق تۇرعىنعا كومەكتەسۋگە شەشىم شىعاردىق. ەمبىلىك مۇنايشىلار قيىن جاعدايدا قالعان كوپبالالى وتباسىنا كومەكتەسۋ ءۇشىن ءبىر كۇندىك جالاقىلارىن اۋداردى. مۇناي نارىعىنداعى قازىرگى كۇردەلى ەكونوميكالىق جاعدايعا قاراماستان, ولار ادامداردىڭ باسىنا تۇسكەن قيىندىققا نەمقۇرايدى قارامايدى, – دەدى «قازمۇنايگاز» بارلاۋ ءوندىرۋ» اق باس ديرەكتورى, «ەمبىمۇنايگاز» اق باس ديرەكتورىنىڭ ءبىرىنشى ورىنباسارى قۇرمانعازى ەسقازيەۆ. ول بۇل ءسوزدى گۇلباعىت قىزىلتاشتىڭ ءۇيىنىڭ ساپاسىن ءوز كوزىمەن كورىپ, قۇتتى بولسىن ايتۋعا كەلگەن كەزىندە ايتتى.
جاڭا ءۇيدىڭ قۇرىلىسىنا ءۇش اي ۋاقىت كەتكەن. سونىمەن, بيىلعى قازان ايىندا ءبىر وتباسىن قۋانىشقا بولەپ, تىرشىلىككە دەگەن ءۇمىت وتىن الاۋلاتىپ جاڭا ءۇي سالىنىپ ءبىتتى. قۇرىلىس جۇمىستارى كەزىندە بۇرىنعى ەسكى ءۇيدى بولشەكتەپ, سىرىپ تاستاپ, جاڭا ۇلگىدەگى, ءتىپتى شاتىرى مەن ىرگەتاسىنىڭ دا پوشىمى بولەك, جىلىتۋ قازاندىعى, الليۋميني رادياتورلارى, بۇكىل سانتەحنيكاسى بار جاپ-جاڭا ءۇي تۇرعىزىلدى. ەمبىمۇنايگازدىق مۇنايشىلاردىڭ بىرلىگى جاراسقان ۇجىمى قىزىلتاش وتباسىنان باسقا تاعى دا ءۇش جۇمىسشىنىڭ وتباسىنا كومەكتەسكەنىن دە اتاپ ءوتۋ قاجەت. ولار «ەمبىمۇنايگاز» اق-تىڭ وندىرىستىك قۇرىلىمدىق بولىمشەسى سانالاتىن «جايىقمۇنايگاز» اق-تىڭ نوسەرلى جاۋىن كەزىندە ۇيلەرى زارداپ شەككەن ءۇش جۇمىسكەرى ەكەن.
جالپى, «ەمبىمۇنايگازدىڭ» جۇمىسشىلارى وتكەن جىلى دا اتىراۋ قالاسىنداعى ءتورت وتباسىعا كومەكتەسىپ, ءبىر كۇندىك جالاقىلارىن اۋدارعان. ولار دا توقتاماي جاۋعان جاڭبىردان ۇيلەرىن سۋ العان وتباسىلار بولاتىن. سوندا ۇيىندە مۇگەدەك بالالارى بار ءتورت وتباسىنىڭ باسپاناسىن جوندەۋدەن ءوتكىزىپ, جالعىزىلىكتى ءبىر زەينەتكەرگە جاڭادان تۇرعىن ءۇي تۇرعىزىپ بەرگەن ەدى. مىنە, ادامعا ادامنىڭ قادىرى وسىندايدا بىلىنەدى. نارىق زامانى ورنادى, ادامداردىڭ ادامگەرشىلىك قاسيەتى تومەندەدى, ازايىپ بارادى دەپ ءجيى ايتىپ جۇرسەك تە, وسىنداي نار جىگىتتەردىڭ تىرلىكتەرى كوكەيگە ءۇمىت ۇيالاتادى. قايىرىمدىلىقتىڭ ءىرى-ۇساق بولىپ بولىنبەيتىنىن كورسەتەدى. باي بول, كەدەي بول – قايىرىمدى بولۋ مىندەتىڭ دەگەن ويعا جەتەلەيدى. ال قايىرىمدىلىق جاساۋ قاشاندا عانيبەت!
مارات اققۇل,
«ەگەمەن قازاقستان»