قازىرگى تاڭدا اقپاراتتىق تەحنولوگيالاردىڭ مۇمكىندىگى شەكتەۋسىز. شارۋا تىندىرۋ ءۇشىن ات ارىتىپ, ادام سابىلتۋدىڭ ەندى قاجەتى بولماي قالدى. بۇل – ءبىلىم سالاسىنا دا قاتىستى. ماسەلەن, الەمگە ايگىلى ۋنيۆەرسيتەتتەر دە ونلاين-ەمتيحاندار ارقىلى ستۋدەنت قابىلداۋدى, بەينە-دارىستەر جۇرگىزۋدى باياعىدا جۇزەگە اسىرعان.
ءبىزدىڭ ەلىمىزدە دە بۇل ءۇردىستى كىرىكتىرۋگە مۇددەلى باستاماشىل ۇيىمدار بار. الماتى قالاسىندا ونلاين-ءبىلىم بەرۋدىڭ كەلەشەگىنە ارنالعان دوڭگەلەك ۇستەل ءوتتى. ويلاسۋ تۇرعىسىندا وتكەن باسقوسۋعا «WikiBilim» قوعامدىق قورىنىڭ وكىلدەرى, بەلگىلى عالىمدار, جوعارى وقۋ ورىندارىنىڭ وكىلدەرى جانە ساراپشىلار قاتىستى.
جيىن بارىسىندا «WikiBilim» قوعامدىق قورى «قازاقستاننىڭ اشىق ۋنيۆەرسيتەتى» جوباسىن قولعا الاتىنىن مالىمدەدى. جوبا اياسىندا قازاقستاندىق عالىمداردىڭ بەينەلەكتسيالارىن ءتۇسىرىپ, ولاردى ينتەرنەت ارقىلى ەركىن تاراتۋ كوزدەلگەن. جوبانىڭ العاشقى كەزەڭىندە تەلەكوممۋنيكاتسيا, بيزنەس جانە اقپاراتتىق تەحنولوگيالار باعىتتارى بويىنشا كۋرستار ازىرلەنەدى. قازىرگە ق.سəتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى, قازاق-بريتان تەحنيكالىق ۋنيۆەرسيتەتى, Almaty Management University, سۇلەيمەن دەميرەل ۋنيۆەرسيتەتى مەن ماتەماتيكا جانە ماتەماتيكالىق مودەلدەۋ ينستيتۋتى جوباعا ارىپتەس رەتىندە قاتىساتىنى بەلگىلى بولىپ وتىر.
جوبانىڭ العاشقى لەكتورى بولۋعا كەلىسكەن بەلگىلى اكادەميك اسقار جۇمادىلداەۆ يگى باستاماعا ساتتىلىك تىلەپ, ازىرلەنەتىن ماتەريالداردىڭ ساپاسىنا مۇقيات كوڭىل ءبولۋ كەرەكتىگىن ايتا كەلە: «باستامانى قولعا الىپ وتىرعان جاستارعا العىس ايتامىن! ءبىزدىڭ قوعامعا وتە قاجەت جوبا. سوندىقتان, «قازاقستاننىڭ اشىق ۋنيۆەرسيتەتى» جوباسىن قولدايمىن جانە قولىمنان كەلگەنشە ۇلەسىمدى قوسۋعا دايىنمىن. بەينەلەكتسيالار الەمدە كەڭىنەن تارالعان, الايدا, وسىنداي فورماتتاعى ساپالى جاسالعان قازاق تىلىندەگى ماتەريالدار جوق», – دەدى.
بۇل باستامانىڭ ۋاقىت ۇنەمدەۋدە وتە ءتيىمدى ءارى ىڭعايلى ەكەنىن حالىقارالىق ستاندارتتا ءبىلىم بەرىپ وتىرعان جوعارى وقۋ ورىندارى قولدايدى. ماسەلەن, قازاق-بريتان تەحنولوگيالىق ۋنيۆەرسيتەتىنىڭ پرورەكتورى تيمۋر ۋماروۆ مۇنداي جوبالاردىڭ كومەگىمەن جاستارىمىزدىڭ ينتەللەكتۋالدى دەڭگەيىن كوتەرۋگە بولاتىنىن جەتكىزدى. «قبتۋ بۇل جوبانى تولىعىمەن قولدايدى. ءبىز جوبانى جۇزەگە اسىرۋ ءۇشىن ءوزىمىزدىڭ بازامىزدى بەرۋگە جانە وسى كۇنگە دەيىن جيناعان تاجىريبەمىزبەن بولىسۋگە دايىنبىز» دەدى تيمۋر ۋماروۆ.
دەگەنمەن, وسى ارادا اتالمىش جوبانى جۇزەگە اسىرۋدىڭ تەحنيكالىق تۇرعىداعى كىلتيپاندارى بار. سوندىقتان, ونلاين-ءبىلىم بەرۋدى ەنگىزۋگە «كسەلل» كومپانياسى قاتىسادى. ۇيالى وپەراتور جوباعا ءارى ءبىر باستاماشى ءارى دەمەۋشى رەتىندە مۇددەلىلىك تانىتىپ وتىر.
جيىنعا قاتىسۋشىلاردىڭ سوزىنە قاراعاندا, ونلاين دارىستەردى ءتۇسىرۋ جانە ولاردى ەركىن تاراتۋ سوڭعى جىلدارى قارقىنمەن دامىپ كەلەدى. مۇنداي فورماتتاعى دارىستەر بۇقارالىق اشىق ونلاين كۋرستار دەپ اتالادى. بۇگىنگى كۇنى الەمدە شامامەن 5000-نان اسا ءدارىس ينتەرنەت ارقىلى قولجەتىمدى. الايدا, ولاردىڭ كوپ بولىگى اعىلشىن تىلىندە. قازاق تىلىندە جانە قازاقستانعا قاتىستى كۋرستار جوقتىڭ قاسى دەۋگە بولادى.
جوبا اۆتورلارىنىڭ ايتۋىنشا, ءبىرىنشى كەزەڭدەگى لەكتسيالاردىڭ 80 پايىزى قازاق تىلىندە بولادى جانە الداعى ۋاقىتتا «قازاقستاننىڭ اشىق ۋنيۆەرسيتەتى» ۇسىناتىن كۋرستاردىڭ سانى مەن باعىتتارى كوبەيە تۇسەدى. «العاشقى كەزەڭدە تەلەكوممۋنيكاتسيا, بيزنەس جانە اقپاراتتىق تەحنولوگيالار باعىتتارى بويىنشا كۋرستار ازىرلەنەدى. الايدا, ءبىزدىڭ پلاتفورمامىز ۇسىناتىن كۋرستاردىڭ سانى مەن ءار الۋاندىعىن ارتتىرىپ وتىرامىز. سونداي-اق, ءبىز جوبامىزعا قاتىساتىن جوعارى وقۋ ورىندارىنىڭ سانىن دا كوبەيتۋدى جوسپارلاپ وتىرمىز. وسىلايشا, ءبىز قازاقستاندىق جاستاردىڭ ءوز ءبىلىمىن جەتىلدىرۋگە قاجەت بارلىق ساباقتاردى ءوز پورتالىمىز ارقىلى تەگىن ۇسىنعىمىز كەلەدى. ءارى بۇل جوبا وتاندىق عىلىمنىڭ دامۋىنا ءوز سەپتىگىن تيگىزەدى دەپ سەنەمىز», دەدى «WikiBilm» قورىنىڭ پرەزيدەنتى نۇربەك ماتجاني.
پورتال گارۆارد ۋنيۆەرسيتەتى مەن ماسساچۋسەتس تەحنولوگيالىق ينستيتۋتى ازىرلەگەن Open edX پلاتفورماسىنىڭ نەگىزىندە جاسالىپ, بۇقارالىق اشىق ونلاين كۋرستارعا قاجەت بارلىق زاماناۋي فۋنكتسيونالعا يە بولادى, دەيدى جوبا اۆتورلارى.
ايناش ەسالي,
«ەگەمەن قازاقستان»
الماتى