الماتى وبلىستىق دەنە شىنىقتىرۋ جانە سپورت باسقارماسىنىڭ باستىعى تۇراتبەك شاراپيەۆتەن جۇزدەسىپ, ايماقتاعى سپورتتىڭ باعىتى جانە قىسقى سپورت تۇرلەرى تۋرالى پىكىرلەسكەن ەدىك.
– تۇراتبەك تولەبەك ۇلى, قىسقى سپورت تۇرلەرىنە جەتىسۋلىقتار قانداي دايىندىقپەن كەلدى؟
– وبلىستا قىسقى سپورت ءتۇرلەرىن دامىتۋ ماقساتىندا 2013 جىلى تالعار اۋدانىندا مامانداندىرىلعان بالالار مەن جاسوسپىرىمدەر سپورت مەكتەبى اشىلعان ەدى. وندا 33 جاتتىقتىرۋشى بياتلون, شورت-ترەك, شاڭعى جارىسى, شاڭعىمەن باعدارلاۋ, پرەزيدەنتتىك كوپسايىس بويىنشا 972 وقۋشىنى جاتتىقتىرۋدى قولعا الدى. بۇلاردىڭ اراسىندا بياتلوننان 2010 جىلعى ۆانكۋۆەر وليمپيا ويىندارىنىڭ كۇمىس جۇلدەگەرى, ازيا ويىندارىنىڭ التىن ءجۇلدەگەرى ەلەنا حرۋستالەۆا دا بار.
نەگىزى, سپورتشىنىڭ العا ۇمتىلىپ تۇرۋى ءۇشىن تۇراقتى تۇردە قىسقى سپورت تۇرلەرىنەن سپارتاكيادا, تۋرنيرلەر ءوتكىزىپ كەلەمىز. جوعارى جەتىستىكتەرگە جەتۋ جولدارىنىڭ ءبىرى قارقىندى وقۋ-جاتتىعۋ ساباقتارى, جارىستار الدىندا ارنايى ءوتكىزىلەتىن وقۋ-جاتتىعۋ جيىندارى بولىپ ەسەپتەلەتىنى ءمالىم. ۋنيۆەرسيادا-2017 جارىسى الدىندا شاڭعى قوسسايىسى كومانداسىنىڭ مۇشەلەرى تالعار اۋدانىنىڭ بەسقاينار اۋىلىندا ورنالاسقان ۆ.سميرنوۆ اتىنداعى سپورتتىق بازاسىندا ارنايى دايىندىقتان وتۋدە.
– ۇلكەن سپورتتا جەتكەن جەتىستىكتەرىڭىزدى سالالاپ ايتىپ بەرە الاسىز با؟
– بيىل تامىزدا برازيليانىڭ ريو-دە-جانەيرو قالاسىندا وتكەن وليمپيادا ويىندارىندا اۋىر اتلەتيكادان كارينا گوريچەۆا قولا مەدال ۇتسا, مارگاريتا ەليسەەۆا مەن بوكسشى جانىبەك ءالىمحان ۇلى بەسىنشى ورىنعا يە بولدى. ال پاراليمپيادا ويىندارىندا پاۋەرليفتينگتەن راۋشان قويشىباەۆا كۇمىس مەدال الدى. «جەتىسۋ» ۆولەيبول كومانداسى – قازاقستاننىڭ 7 ءدۇركىن چەمپيونى, كۋبوك يەسى. ول 2015 جىلى العاش رەت وتكىزىلگەن سۋپەركۋبوكتى الدى. سونداي-اق, ازيانىڭ كلۋبتىق كوماندالار اراسىنداعى جۇلدەگەرى بولىپ تابىلادى. گاندبولدان «ىلە» جاساعى وتكەن جىلى چەمپيوندىققا قول جەتكىزدى, جاقىندا قىزىلوردادا وتكەن ازيانىڭ كلۋبتىق كوماندالارى چەمپيوناتىندا ءۇشىنشى بولدى. «بەسارىس» كوگالداعى حوككەي ايەلدەر كلۋبى 3 مارتە ازيا چەمپيونى, كوگالداعى حوككەي مەن ونىڭ ءبىر ءتۇرى – يندور-حوككەيدەن قازاقستاننىڭ 5 مارتە چەمپيونى بولدى. «قاپشاعاي» باسكەتبولدان ۇلتتىق ليگاداعى ەرلەر كوماندالارى اراسىندا 3-ورىندى يەلەندى. «وليمپ» رەگبي كومانداسى چەمپيون اتاندى. سول سياقتى وبلىستىڭ كوكپار كومانداسى قازاقستان چەمپيوناتىندا ءۇشىنشى ورىننان كورىندى.
مەملەكەت باسشىسىنىڭ بۇقارالىق سپورتپەن شۇعىلدانۋشى حالىقتىڭ سانىن 30 پايىزعا دەيىن جەتكىزۋ تۋرالى ءمىندەتىن ورىنداۋ ماقساتىندا وبلىستىڭ بارلىق اۋىلدىق وكرۋگ اكىمدىكتەرىنىڭ اپپاراتتارىنا 253 سپورت ادىسكەر-نۇسقاۋشى بەرىلىپ, ۆولەيبول, فۋتبول, باسكەتبول سەكىلدى سپورت تۇرلەرى بويىنشا سەكتسيالار جۇرگىزۋدە. وبلىس اكىمىنىڭ وكىمىمەن رەسپۋبليكالىق جانە حالىقارالىق جارىستاردا جوعارى ناتيجەلەرگە جەتكەن 60 ۇزدىك سپورتشىعا جانە 21 مۇگەدەك-سپورتشىعا اي سايىن 30-300 مىڭ تەڭگە ارالىعىندا سىياقى تولەنۋدە.
– الەم كوز تىگىپ وتىرعان ۋنيۆەرسياداعا كىمدەر قاتىسادى؟
– بۇكىلالەمدىك 28-ءشى قىسقى ۋنيۆەرسياداعا وبلىستان شاڭعى قوسسايىسىنان 3 سپورتشى قاتىساتىنى بەلگىلى بولدى. قازىرگى تاڭدا ولار رەسەيدىڭ نيجني تاگيل قالاسىندا وقۋ-جاتتىعۋ جيىنىن وتكىزىپ جاتىر. بۇدان كەيىن 5 جەلتوقسان – 10 قاڭتار ارالىعىندا گەرمانيا, نورۆەگيا, اۆستريا, سلوۆەنيا ەلدەرىندە وتەتىن قۇرلىقتىق كۋبوك جارىسىنا ات سالىسادى. سونداي-اق, شاڭعىشى ابزال كارىشالوۆ 2017 جىلى اقش-تا وتەتىن الەم چەمپيوناتىنا قاتىسادى.
– ۋنيۆەرسيادانىڭ جوعارى دەڭگەيدە وتۋىنە وبلىستىڭ ۇلەسى قانداي بولماق؟
– ۋنيۆەرسيادا كەزىندە تالعار اۋدانىندا «الاتاۋ» شاڭعى-بياتلون كەشەنى مەن «تاباعان» سپورتتىق-ساۋىقتىرۋ كەشەنى ىسكە قوسىلادى. قوعامدىق ءتارتىپتى ساقتاۋعا ىشكى ىستەر دەپارتامەنتىنىڭ 1150 قىزمەتكەرىن جانە قورعانىس مينيسترلىگىنىڭ اەروۇتقىر اسكەرىنىڭ 150 قىزمەتكەرىن تارتۋ جوسپارلانۋدا. ۋنيۆەرسيادا نىساندارىندا بيلبوردتار مەن باننەرلەردى ورنالاستىرۋ ءۇشىن ارنايى كيىم-كەشەك كيگەن جانكۇيەرلەردى نىساندارعا جەتكىزۋ ءۇشىن تالعار اۋدانىنىڭ اكىمدىگىنە 39,7 ملن تەڭگە ءبولىندى.
اڭگىمەلەسكەن
نۇربول الدىباەۆ,
«ەگەمەن قازاقستان»
الماتى وبلىسى