بۇگىن كوكشەتاۋدا قازاقستاننىڭ قىسقى ارنايى سپارتاكياداسى باستالادى. وعان ەلىمىزدىڭ تۇكپىر-تۇكپىرىنەن كەلگەن ءمۇمكىندىگى شەكتەۋلى سپورتشىلار قاتىسادى.
جارىستى مادەنيەت جانە سپورت مينيسترلىگى مەن اقمولا وبلىستىق اكىمدىگى ۇيىمداستىرىپ وتىر. ونىڭ اشىلۋ سالتاناتى بۇگىن تۇستە «بۋراباي» سپورت سارايىندا وتەدى.
ءۇش كۇن بويى سپورتتىڭ شاڭعى, كونكي, فلوربول, سنەگوستۋپ, تاۋ شاڭعىسى جانە سنوۋبورد اتتى 6 ءتۇرى بويىنشا وتەتىن سايىس 26 قاراشا كۇنى ءوز مارەسىنە جەتەدى.
وليمپيادانىڭ ماقساتى مۇمكىندىگى شەكتەۋلى جاندار اراسىندا سالاماتتى ءومىر سالتىن قالىپتاستىرۋدىڭ, ولاردىڭ پسيحولوگيالىق جانە كۇش-قايرات جاعدايلارىن جاقسارتۋدىڭ ءبىر فاكتورى رەتىندە دەنەشىنىقتىرۋ مەن سپورتتى دامىتۋدى ناسيحاتتاۋ بولىپ تابىلادى. ال نەگىزگى مىندەتى بەلسەندى تۇردە دەنەشىنىقتىرۋعا تارتىپ, ولاردى حالىقارالىق جارىستارعا كوپتەپ قاتىستىرىپ تۇرۋعا قادام جاساۋ بولماق.
وليمپياداعا قاتىسۋشىلار سپورتتىق دايىندىقتارى دەڭگەيلەرىنە قاراي بىرنەشە ديۆيزيونعا ءبولىنىپ جارىسادى.
باقبەرگەن امالبەك,
«ەگەمەن قازاقستان»
كوكشەتاۋ