ەل تاۋەلسىزدىگىنىڭ شيرەك عاسىرلىق مەرەكەسىنە وراي, ەلىمىزدىڭ ينۆەستيتسيالار جانە دامۋ مينيسترلىگى ۇيىمداستىرعان كەڭەستە «كاسپي ءوڭىرىنىڭ گەولوگيالىق مازمۇنداعى گاج اتلاس كارتاسى» حالىقارالىق جوباسى تالقىلاندى.
اتالعان مينيسترلىكتىڭ گەولوگيا جانە جەر قويناۋىن پايدالانۋ كوميتەتىنىڭ وكىلدەرى, يران, رەسەي جانە ءوزبەكستان ەلدەرىنىڭ گەولوگيالىق قۇرىلىمدارىنىڭ جەتەكشىلەرى, ماڭعىستاۋ وبلىسى اكىمدىگىنىڭ وكىلدەرى مەن جەر قويناۋىن پايدالانۋشىلار, جوعارى وقۋ ورىندارىنىڭ قىزمەتكەرلەرى, عالىمدار قاتىسقان كەڭەس كاسپي تەڭىزىنە قاتىستى اۋقىمدى جۇمىستى قولعا الۋداعى العاشقى قادام بولۋىمەن ەرەكشەلەنەدى.
كەڭەسكە ارقاۋ بولعان كاسپي تەڭىزىنە قاتىستى حالىقارالىق جوبا ءبىر-ەكى جىلدان بەرى قولعا الىنعان. الدىمەن تەڭىز جاعالاۋىنداعى ەلدەر كەلىسسوزدەر جۇرگىزىپ, ءار ەل وزدەرىنىڭ گەولوگيالىق اقپاراتتار مودەلىن جاساعانمەن, وعان وزگەلەردىڭ قولجەتىمدىلىگى شەكتەۋلى. كاسپي قايراڭىنداعى مۇناي-گاز كەن قورىن زەرتتەۋدە اقپارات جەتكىلىكتى ءارى تولىق بولۋى ءۇشىن تەڭىز جاعاسىنداعى بەس مەملەكەتتىڭ اقپاراتىن پايدالانۋ ماڭىزدى. گەولوگيالىق اتلاس كارتاسىن جاساۋ ارقىلى كورشى ەلدەر شيرەك عاسىر ىشىندە تەڭىزگە قاتىستى جيناقتالعان گەولوگيالىق, گەوەكولوگيالىق, گەوفيزيكالىق دەرەكتەردى بىرىكتىرىپ, ورتاق مالىمەتكە قول جەتكىزە الادى. سونداي-اق, كاسپي تەڭىزى ءبۇگىنگە دەيىن گەولوگيالىق تۇرعىدا ءبىرتۇتاس زەرتتەلمەگەن, تەك ءار مەملەكەت كەن ورىندارىن ىزدەۋ ءۇشىن بەلگىلى ايماقتاردى زەرتتەپ كەلگەن, ەندى جاعالاۋداعى مۇناي وندىرەتىن بەس مەملەكەت تە تەڭىزدەگى تابيعي رەسۋرستاردىڭ قورىن تولىق انىقتاۋعا قىزىعۋشىلىق تانىتۋدا.
قازاقستاندا 25 جىل ىشىندە قاشاعان, قالامقاس تەڭىز, اقتوتى, حازار جانە قايران كەن ورىندارى اشىلىپ, بارلانعان. كەڭەستە ءسوز العان ماڭعىستاۋ وبلىسىنىڭ اكىمى ا.ايدارباەۆ ەلىمىزدە مۇنايدىڭ گەولوگيالىق قورىنىڭ 5,1 ملرد توننانى قۇرايتىندىعىن, ونىڭ ىشىندە شىعارىلاتىن قورلار 2,2 ملرد توننا بولسا, گازدىڭ كولەمى 0,2 ترلن تەكشە مەتر ەكەندىگىن ايتا كەلىپ:
– قازاقستان تاۋەلسىزدىك العالى العاش رەت 119 كومىرسۋتەكتى شيكىزات كەن ورنى مەملەكەتتىك بالانسقا قويىلدى. شامامەن, مۇنايدىڭ بەكىتىلگەن قورى 2,5 ملرد توننا, گاز 432 ملرد تەكشە مەتر, كوندەنسات قورى 265 ملن تونناعا ارتتى, – دەدى.
بىرلەسكەن گەولوگيالىق كارتوگرافيالىق جۇمىستار مەن اقپاراتتىق دەرەكتور قورى ماڭعىستاۋ ءوڭىرىنىڭ ينۆەستيتسيالىق تارتىمدىلىعىنا, وڭىردە مۇناي-گاز سەكتورىن دامىتۋعا اسەر ەتپەك.
تۇراقتى تەربەلىستەگى كاسپي تەڭىزى ءوڭىرىن زەرتتەۋ, ەكولوگيالىق قاۋىپسىزدىكتى باستى نازاردا ۇستاۋ ماسەلەسى ايتىلىپ, اتلاس كارتاسىن جاساۋ, گەولوگيالىق مالىمەتتەردىڭ ورتاقتىعى مەن جاعالاۋداعى كور-ءشى ەلدەردىڭ گەولوگيالىق قىزمەتتەرىنىڭ ىنتىماقتاستىعى تالقىلاندى. ول ءۇشىن سايت قۇرىپ, ورتاق ەلەكتروندى بازا جاساقتاۋ قاجەتتىگى ايتىلدى.
كەڭەستە يران, وزبەكستان, رەسەي عالىمدارى ءوز ويلارىن ورتاعا سالىپ, جوبانىڭ باستالۋىنا العىشارت رەتىندە ۇشجاقتى حاتتاماعا قول قويدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى