جىل باسىنان بەرى قازاقستان مەن تۇركىمەنستاننىڭ مەملەكەتتىك شەكاراسىنداعى «تەمىر بابا» كەدەندىك بەكەتىنەن 82 مىڭ ادام ءوتتى. اتالعان بەكەتتىڭ ۇزاقتىعى 320 كيلومەتردى قۇرايدى, دەپ حابارلادى قازاقپارات.
«جەكە تۇلعالارعا كەلەتىن بولساق, جىل باسىنان بەرى قازاقستانعا 41 مىڭ ادام كىرگەن, تۋرا وسىنشا كولەمدەگى ادامدار شەكارادان سىرتقا شىققان. جۇك تاسىمالىنا كەلەتىن بولساق, 3 مىڭ 943 جۇك كولىگى كىرىپ, 3 مىڭ 89 كولىك شىققان. ءبىزدىڭ بەكەتتە تاۋار اينالىمى اسا ۇلكەن ەمەس. سول سەبەپتى مۇندا ەكونوميكالىق قىلمىستار سانى دا از. مۇندا نەگىزىنەن اكىمشىلىك ماتەريالداردى تىركەيمىز. مۇنداي ماتەريالدار سانى 37 رەت تىركەلدى. سوڭعى رەت ءبىز ۇلكەن وقيعا رەتىندە 27 مىڭ 900 دوللاردى دەكلاراتسيادان وتكىزبەي الىپ بارا جاتقان تۇركىمەنستان ازاماتشاسىمەن بايلانىستى وقيعانى تىركەدىك. اتالمىش قارجى 33 جاستاعى ايەلدىڭ جۇگىن تەكسەرۋ كەزىندە تابىلدى. سونىمەن قاتار, وتكىزۋ باقىلاۋ بەكەتىندەگى «تانىمال» تاۋارلاردىڭ قاتارىندا تەمەكىلەر مەن قوسالقى بولشەكتەر بار», – دەدى «تەمىر بابا» كەدەندىك بەكەتىنىڭ جەتەكشىسى ابىلاي قازباەۆ.
«تەمىر بابا» بەكەتىنە جاقىن جاڭاوزەن قالاسى 175 كم قاشىقتىقتا ورنالاسقان.