بۇگىن پەكين قالاسىندا قازاقستان-قىتاي ىنتىماقتاستىق كوميتەتىنىڭ گەولوگيا جانە جەر قويناۋىن پايدالانۋ سالاسىنداعى ىنتىماقتاستىق جونىندەگى كىشى كوميتەتىنىڭ 8-ءشى وتىرىسىنىڭ اشىلۋ سالتاناتى ءوتتى, دەپ حابارلادى primeminister.kz.
قازاقستاندىق دەلەگاتسيانى قازاقستان رەسپۋبليكاسى ينۆەستيتسيالار جانە دامۋ مينيسترلىگىنىڭ اتىنان گەولوگيا جانە جەر قويناۋىن پايدالانۋ كوميتەتىنىڭ توراعاسى بازارباي نۇراباي جانە ق. ساتپاەۆ اتىنداعى گەولوگيالىق عىلىمدار ينستيتۋتىنىڭ ديرەكتورى مۇرات ومىرسەرىكوۆ باستاپ باردى.
قىتاي حالىق رەسپۋبليكاسى اتىنان قحر جەر جانە تابيعي رەسۋرستار مينيسترلىگىنىڭ باسشىلارى, قحر سىرتقى ىستەر مينيسترلىگى ازيا جانە ەۋروپا دەپارتامەنتىنىڭ ءبىرىنشى حاتشىسى, قحر گەولوگيالىق بارلاۋ پارتيا توبىنىڭ مۇشەلەرى وكىلدىك ەتتى.
اشىلۋ سالتاناتىندا قحر جەر جانە تابيعي رەسۋرستار مينيسترلىگىنىڭ ۆيتسە-ءمينيسترى تساو ۆەيسين وتىرىسقا قاتىسۋشىلاردى قۇتتىقتاپ, ءسوز سويلەدى. ول قازاقستاندىق دەلەگاتسيانىڭ ءىس-شاراعا بەلسەندى قاتىسقانى ءۇشىن ريزاشىلىعىن ءبىلدىردى. سونداي-اق, مۇمكىندىكتى پايدالانا وتىرىپ, قازاقستان رەسپۋبليكاسى تاۋەلسىزدىگىنىڭ 25 جىلدىعىمەن قۇتتىقتاپ, ودان ءارى گۇلدەنە ءتۇسۋىن تىلەدى. مينيستر ەكى ەلدىڭ گەولوگيالىق قىزمەتتەرى اراسىنداعى ەكى جاقتى ىنتىماقتاستىقتىڭ جانە بىرىڭعاي گەولوگيالىق كارتا قۇرۋ ماقساتىمەن زەرتتەلەتىن ءوڭىر شەگىندە گەولوگيالىق اقپاراتپەن الماسۋ بويىنشا جۇمىستاردى كۇشەيتۋدىڭ ماڭىزدىلىعىن اتاپ ءوتتى.
ينۆەستيتسيالار جانە دامۋ مينيسترلىگىنىڭ اتىنان گەولوگيا جانە جەر قويناۋىن پايدالانۋ كوميتەتىنىڭ توراعاسى ب. نۇراباي ءوز سوزىندە وسى ءىس-شارانى ۇيىمداستىرعانى ءۇشىن قىتاي حالىق رەسپۋبليكاسىنداعى ارىپتەستەرىنە ريزاشىلىعىن ءبىلدىردى.
8-ءشى وتىرىستىڭ كۇن تارتىبىندە قازاقستان-قىتاي ىنتىماقتاستىق كوميتەتىنىڭ جۇمىس جاعدايى جونىندە اقپارات بەرۋ, پەرسپەكتيۆالىق ۋچاسكەلەردى تالداۋ جانە انىقتاۋ ءۇشىن قازاقستان مەن قىتاي اراسىنداعى شەكاراعا شەكتەس الاپتىڭ بىرىڭعاي كارتاسىن قۇراستىرۋ جونىندەگى جوبانى تالقىلاۋ, جوبانى ورىنداۋ بويىنشا تۇيتكىلدى ماسەلەلەردى تالقىلاۋ سەكىلدى گەولوگيالىق سالاداعى ەكى جاقتى ىنتىماقتاستىقتىڭ ماڭىزدى ماسەلەلەرى قاراستىرىلدى.
سونىمەن قاتار, وتىرىستا بىرلەسكەن جوبالاردى دامىتۋ باعىتتارى, ەكى ەلدىڭ گەولوگيالىق قىزمەتتەرى اراسىنداعى ىنتىماقتاستىقتى كەڭەيتۋ جانە گەولوگيالىق اقپاراتپەن الماسۋ جۇمىسىن كۇشەيتۋ جونىندەگى جوسپارلار تالقىلاندى.
الداعى حالىقارالىق كونگرەستەرگە قازاقستان مەن قىتايداعى گەولوگيالىق بارلاۋ جانە تاۋ-كەن مەتاللۋرگيالىق بەيىن كورمەلەرىنە گەولوگيالىق بارلاۋ كاسىپورىندارىنىڭ قاتىسۋ ماسەلەسى قاراستىرىلدى.
قىتاي تاراپى 2017 جىلدىڭ ءبىرىنشى جارتى جىلدىعىندا گەولوگيا جانە جەر قويناۋىن پايدالانۋ كوميتەتىنىڭ قىزمەتكەرلەرى مەن قازاقستاندىق گەولوگ مامانداردى گەولوگيالىق باعىتتار بويىنشا وقىتۋعا ءازىر. سونداي-اق, قىتاي تاراپى قىتاي حالىق رەسپۋبليكاسىنىڭ ۇكىمەتى اتىنان ستيپەنديا ءبولۋ ءۇشىن كوميتەت توراعاسىنا پەكين ۋنيۆەرسيتەتتەرىندە وقىپ جاتقان ۇزدىك قازاقستاندىق ستۋدەنتتەردى انىقتاۋدى ءوتىندى.
وتىرىس قورىتىندىسى بويىنشا, ينۆەستيتسيالار جانە دامۋ مينيسترلىگى گەولوگيا جانە جەر قويناۋىن پايدالانۋ كوميتەتى مەن قحر قىتاي گەولوگيالىق قىزمەتى اراسىنداعى ىنتىماقتاستىق جونىندەگى مەموراندۋمعا قول قويۋ جونىندەگى ماسەلە قاراستىرىلۋدا.