25 ناۋرىزدا ساعات 10:00-دا م.وتەمىس ۇلى اتىنداعى وقۋشىلار سارايىندا «شاشۋ» حالىقارالىق ونەر فەستيۆالى اشىلادى, دەپ حابارلايدى ەلوردا اكىمدىگىنىڭ رەسمي سايتى.
شارانى ۇيىمداستىرۋشىلار – استانا قالاسىنىڭ ءبىلىم باسقارماسى, م.وتەمىس ۇلى اتىنداعى وقۋشىلار سارايى, «ART-شاشۋ» قق.
فەستيۆال ءتۇرلى مەملەكەتتەردەگى بالالار مەن جاسوسپىرىمدەر اراسىنداعى مادەني جانە دوستىق قارىم-قاتىناستى نىعايتۋعا, شىعارماشىلىقتى قولداۋ مەن دامىتۋعا, شىعارماشىلىق ۇجىمداردىڭ ونەر جەتىستىكتەرىمەن جانە تاجىريبەسىمەن بولىسۋگە, بالالار مەن جاسوسپىرىمدەردى قازاقستاننىڭ مادەني بايلىعىمەن تانىستىرۋعا باعىتتالعان.
«شاشۋ» حالىقارالىق فەستيۆالىنە ەلىمىزدىڭ دارىندى بالالارى مەن جاستارى, سونىمەن قاتار رەسەي فەدەراتسياسىنىڭ, ساحا (ياكۋتيا) رەسپۋبليكاسىنىڭ, قىرعىزستاننىڭ شىعارماشىلىق ۇجىمدارى قاتىسادى. «ۆوكال» (ەسترادالىق, حالىقتىق, اكادەميالىق), «حورەوگرافيا» (حالىق ءبيى , حالىقتىق – ءستيلدى ءبيى, قازىرگى زامانعى بي جانە ەسترادالىق بي, بالالار حورەوگرافياسى), «ينسترۋمەنتالدىق جانر» (سولو, انسامبلدەر جانە وركەسترلەر), «حالىق ءانى» ىسپەتتى جانرلار بويىنشا 700-دەن استام قاتىسۋشى وزدەرىنىڭ شەبەرلىگىن سىنايدى. قازىلار القاسىنىڭ قۇرامىندا قر ونەر قايراتكەرلەرى, مادەنيەت قايراتكەرلەرى, ەسترادا جۇلدىزدارى بار.
فەستيۆالدىڭ قورىتىندىسى بويىنشا جەڭىمپازداردى ماراپاتتاۋ سالتاناتى جانە گالا-كونتسەرت وتەدى.
مادەني شارا 29 ناۋرىزعا دەيىن جالعاسىن تابادى.