قازاقستان پرەزيدەنتى نۇرسۇلتان نازارباەۆ جۋرناليستەرمەن كەزدەسۋ بارىسىندا ادام ۇنەمى ىزدەنىس ۇستىندە بولۋ كەرەكتىگىن ايتىپ, ولاردى ەل ءۇشىن ايانباي ەڭبەك ەتۋگە شابىتتاندىردى.
"شىر ەتىپ جەرگە تۇسكەندە اللانىڭ بەرەتىن كۇشى بولادى. سول كۇش-قۋات تاۋسىلعانشا ءومىر سۇرەسىڭ. بىتكەندە كەتەسىڭ. ماعان وسىنداي كۇش-قۋات بەرگەنىنە ريزامىن. كۇشىڭ بار كەزدە جۇمىس ىستەپ قالۋ كەرەك. سەندەر مىنە تەپسە تەمىر ۇزەتىن جاسقا كەلدىڭدەر بارلىقتارىڭ. ايانباي جۇمىس ىستەڭدەر", دەدى ەلباسى.
سونىمەن قاتار پرەزيدەنت ادام قاي سالادا بولماسىن ۇنەمى ىزدەنىستە بولۋ كەرەكتىگىن ايتتى.
ء"اربىر جۇمىستا ىزدەنسەڭ, بيىككە ورلەيسىڭ. دۇنيە ءجۇزى بويىنشا اقپارات قۇرالدارىندا دا ولاردان ۇلگى الۋعا بولاتىن قانشا مىسالدار بار. مۇمكىن كەيبىر جاعدايدا مۇمكىنشىلىكتەر بولماي جاتاتىن شىعار, مۇمكىنشىلىكتى بولدىرۋ كەرەك. بارلىعىن دا جوعارى ىستەۋگە, سولارمەن ءبىر دەڭگەيدە بولۋعا, ولاردان اسىپ كەتۋگە تىرىسۋ كەرەك. مەن دە وسىنداي جۇمىستارمەن ءجۇرىپ كەلە جاتىرمىن. ەلىمدى باسقا ەلدەرمەن قاتار تەرەزەسىن تەڭ قىلىپ, ەشكىمنەن كەم قىلماي, قازاعىمنىڭ باسى كوتەرىلىپ ءجۇرسىن دەپ, ءار ۋاقىتتا بارلىعىنا تومەننەن جوعارى قاراماي, قازاقتىڭ وزىنە سولاي قارايتىن بولسىن دەپ ءومىر ءسۇرىپ ءجۇرمىن, جۇمىس ىستەپ ءجۇرمىن", دەدى پرەزيدەنت.