مەملەكەتتىك ساقتاندىرۋ – الەۋمەتتىك ماڭىزى زور ماسەلە

پارلامەنتتىڭ تومەنگى پالاتاسىندا مىندەتتى الەۋمەتتىك مەديتسينالىق ساقتاندىرۋ تۋرالى زاڭ جوباسىنىڭ تۇزەتۋلەرى تانىستىرىلدى. دەنساۋلىق ساقتاۋ ءمينيسترى ەلجان ءبىرتانوۆ جاڭا قۇجاتقا قاتىستى ءماجىلىس دەپۋتاتتارىنىڭ الدىندا بايانداما جاساپ, ولاردىڭ ساۋالدارىنا جاۋاپ بەردى. «100 ناقتى قادام» ۇلت جوس­پارى­نىڭ 80-قادامىن ىسكە اسىرۋ ءۇشىن وتكەن جىلدىڭ قاراشا ايىندا «مىن­دەتتى الەۋمەتتىك ساقتان­دىرۋ تۋرا­لى» زاڭ قابىلدانعان بولا­تىن. اتال­عان زاڭدا مەديتسينالىق ساق­تان­دىرۋ جۇيەسىن قالىپتاستىرۋ بو­يىن­شا ءتيىستى نورمالار قاراس­تى­رىلعان. مينيستر «قازاقستان رەس­پۋب­­ليكاسىنىڭ دەنساۋلىق ساقتاۋ سالاسىنا قاتىستى بىرقاتار زاڭ اكتى­لەرىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسى­نىڭ ايا­سىن­دا 6 كودەكس پەن 16 زاڭعا وز­گەرىس­تەر ەنگىزىلەتىنىن جەتكىزدى. ە.ءبىرتانوۆتىڭ ايتۋىنشا, ەلدەگى ماكرو­ەكونوميكالىق احۋالدارعا بايلانىستى, سونىمەن قاتار, جۇمىس بەرۋشىلەرگە ارتىلاتىن مىندەتتەردى تومەندەتۋ ءۇشىن تولەنەتىن جارنا كولەمىن ازايتۋ تۋرالى ۇسىنىستار تۇسكەن. بۇل ۇسىنىس قولداۋ تاۋىپ, مەملەكەت باسشىسىنا ۇسىنىلعان. – مەملەكەت باسشىسى بۇل تۇزەتۋ­لەردى ماقۇلدادى. وسىلايشا, مەم­لە­كەتتىڭ مىندەتتى الەۋمەتتىك مەدي­تسينالىق ساقتاندىرۋداعى جارنا­سى­نىڭ كولەمى بەكىتىلدى, – دەدى مينيستر. سونىمەن, مەملەكەتتىك جارنا كولەمى 2018 جىلدىڭ 1 قاڭتارىنان باستاپ – مەملەكەتتىك جارنا تولەۋ نىسانىنىڭ 3,75 پايىزىن قۇراسا, 2019 جىلدىڭ باسىنان – مەملەكەتتىك جارنا تولەۋ نىسانىنىڭ 4 پايى­زى­نا كوتەرىلەدى. ال 2022 جىلدان باستاپ بۇل كورسەتكىش 4 پايىز­دان كەم بولماۋعا ءتيىس. بۇل وراي­دا, مەملەكەتتىڭ جارناسى رەسپۋب­ليكا­لىق بيۋدجەت تۋرالى زاڭمەن ءتيىستى جىلعا سايكەس بەكىتىلىپ وتىراتىن بولادى. مىندەتتى الەۋمەتتىك مەدي­تسي­نالىق ساق­تاندىرۋعا قاتىستى جۇمىس بەرۋشىلەردىڭ جار­­ناسى دا جىل ساناپ كوتەرىلىپ وتىرماق. ونىڭ كولەمى بيىلعى جىلدىڭ باسىنان باستاپ اۋدارىلعان تولەم نىسانىنىڭ 1 پايىزىن قۇراي­تىنى بەلگىلى. كەلەسى جىلى بۇل كورسەتكىش 1,5 پايىزعا كوبەيسە, 2020 جىلى 2 پايىزعا, 2022 جىلى 3 پايىزعا جەتۋگە ءتيىس. ءوزىن ءوزى جۇمىسپەن قامتىعان ازاماتتار بولسا, 2018 جىلدىڭ 1 قاڭ­تارىنان باستاپ ساقتاندىرۋ قورىنا تابىسىنىڭ 5 پايىزىن قۇراي­تىن جارنا تولەۋگە مىندەتتەلەدى. – 18 جاسقا دەيىنگى مۇگەدەك بالا­عا كۇتىم جاسايتىن جۇمىسسىز ادام­دارعا مەملەكەت ەسەبىنەن جارنا تولەنەدى. جوعارى وقۋ ورنىن بىتىر­گەن تۇلەكتەر دە 3 ايعا دەيىن جارنا تولەۋدەن بوساتىلادى. جۇمىسسىز جۇرگەن ورالماندار تىركەلگەن كۇننەن باستاپ, ءبىر جىلعا دەيىنگى ارالىقتا جارنا تولەمەيدى, ولار مەملەكەت ەسەبىنەن مىندەتتى ساقتاندىرۋعا يە بولادى. تەگىن مەديتسينالىق ساق­تاندىرۋعا جۇمىسسىز جۇرگەن جانە قازاقستاندا تۇراقتى تۇردە تۇراتىن شەت ەل ازاماتتارى, ولاردىڭ ىشىندە زەينەتكەرلەر, بالالار, مۇگەدەكتەر, ستۋدەنتتەر قول جەتكىزە الادى, – دەدى ە.ءبىرتانوۆ. ءمامس جۇيەسىنىڭ ەنگىزىلۋىنە بايلانىستى اسكەري قىزمەتكەرلەرگە, ارنايى مەملەكەتتىك جانە قۇقىق قور­عاۋ ورگاندارىنىڭ قىزمەت­كەرلەرىنە مەديتسينالىق كومەك كور­­سەتۋ, سونىمەن قاتار, وسى كاتە­گو­­ريا­­عا جاتاتىن, زەينەتاقى الا­تىن ازاماتتار مەن ولاردىڭ وتباسى مۇشەلەرىنە مەديتسينالىق كومەك كور­سەتۋ ماسەلەسى دە رەتتەۋدى قاجەت ەتەدى. وسىعان قاتىستى مينيستر اس­كەريلەرگە, قۇقىق قورعاۋ, ارنا­يى مەملەكەتتىك ورگاندار قىزمەت­كەرلەرىنە اسكەري-مەديتسينالىق مەكەمەلەردە مەملەكەت ەسەبىنەن مەديتسينالىق كومەك كورسەتىلەتىن قازىرگى ءتارتىپتى قالدىرۋ تۋرالى ۇسىنىس ايتتى. – كۇشتىك قۇرىلىمداردان ءتيىس­تى جاس شەگىنە جەتكەننەن كەيىن نەمەسە باسقا دا سەبەپتەر بو­يىن­شا قىزمەتىنەن بوساتىلعان زەينەت­كەر­لەرگە, سونىمەن قاتار, ولاردىڭ قاراۋىنداعى وتباسى مۇشەلەرىنە اسكەري-مەديتسينالىق مەكەمەلەر, باسقا دا دەنساۋلىق ساقتاۋ مەكەمەلەرى قور اكتيۆتەرىنىڭ ەسەبىنەن قىزمەت كورسەتەدى, – دەدى مينيستر. ولارعا ساناتوري, كۋرورت قىزمەتىن ۇسىنۋ دا بۇرىنعى­سىن­شا مەملەكەت ەسەبىنەن جۇزە­گە اسىرىلماق. ارنۇر اسقار, «ەگەمەن قازاقستان»