ناۋرىز – ۇلىستىڭ ۇلى كۇنى. بۇل – اتا-بابالارىمىزدان بەرى قاراي ۇرپاقتان-ۇرپاققا جالعاسىپ كەلە جاتقان مەرەكە. تەك كەشەگى كەڭەس داۋىرىندە ۇزاق ۋاقىت ءوز دەڭگەيىندە اتالماي قالدى. دەگەنمەن, ۇلتتىق قۇندىلىقتى قانشا جاسىرساڭ دا, قاپاسقا قاماساڭ دا, ول جارىققا شىقپاي قويمايدى. مىنە, حالىققا ەركىندىك بەرىلگەن تۇستا, تاۋەلسىزدىك الار شاعىمىزدا ناۋرىز مەيرامىمەن قايتادان قۋانا قاۋىشتىق.
ناۋرىز مەيرامىن كاۆكاز حالىقتارى دا تويلايدى. اسىرەسە, ورتالىق ازيا ەلدەرىندە ايرىقشا اتالىپ وتەدى. شىعىس حالىقتارى كوكتەمنىڭ شۋاعىن سىيلايتىن وسى مەرەكەنى ساعىنا كۇتەدى. تابيعات-انانىڭ ءدۇر سىلكىنەتىن شاعى عوي. بارلىق تىرشىلىك يەسى جاڭارادى. قار كەتىپ, دالانىڭ كوك ءشوبى شىعا باستايدى. تال-تەرەكتەر ءبۇر جارىپ, جاپىراعى كوكتەيدى. ادامدار ەگىن ەگىپ, اۋىل شارۋاشىلىعىن قولعا الاتىن ۋاقىت تا وسى. بۇل مال تولدەيتىن كەزەڭمەن تۇسپا-تۇس كەلەدى.
ادام بالاسىنا دا ءاز-ناۋرىزدىڭ سىيلىعى مول. جۇرەكتەرگە قۋانىش نۇرىن قۇيادى. ەرتەڭگى كۇندەرىنە دەگەن سەنىمدەرىن نىعايتىپ, ۇمىتتەرىن ارتتىرادى.
قاتال قىستان قالجىراپ, جەم-ءشوپتەرى تاۋسىلىپ شىققان اۋىل ادامدارى مالدىڭ اۋزى كوككە تيسە, ءارى قاراي جاعدايىمىز جاقسارا تۇسەدى دەپ پايىمداعان. شىنىمەن دە, قىستا ارىقتاعان ءتورت ت ۇلىكتىڭ ءبارى دە كوكتەمدە جايىلىمعا شىعىپ, تۇلەپ سالا بەرەدى.
ناۋرىز تاعامدارىنىڭ ءوزى قۋاتتى. قىستان جۇدەپ شىققان ادامداردىڭ بويىنا كۇش-قايرات بەرەدى. ايتالىق, ناۋرىزكوجە جەتى ءتۇرلى قوسپادان تۇرادى. بۇل دا بىرلىكتىڭ, بىرىگۋدىڭ بەلگىسى.
ەلىمىزدە ناۋرىز مەيرامىن تويلاۋ ءداستۇرى جان-جاقتى قالىپتاسىپ كەلەدى. ەشكىم دە دىنىنە, تىلىنە, تەگىنە بولىنبەيدى. مىسالى, قادىرلى مەيماندار دا, قاراپايىم ادامدار دا وزگە ۇلت وكىلدەرى تۇراتىن جەرلەردە سولاردىڭ دا ۇلتتىق تاعامدارىنان ءدام تاتادى. بۇل دا وزگە ەتنوستىڭ سالت-ءداستۇرىن, مادەنيەتىن تانىپ-ءبىلۋدىڭ ءبىر جولى. ناۋرىزدى تويلاۋ بارىسىندا ۇلتتىق بىرلەستىكتەر ءوز ونەرلەرىن كورسەتەدى. حالىق اندەرىن ايتىپ, ۇلتتىق بيلەرىن كوپشىلىك نازارىنا ۇسىنادى. وسىنىڭ ءبارى ىنتىماق پەن بىرلىككە, تاتۋلىققا, ءوزارا سىيلاستىققا باستايتىن ىزگىلىكتى جول ەكەنى داۋسىز.
ادامدار اللا تاعالانىڭ بەرگەن نەسىبەسىنە شۇكىرشىلىك جاساپ, ەلدە, حالىقتا مولشىلىق بولۋىن تىلەيدى. اتا-اجەلەر « ۇلىس وڭ بولسىن, اق مول بولسىن», دەپ باتا بەرىپ جاتادى. ەلگە, حالىققا دەگەن جاقسى تىلەكتەر ايتىلادى.
ناۋرىز ادامدارعا ەرەكشە شاتتىق كوڭىل-كۇي سىيلايدى. وسى كۇندەرى تۋىستار, جاقىن ادامدار ءبىر-بىرىنە سىيلىقتار بەرەدى. ناۋرىزكوجەدەن اۋىز تيگىزەدى. كورشىلەر ءبىرىن-ءبىرى قوناققا شاقىرادى. ايتالىق, ءوزىم جاقسى بىلەتىن قازاق حالقى ۇيگە كىرگەن ءاربىر قوناقتى ىرىس كەلدى دەپ ەسەپتەيدى.
ناۋرىزدا قۋانىش پەن شاتتىق ادام جانىن قاناتتاندىرادى. وكپە, رەنىشكە ەشقانداي ورىن جوق. ەگەر دە بۇرىن الدەبىر سەبەپپەن ارازداسىپ قالعان ادامدار بولسا, ولار وسى ناۋرىزدا ءبىر-بىرىنە كەشىرىم جاساپ, قول الىسىپ, ءتوس قاعىستىرىپ, تاتۋلاسادى.
ديقاندار 21 ناۋرىزدا جەردىڭ توڭى ءجىبىپ, توپىراعىندا جىلۋ پايدا بولاتىنىن ايتادى. سول كۇندەرى جەردىڭ ءشوبى كۇنى-ءتۇنى ۇزدىكسىز قارقىنمەن شىعادى. ياعني, تابيعات-انامىز بارلىق تىرشىلىك يەسىنە ءوز سىيىن ۇسىنادى.
ەندى وسى ءبىر تاماشا مەيرامعا وراي ءبىرتۇتاس قازاقستان حالقىنا ايتار تىلەگىمىز – ەلىمىز امان بولسىن, ارقاشان بەيبىت زامان بولسىن! ەلباسىمىزدىڭ ساليقالى ساياساتىمەن العا باسىپ كەلە جاتقان وتانىمىزدىڭ كەلەشەگى جارقىن بولسىن! مەملەكەت باسشىسىنىڭ جولداۋىندا ايقىندالعان ماقسات-مۇددەلەرىمىز ورىندالىپ, ىرىس-بەرەكەسى, ىنتىماعى جاراسىم تاپقان تاۋەلسىز ەل بولىپ, عاسىرلار كوشىندە العا باسا بەرەيىك!
فاحريددين قاراتاەۆ,
ءماجىلىس دەپۋتاتى,
«نۇر وتان» پارتياسى فراكتسياسىنىڭ مۇشەسى