«قازپوشتا» اق ەلىمىز بويىنشا ءوز فيليالدارىن جاڭعىرتۋ جۇمىستارىن جالعاستىرۋدا. بۇگىندە شقو, وقو, قاراعاندى, الماتى جانە ەلىمىزدىڭ وزگە ايماقتارىندا جاڭارتىلعان پوشتا بولىمشەلەرى ىسكە قوسىلدى. سونداي-اق اقتوبە, اتىراۋ, ورال, قىزىلوردا, تالدىقورعان, تاراز جانە اقتاۋ قالالارىنداعى جوندەۋدەن وتكەن بولىمشەلەر اشىلدى.
الماتى قالاسىنىڭ جاڭعىرتىلعان بولىمشەسىنىڭ اشىلۋ سالتاناتىنا «سامۇرىق-قازىنا» اق باسقارما توراعاسى ومىرزاق شوكەەۆ پەن قالا اكىمى باۋىرجان بايبەك قاتىستى. كەزدەسۋ بارىسىندا «قازپوشتا» اق-تىڭ باسقارما توراعاسى ساكەن سارسەنوۆ جاڭارتىلعان بولىمشەنىڭ جۇمىسىمەن تانىستىرىپ, كومپانيانىڭ قىزمەتتەرىن ودان ءارى دامىتۋ جونىندەگى جوسپارلارىمەن ءبولىستى.
«ءبىز بارلىق بولىمشەلەرىمىزدى جاڭارتىپ, ولاردىڭ ينفراقۇرىلىمىن جاڭعىرتىپ, بيزنەس-پروتسەستەردى قايتا قاراستىرىپ جاتىرمىز. كەزەكتە تۇرماي-اق, كوپتەگەن قۇجاتتاردى تولتىرماي جاڭا كەڭسەلەرگە كەلىپ قىزمەتتەردى الۋ مۇمكىندىگى الماتىلىقتاردىڭ كوڭىلىنەن شىعادى دەپ ۇمىتتەنەمىز. شاھاردا قازىر 4 جاڭارتىلعان بولىمشە بار, جوسپار بويىنشا 18 بولىمشە جاڭارتىلماق», دەدى «قازپوشتا» باسشىسى.
ساكەن سارسەنوۆتىڭ ايتۋىنشا, پوشتا بولىمشەلەرىن جاڭعىرتۋ بارىسىندا جۇمىس كەڭىستىگىن وڭتايلاندىرۋعا ەرەكشە كوڭىل بولىنگەن: وپەراتسيالىق بولمەلەردىڭ اۋقىمى فۋنكتسيالىق ەمەس كابينەتتەردى جويۋ ارقىلى 9 مىڭ شارشى مەتردەن 19 مىڭ شارشى مەترگە دەيىن وسكەن. سونداي-اق, جاڭارتىلعان بولىمشەلەردە ءبىر دەڭگەيلى جانە كەدەرگىسىز قىزمەت كورسەتۋ تەرەزەلەرى ەنگىزىلگەن, جەكە جانە كورپوراتيۆتىك تۇتىنۋشىلارعا قىزمەت كورسەتۋ ورىندارى, پوشتا جانە قارجى قىزمەتتەرى زالدارى بولىنگەن, وپەراتسيالىق تەرەزەلەردىڭ سانى كوبەيتىلگەن.
جاڭعىرتىلعان بولىمشە جۇمىسىمەن تانىسىپ شىققان ءو.شوكەەۆ: «قازپوشتا» جۇمىسىنىڭ الەۋمەتتىك جۇگى اۋىر بولعاندىقتان «سامۇرىق-قازىنا» بارىنشا كومەكتەسىپ وتىر. بۇرىن نەگىزگى كىرىس كوزى حاتتاردان تۇسەتىن ەدى. ەندى باسقا تابىس كوزدەرىن, اقشا اۋدارىمدارى سياقتى بانكتىك قىزمەتتەردى, ترانزيتتىك قىزمەت كورسەتەتىن ەلەكتروندى كوممەرتسيانى جەتىلدىرۋ كەرەك. نارىق زامانىندا باسەكەگە قابىلەتتى بولا ءبىلۋ ءۇشىن پوشتا جۇيەسىن جاڭعىرتىپ ۇلگەرۋگە ءتيىسپىز», دەدى.
«سامۇرىق-قازىنا» اق-تىڭ قۇرامىنداعى كومپانيالاردىڭ جۇمىس تيىمدىلىگىن ارتتىرۋ ماقساتىندا 2014 جىلى ىسكە قوسىلعان ترانسفورماتسيالاۋ باعدارلاماسى اياسىندا بولگەن 3 ملرد تەڭگەگە بايلانىس جۇمىستارىن جاڭعىرتۋدى قولعا العان «قازپوشتا» جىلدىڭ اياعىنا دەيىن ەلىمىز بويىنشا تاعى 54 بولىمشە, ال ەكى جىلدىڭ ىشىندە 298 بولىمشە اشۋ ءىسىن قولعا الىپ وتىر. باعدارلاما بويىنشا 197 ەلدى مەكەندە ورنالاسقان 400 پوشتا بولىمشەسىن جاڭارتۋدى جوسپارلاعان «قازپوشتا» ەلىمىزدەگى پوشتا قىزمەتىن بارىنشا ارتتىرۋدى كوزدەيدى.
«جاڭعىرتىلعان بولىمشەلەردىڭ ەرەكشەلىگى – كەزەكسىز قىزمەتتەر كورسەتۋ عانا ەمەس, الىس اۋىلدارعا ءبىر-ەكى كۇن ىشىندە گازەت-جۋرنال, باسقا دا تاپسىرىستاردى دەرەۋ جەتكىزىپ بەرۋ. بىزگە باسەكەلەس كومپانيالار كوپ بولعانىمەن, ولار تەك قالالاردا عانا جۇمىس ىستەيدى. ال شالعاي جەردەگى اۋىلداردا ونداي كومپانيالار ەمەس, تەك «قازپوشتا» عانا جۇمىس ىستەيدى», دەي كەلە, «قازپوشتا» اق باسقارما توراعاسى س.سارسەنوۆ اتالعان بولىمشەلەردىڭ جاڭعىرۋى تەك كۇردەلى جوندەۋدى عانا ەمەس, سونىمەن قاتار, تەحنولوگيالىق قۇرامداردىڭ جاڭارۋىنا دا ۇلاساتىنىن, بارلىق جاڭعىرتىلعان بايلانىس بولىمشەلەرى بىرىڭعاي ەلەكتروندى كەزەك جۇيەسىمەن, بەينەقاداعالاۋ جانە ءورت قاۋىپسىزدىگىمەن قامتاماسىز ەتىلگەنىن جەتكىزدى.
«جاڭا جۇمىس فورماتىنا كوشۋ حالىققا قىزمەت كورسەتۋ ساپاسىن ارتتىرۋمەن بىرگە, سالەمدەمەلەردى الۋ جانە جونەلتۋ ءراسىمدەرىن وڭتايلاندىرۋعا مۇمكىندىك بەرەدى. قازىردىڭ وزىندە سالەمدەمەلەردى قابىلداۋ جانە جونەلتۋ ۋاقىتى 2-3 مينۋتقا دەيىن قىسقاردى, ال سۋپەرماركەتتەر ارقىلى بەرىلەتىن سالەمدەمەلەر سانى ەكى ەسەگە ارتقان. بۇل بىرەگەي سۋپەرماركەت تەك قازاقستاندا عانا بار جوبا. كانادادان, گوللانديادان كەلگەن ءارىپتەستەرىمىز ونداي سۋپەرماركەتتەردى ءوز ەلدەرىندە دە اشقىسى كەلەتىنىن ايتقان بولاتىن. سول سياقتى, پوستامات قىزمەتى دە كەز كەلگەن ەلدە بولا بەرمەيدى. ءبىز پوستاماتتاردى ۇلكەن بولىمشەلەرگە قويامىز», دەدى س.سارسەنوۆ.
ميرا بايبەك,
«ەگەمەن قازاقستان»
الماتى