استانا قالاسى اكىمدىگى «اتامەكەن» ۇلتتىق كاسىپكەرلەر پالاتاسىمەن بىرلەسىپ «1000 ساۋدا ورنى» باعدارلاماسىن ىسكە قوستى, دەپ جازادى palata.kz.
اكىمدىك سايتىنداعى حابارلاماعا سايكەس, باس قالانىڭ ەسىل اۋدانىندا – 303, سارىارقا اۋدانىندا – 305, الماتى اۋدانىندا 377 ساۋدا نىسانى اشىلادى. العاشقىدا كوشە ساۋداسىنا 274 ورىن بولىنگەنىمەن, كەيىننەن سانىن مىڭعا دەيىن ارتتىرۋ كوزدەلگەن. شاعىن جانە ورتا كاسىپكەرلىكتى قولداۋ ماقساتىندا ۇيىمداستىرىلعان 1000 ساۋدا ورنىندا ءدامحانا, ءموبيلدى اۆتوسەرۆيس, نان, كوكونىس, گۇل ساتۋ سەكىلدى كوپتەگەن كاسىپ تۇرلەرى قامتىلماق. ساۋدا ورىندارى قالانىڭ ساۋلەت كەلبەتىنە, سانيتارلىق جانە ءورت ءسوندىرۋ تالاپتارىنا ساي بولۋى ماڭىزدى تالاپتاردىڭ ءبىرى.
«شاعىن دۇكەن «1000 ساۋدا ورنى» باعدارلاماسى بويىنشا اشىلدى. اپكەم ارنايى ءوتىنىش جازىپ, قاجەتتى قۇجاتتار وتكىزدى. بۇل ءبىزدىڭ وتباسىلىق كاسىبىمىز. بۇرىندارى ساۋدا جاساۋ ءۇشىن جىل سايىن رۇقسات قاعاز الۋشى ەدىك, ال جاڭا باعدارلاما بويىنشا رۇقسات بىردەن 7 جىلعا بەرىلدى. ارينە, وتە ىڭعايلى. جەر سالىعىن تولەيمىز, تۇتىنعان ەلەكتر قۋاتىنا دا ۋاقىتىلى تولەم جاسايمىز. كىشكەنە عانا كاسىبىمىزدى اۋا رايىنىڭ قانداي بولعانىنا قاراماستان, ىڭعايلى ورىندا جۇرگىزەتىنىمىزگە قۋانىشتىمىز», – دەيدى اعايىندى ابزال مەن ازامات تويلىباەۆتار.
«شاعىن جانە ورتا كاسىپكەرلىككە ارنالعان «1000 ساۋدا ورنى» باعدارلاماسىن ەستىپ قۋاندىم. قالادا كاسىبىمدى اشۋعا ىڭعايلى بىرنەشە ورىنداردى انىقتاپ الىپ, سول ماڭايدان ساۋدا ورنىن سۇراپ باردىم. دەگەنمەن مەن قالاعان جەردە ورىندار بوس ەمەس ەكەن, ال ۇسىنعان جەرلەرى قاشىق بولدى. بۇل باعدارلاما اياسىندا جەر الىپ, كاسىپ جۇرگىزگەنىم قارجى جاعىنان ىڭعايلى بولار ەدى دەپ ويلايمىن. سوندىقتان, كاسىپ باستاۋعا اتالعان باعدارلاما اياسىندا قولايلى ورىندى ىزدەستىرۋ ۇستىندەمىن. دەگەنمەن, قاراپ وتىرعان جوقپىن. قازىر ساۋدا ورنىنا تيەسىلى جەردى جالعا الدىم. ەندى اشىلىپ جاتىرمىز. ءالى ءىشىن جوندەۋمەن, ارلەۋمەن اينالىسۋىم كەرەك», – دەيدى كاسىپكەر مۇرات مۇحامەدجانوۆ.
استانا كاسىپكەرلەرىنىڭ جىل سايىنعى كونفەرەنتسياسىندا ەلوردا تۇرعىندارىنىڭ 63% جەكە كاسىپكەرلىكتە جۇمىس ىستەيتىنى ايتىلدى. وسى جيىندا «اتامەكەن» ۇكپ تورالقا توراعاسى تيمۋر ق ۇلىباەۆ قالانىڭ باس جوسپارىنا ەنگىزىلگەن «1000 ساۋدا ورنى» شاعىن جانە ورتا كاسىپكەرلىكتى قولداۋدا ەرەكشە باستاما بولعانىن اتاپ ءوتىپ, قازاقستاننىڭ باسقا وڭىرلەرى بىرەگەي باستامانى ۇلگى رەتىندە قولدانۋدى ۇسىنعان ەدى.
قالانىڭ ساۋلەت قۇرىلىسىنا ساي جاسالعان ساۋدا ورىندارىندا سانيتارلىق, قاۋىپسىزدىك تالاپتارى ساقتالعان, ەلەكتر قۋاتى جۇرگىزىلگەن. بۇل ساۋدا ورىندارى كاسىپكەرلەرگە بايقاۋ نەگىزىندە, بەكىتىلگەن تارتىپپەن بەرىلەدى. «1000 ساۋدا ورنى» باعدارلاماسىنا زاڭمەن بەلگىلەنگەن تارتىپتە تىركەلگەن جانە سالىق پەن باسقا دا بيۋدجەتكە تولەنەتىن مىندەتتى تولەمدەر بويىنشا قارىزى جوق جەكە كاسىپكەرلەر نەمەسە زاڭدى تۇلعالار قاتىسا الادى. قاجەتتى قۇجاتتار پاكەتىنە ءوتىنىم-انكەتا, جەكە-كاسىپكەردى نەمەسە زاڭدى تۇلعانى تىركەۋ تۋرالى كۋالىكتىڭ كوشىرمەسى, قاجەت جاعدايدا وكىلەتتىگىن كۋالاندىراتىن قۇجات, سالىق بويىنشا قارىزى جوقتىعى تۋرالى انىقتاما, اۋدانى 9 شارشى مەتر ساۋدا نىسانىنىڭ ەسكيزى, ونى دايىنداۋشى زاۋىت تۋرالى مالىمەتتەر كورسەتىلۋى كەرەك. جەر ۋچاسكەسى 5-7 جىلعا جالعا بەرىلەدى.
سونىمەن قاتار, ساۋدا ورنىنىڭ بايقاۋىنا مەملەكەتتىك جانە زاڭدى تۇلعالار, كوميسسيا مۇشەلەرى, كوميسسيا حاتشىسى, بايقاۋدا جەڭىمپاز بولعاندار, سۋبارەندا بويىنشا تالاپتاردى ورىنداماعان كاسىپكەرلەر قاتىستىرىلمايدى.
وتىنىمدەردى قابىلداۋ تۋرالى حابارلاندىرۋ استانا قالاسى اكىمدىگىنىڭ سايتىندا جاريالانعان سوڭ, 15 كۇنتىزبەلىك كۇننىڭ ىشىندە ەلەكتروندى تۇردە www.smart.astana.kz سايتىندا تاپسىرىلادى.