قر پرەمەر-ءمينيسترى باقىتجان ساعىنتاەۆ شىعىس قازاقستان وبلىسىنا جۇمىس ساپارى بارىسىندا كاسىپكەرلەرمەن كەزدەسۋ وتكىزدى. كەزدەسۋ بارىسىندا مەملەكەتتىك ساتىپ الۋلار جۇيەسىن ودان ءارى دامىتۋدىڭ وزەكتى ماسەلەلەرىن تالقىلاندى, دەپ جازادى pm.kz.
باقىتجان ساعىنتاەۆ مەملەكەتتىك ساتىپ الۋلار جۇيەسىن جەتىلدىرۋ جولىندا بىرقاتار جۇمىستاردىڭ اتقارىلعانىن, سوعان وراي قازاقستاننىڭ ءۇش وبلىسىندا مەملەكەتتىك ساتىپ الۋلار كەزىندە قازىناشىلىق سۇيەمەلدەۋدىڭ پيلوتتىق جوباسى ەنگىزىلەتىنىن حابارلادى. بۇل قۇرىلىس ساپاسىن ارتتىرۋعا جانە ىسكە اسىرىلاتىن جوبالارعا وتاندىق كاسىپورىنداردىڭ قاتىسۋ ۇلەسىن ۇلعايتۋعا مۇمكىندىك بەرەدى.
بۇدان وزگە, قازىرگى ۋاقىتتا ورتالىقتاندىرىلعان قىزمەت قاعيداسى بويىنشا مەملەكەتتىك ساتىپ الۋلاردى جۇزەگە اسىرۋ ماسەلەلەرى پىسىقتالۋدا.
سونداي-اق, قر پرەمەر-ءمينيسترى ب. ساعىنتاەۆ كاسىپكەرلەرگە ساتىپ الۋلاردىڭ ءىت-پلاتفورماسى قۇرىلاتىنىن ايتتى. ول بيزنەسكە ءوز ءوندىرىسىن ءتيىمدى جوسپارلاپ, ۇيىمداستىرۋعا مۇمكىندىك بەرەدى جانە مەملەكەتتىك جانە كۆازيمەملەكەتتىك سەكتورلاردىڭ ورتاق ساتىپ الۋلارىنا قولجەتىمدىلىكتى قامتاماسىز ەتەدى.
كەڭەس بارىسىندا شىعىس قازاقستان وبلىسى اكىمىنىڭ ءبىرىنشى ورىنباسارى ن. ساقتاعانوۆ جانە بيزنەس-قاۋىمداستىقتاردىڭ وكىلدەرى سوز سويلەدى, سونىڭ ىشىندە «اتامەكەن» ۇلتتىق كاسىپكەرلەر پالاتاسىنىڭ باسقارما توراعاسى ا. مىرزاحمەتوۆ, شقو كاسىپكەرلەر پالاتاسىنىڭ ديرەكتورى ي. شاتسكي, «الماتى جەلدەتكىشتەر زاۋىتى» جشس ديرەكتورلار كەڭەسىنىڭ توراعاسى م. باققۇلوۆ, جيھاز جانە اعاش وڭدەۋ ونەركاسىبى كاسىپورىندارى قاۋىمداستىعىنىڭ پرەزيدەنتى ە. سادىقوۆ جانە «ەسكو» جشس ديرەكتورى ا. شمارين بار.
كەزدەسۋ قاتىسۋشىلارى ونەركاسىپتىڭ ءتۇرلى سالالارىندا مەملەكەتتىك ساتىپ الۋلار جۇيەسىن دامىتۋ جونىندەگى ءوز ۇسىنىستارىن ايتتى.
جالپى, باقىتجان ساعىنتاەۆ قر ۇكىمەتى جۇيەلىك نەگىزدە كاسىپكەرلىك احۋالدى جەتىلدىرۋ مەن بيزنەستىڭ ىسكەرلىك بەلسەندىلىگىن ىنتالاندىرۋ بويىنشا جۇمىستار جۇرگىزىپ جاتقانىن اتاپ ءوتتى. وسى ورايدا ەلىمىزدىڭ ءاربىر كاسىپورنى بويىنشا جەرگىلىكتى قامتۋ كولەمىن ۇلعايتۋ جۇمىستارى جالعاستىرىلادى. بۇدان وزگە, كاسىپكەرلەرگە قارجىلىق جانە زاڭنامالىق قولداۋ كورسەتۋ شارالارى ۇسىنىلاتىن بولادى. قر ۇكىمەتى بيزنەس شىعىندارىن قىسقارتۋ مەن قايتا رەتتەۋ جۇمىستارىن جالعاستىرادى.