جوعارى حوككەي ليگاسىنداعى پلەي-وفف كەزەڭىنىڭ 1/4 فينالىندا قازاقستاندىق «تورپەدو» مەن «سارىارقا» كوماندالارى ەكىنشى ويىندارىن وتكىزدى.
● وسكەمەندە وتكەن ماتچتا «تورپەدو» سانكت-پەتەربۋرگتىڭ «ديناموسىمەن» كەزدەسىپ, 3:2 ەسەبىمەن باسىم ءتۇستى. كەزدەسۋدىڭ العاشقى گولى 5-مينۋتتا سوعىلدى. بۇل تۇستا كيريلل تامبيەۆ كوزگە ءتۇسىپ, پيتەرلىكتەردى العا شىعاردى. ارادا ءبىر مينۋت وتكەندە ماكسيم كاپيتۋروۆ ەسەپتى تەڭەستىرىپ ءۇلگەردى. دەگەنمەن, 17-مينۋتتا قوناقتار ارتەم ءتاميليننىڭ كومەگىمەن ەكىنشى شايبالارىن سالدى.
ەكىنشى كەزەڭ قاۋىپتى شابۋىلدارعا تولى بولسا دا, ەسەپ وزگەرىسسىز قالدى. ءۇشىنشى كەزەڭدە شىعىسقازاقستاندىقتار دجوردون ساۋتورننىڭ ارقاسىندا ەسەپتى 2:2-گە جەتكىزدى. ماتچقا جينالعان قاۋىم تارتىستى باسەكەنىڭ كۋاسى بولعانى ايدان انىق. سەبەبى, نەگىزگى ۋاقىتتا جەڭىمپاز كوماندا انىقتالماي, ويىن وۆەرتايمعا ۇلاسقان. بۇل ۋاقىتتا دا قوس كوماندا ءبىر-ءبىرىن اڭدۋمەن وتكىزدى. تەك ەكىنشى وۆەرتايمدا ەۆگەني رىمارەۆ جەڭىس گولىن سوقتى.
«تورپەدو» مەن «دينامو» اراسىنداعى جالپى ەسەپ 1:1 بولدى. كەلەسى كەزدەسۋ ەرتەڭ سانكت-پەتەربۋرگتە وتەدى.
● وسى سىندا ونەر كورسەتىپ جاتقان «سارىارقا» قاراعاندىدا «زاۋرالە» كومانداسىمەن كۇش سىناسىپ, 2:3 ەسەبىمەن ۇتىلىپ قالدى.
العاشقى ويىنداعى جەڭىلىستى قاپەرىندە ۇستاعان «زاۋرالە» ويىنشىلارى كەزدەسۋدىڭ 3-مينۋتىندا ەسەپ اشىپ ۇلگەردى. ونى ەۆگەني پولتوروك ءوز ەنشىسىنە جازدى. كەزەڭ سوڭىندا ارتەم ميحەەۆ باسىمدىقتى ارتتىرا ءتۇستى. ءدال وسىدان كەيىن العا ۇمتىلعان قاراعاندىلىقتار 35-مينۋتتا ميحايل ءانيسيننىڭ كومەگىمەن ەسەپ ايىرماشىلىعىن قىسقارتسا, 42-مينۋتتا تارازى باسىن تەڭەستىرىپ كەتتى. بۇل ماتچتىڭ نەگىزگى ۋاقىتىندا دا جەڭىمپاز تابىلماي, ويىن وۆەرتايمعا جالعاستى. وكىنىشكە قاراي, نيكيتا سيروتكين 65-مينۋتتا «سارىارقا» قاقپاسىنان ساڭىلاۋ تاۋىپ, «زاۋرالەنىڭ» جەڭىسىنە سەبەپشى بولدى.
قوس كوماندانىڭ اراسىنداعى جالپى ەسەپ 1:1 بولدى. كەلەسى ماتچ ەرتەڭ رەسەيدىڭ قورعان قالاسىندا وتەدى.