بۇگىن الماتى قالاسىنا جۇمىس ساپارى بارىسىندا قر پرەمەر-ءمينيسترى باقىتجان ساعىنتاەۆ يننوۆاتسيالىق تەحنولوگيالار پاركىن ارالاپ, قازاقستاندىق عالىمداردىڭ عىلىمي ازىرلەمەلەرىمەن تانىستى جانە قر پرەزيدەنتى نۇرسۇلتان نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىن ىسكە اسىرۋ ماسەلەلەرى بويىنشا كەزدەسۋ وتكىزدى.
«يتپ» اەا ارالاۋ بارىسىندا باقىتجان ساعىنتاەۆ وپەراتورلاردى, مۇناي ينجەنەرلەرىن, بۇرعىلاۋ مەردىگەرلەرىن جانە سەرۆيستىك كومپانيالاردىڭ تەحنيكالىق كادرلارىن كاسىپتىك دايارلاۋ بويىنشا زاماناۋي وقۋ-جاتتىعۋ ورتالىعىن, سونداي-اق زاماناۋي يمپورتتى الماستىراتىن تەلەكوممۋنيكاتسيالىق جابدىقتار وندىرەتىن كومپانيانى ارالادى.
ب. ساعىنتاەۆ «يتپ» اەا اۋماعىندا جۇمىس جاسايتىن ءىت-ۇيىمدارىنىڭ وكىلدەرىمەن كەڭەس وتكىزدى, ونىڭ بارىسىندا ول مەملەكەت باسشىسى ءوز جولداۋىندا جاريالاعان ماقساتتارعا جەتۋ ءۇشىن ەلدىڭ بارلىق عىلىمي جانە يننوۆاتسيالىق الەۋەتىن پايدالانۋ قاجەت ەكەنىن اتاپ ءوتتى.
قر پرەزيدەنتى ونىڭ نەگىزىندە جاڭا, پەرسپەكتيۆالى تەحنولوگيالار مەن يننوۆاتسيالار بولاتىن ەكونوميكا ءوسىمىنىڭ جاڭا ۇلگىسىن قۇرۋ تۋرالى مىندەت قويدى. بۇل قازاقستانعا 2050 جىلى الەمنىڭ دامىعان 30 ەلىنىڭ قاتارىنا كىرۋگە مۇمكىندىك بەرەدى. وسى ورايدا ب. ساعىنتاەۆ «يتپ» اەا اتالعان مىندەتتى ىسكە اسىرۋدا ۇلكەن ۇلەس قوسا الاتىنىن ايتىپ ءوتتى.
كەڭەس قورىتىندىسى بويىنشا, قر پرەمەر-ءمينيسترى باقىتجان ساعىنتاەۆ ينۆەستيتسيالار جانە دامۋ, اقپارات جانە كوممۋنيكاتسيالار مينيسترلىكتەرىنە ايتىلعان ۇسىنىستارعا تالداۋ جاساپ, ولاردى «تسيفرلىق قازاقستان» مەملەكەتتىك باعدارلاماسىن ازىرلەۋ كەزىندە ەسكەرۋدى تاپسىردى.