داڭق زالىنا اتى جازىلعان مەكسيكالىق باپكەر يگناسيو باريستاين ءوزى جاتتىقتىراتىن كىشى حۋليو سەزار چاۆەس الداعى جەكپە-جەكتە ساۋل «كانەلو» الۆارەستى جەڭسە, سپورتتان كەتۋگە دايىن ەكەنىن ايتتى. بۇل تۋرالى vesti.kz حابارلادى.
55 جىلىن بوكسقا ارناعان باريستاين مانسابىن قولايلى ۋاقىتتا اياقتاۋ ءساتىن كۇتىپ ءجۇر. ونىڭ ايتۋىنشا الداعى كەزدەسۋ وسى قادامعا تولىق نەگىز بولا الادى. سونىمەن بىرگە, ول جۇرتتىڭ نەلىكتەن الۆارەستىڭ جەڭىسىنە سەنىممەن قارايتىنىن تۇسىنبەيدى.
«ەگەر حۋليو جەڭسە, قاتتى قۋانار ەدىم. «كانەلو» ارينە, وتە بەلسەندى بولعان سوڭ كوزگە ءتۇسىپ ءجۇر. ال حۋليو رينگكە ءجيى شىقپايدى, بۇل جولى دا قولىنىڭ جاراقاتىن ەمدەپ كەلىپ وتىر. الداعى ايقاسقا وتە جاقسى دايىندىقپەن شىعادى», – دەدى باريستاين.
ايتا كەتەيىك, قوس مەكسيكالىق بوكسشىنىڭ اراسىنداعى ۇرىس 6 مامىردا اقش-تىڭ لاس-ۆەگاس قالاسىندا وتەدى.