قازاقستاندا ا كورپۋسىنداعى مەملەكەتتىك قىزمەتكەرلەر سانى قىسقارتىلىپ, ولاردىڭ جالاقىسىن تولەي جۇيەسى قايتا قارالادى, دەپ مالىمدەدى قازاقستان رەسپۋبليكاسى مەملەكەتتىك قىزمەت جانە جەمقورلىققا قارسى كۇرەس اگەنتتىگىنىڭ توراعاسى قايرات قوجامجاروۆ. بۇل تۋرالى Bnews.kz جازادى.
«بۇگىنگە دەيىنگى تاجىريبەنىڭ ناتيجەسىندە ا كورپۋسىنداعى باسقارۋشىلىق ينستيتۋتتى جەتىلدىرۋگە قاجەتتىلىك تۋىندادى. پرەزيدەنت اكىمشىلىگىمەن بىرلەسە وتىرىپ مەملەكەت باسشىسىنا ۇسىنىلاتىن ۇسىنىستىڭ تۇجىرىمداماسىن دايىنداپ قويدىق. وندا ا كورپۋسى قىزمەتكەرلەرىنىڭ, جاۋاپتى حاتشىلار, كوميتەت توراعالارى, ءوڭىر ورتالىقتارىنداعى اپپارات جەتەكشىلەرى, اۋدان مەن قالا اكىمدەرىنىڭ سانىن ازايتۋ قاراستىرىلعان», - دەدى قايرات قوجامجاروۆ.
توراعانىڭ ايتۋىنشا, بۇل ۆاكانسيالاردىڭ ورنىنا قاجەتتى تاجىريبەسى بار قىزمەتكەرلەر تىكەلەي بايقاۋ ارقىلى ىرىكتەلىپ الىناتىن بولادى.
«سونىمەن قاتار, قازىرگى تاڭداعى ا كورپۋسىنىڭ رەزەرۆى پايدالانىلادى. ولار بۇل ورىنعا ساي كەلەدى. كەلەر جىلدان باستاپ ەڭبەك ناتيجەسىنە قاراماستان, جالاقى تولەۋدىڭ جاڭا مودەلىن ەنگىزۋ جوسپارلانۋدا. وڭىرلەردىڭ مىندەتى - ءار قىزمەتكە مەملەكەتتىك ورگانداردىڭ ماقساتتى كورسەتكىشتەرىنە جەتۋ بويىنشا ناقتى باعالاۋ تالاپتارىن دايىنداۋ», - دەدى توراعا.