بالامالى ەنەرگيا كوزدەرى جوباسى بويىنشا يننوۆاتسيالىق جوبا بولىپ تابىلاتىن شاعىن سۋ ەلەكتر ستانتسياسىن سالۋ ماقساتىندا تۇركيا رەسپۋبليكاسىنان كەلگەن ينۆەستورلارمەن تۇلكىباس اۋدانىنىڭ اكىمى اۋەلحان تۇرعىمبەكوۆ كەزدەستى, دەپ حابارلادى وقو اكىمدىگى.
كەزدەسۋدە اۋدان اكىمى تۇركيا رەسپۋبليكاسىنىڭ «يندۋستريال» كومپانياسىنىڭ قارجىلىق ديرەكتورى يلياس كوشاسلانعا اۋدانداعى سۋ جانە جەل ارقىلى شاعىن ەلەكتر ەنەرگياسىن وندىرەتىن ستانتسياعا قولايلى ماشات, ارىس, قۇلان وزەندەرى جانە سۋ قويمالارى مەن جەلدىڭ باسىم باعىتتارى جايىندا تانىستىردى.
بالامالى ەنەرگيا كوزدەرىنىڭ جاسىل ەكونوميكا سالاسىنداعى نەگىزگى بولىگى ەكەندىگىن ايتا كەلە, اۋداندا جوباعا قولايلى بولاتىن باعىت بويىنشا بارلىق قولداۋ شارالارى جاسالاتىنىن جەتكىزدى.
تۇركيا رەسپۋبليكاسىنىڭ «يندۋستريال» كومپانياسى جالپى قۇنى 2,0 ملرد. تەڭگەگە جۋىق, جالپى قۋاتتىلىعى 4,2 مۆت تابيعي ەللەكتر قۋاتىن وندىرەتىن سۋ ەلەكتر ستانتسياسىن ماشات وزەنى بويىنان سالۋدى جوسپارلاپ وتىرعانىن تىلگە تيەك ەتتى.