باعىتىمىز – بەس باسىمدىق
جالپىۇلتتىق جوسپاردا قامتىلعان ءىس-شارالار جايىن ۇلتتىق ەكونوميكا ءمينيسترى تيمۋر سۇلەيمەنوۆ باياندادى. ءمينيستردىڭ مالىمدەۋىنشە, وندا جولداۋداعى ءبىرىنشى باسىمدىق – جەدەلدەتىلگەن تەحنولوگيالىق جاڭعىرتۋ اياسىندا تسيفرلى يندۋستريانى, ەكونوميكانىڭ نەگىزگى سالالارىنىڭ تەحنولوگيالىق قايتا جاراقتالۋىن دامىتۋعا باعىتتالعان 19 شارا قاراستىرىلعان. ونىڭ ىشىندە ءتورتىنشى ونەركاسىپتىك رەۆوليۋتسيا, ينۆەستيتسيالار تارتۋ, كولىك ينفراقۇرىلىمىن دامىتۋ, سونىمەن قاتار, عىلىمي الەۋەتتى دامىتۋ جۇمىستارى قامتىلعان. سونداي-اق, «تسيفرلىق قازاقستان» مەملەكەتتىك باعدارلاماسى, ەلدىڭ ەكسپورتتىق-ينۆەستيتسيالىق ستراتەگياسى, اوك مەملەكەتتىك باعدارلاماسىنىڭ قابىلدانۋى ءتارىزدى جاڭا باعدارلامالىق قۇجاتتاردىڭ ءازىرلەنۋى, سونىمەن قاتار «نۇرلى جول» مەملەكەتتىك باعدارلاماسىنا وزگەرىستەر ەنگىزۋ جانە ءونىمدى جۇمىسپەن قامتۋ مەن جاپپاي كاسىپكەرلىكتى دامىتۋ قاراستىرىلعان. ال, ەكىنشى باسىمدىق بويىنشا 18 شارا قاراستىرىلعان, ولار ەڭ جاقسى بيزنەس ورتانى قالىپتاستىرۋعا جانە مەملەكەتتىڭ ەكونوميكاعا قاتىسۋىن تومەندەتۋگە باعىتتالعان. ايماقتىق دەڭگەيدە جاپپاي كاسىپكەرلىكتى دامىتۋ, بيزنەستىڭ بارلىق تۇرلەرى ءۇشىن شىعىنداردى ازايتۋ بويىنشا شارالار كەشەنى قابىلداناتىن بولادى. ءۇشىنشى باسىمدىق اياسىندا 11 باعىت قاراستىرىلعان, ولار ينفلياتسيانى كەزەڭ-كەزەڭىمەن 3-4 پايىزعا دەيىن تومەندەتۋگە, بانك سەكتورىن ساۋىقتىرۋعا, وتاندىق قور نارىعىن جانداندىرۋعا, بيۋدجەتتىك راسىمدەردى جەڭىلدەتۋگە باعىتتالعان. ءتورتىنشى باسىمدىق بويىنشا 10 شارا قامتىلعان. ءبىلىم سالاسىندا وقۋ باعدارلامالارى جاڭارتىلىپ, ءۇش ءتىلدە ءبىلىم بەرۋگە كەزەڭ-كەزەڭىمەن كوشۋ قامتاماسىز ەتىلەدى, ەڭبەك نارىعىنىڭ تالاپتارىنا سايكەس كاسىپتىك ستاندارتتار جاڭارتىلادى. دەنساۋلىق ساقتاۋ سالاسىندا ءمىندەتتى الەۋمەتتىك مەديتسينالىق ساقتاندىرۋ جۇيەسىن اقپاراتتاندىرۋ جانە بۇل جۇيەنى حالىق اراسىندا ءتۇسىندىرۋ بويىنشا جۇمىستار اتقارىلادى. زەينەتاقى تولەمدەرىن جانە بالانىڭ تۋىنا بەرىلەتىن ءبىر رەتتىك جاردەماقى مولشەرىن ارتتىرۋ ماقساتىندا الەۋمەتتىك قامسىزداندىرۋ ماسەلەلەرى بويىنشا زاڭنامالىق اكتىلەر قابىلدانادى. سونىمەن قاتار, كۇنكورىستىڭ ەڭ تومەنگى دەڭگەيى كولەمىنىڭ قۇرىلىمى قايتا قارالادى. بەسىنشى باسىمدىق – ينستيتۋتتىق وزگەرىستەر, قاۋىپسىزدىك جانە سىبايلاس جەمقورلىقپەن كۇرەس اياسىندا 9 شارا قاراستىرىلعان. مەنشىك قۇقىقتارىن قورعاۋدى كۇشەيتۋ بويىنشا بارلىق زاڭناماعا رەۆيزيا جۇرگىزىلەدى, ەىدۇ ۇسىنىستارىن ەنگىزۋ بويىنشا جول كارتاسى ازىرلەنەدى. ۇلتتىق قاۋىپسىزدىكتى قامتاماسىز ەتۋ ماقساتىندا 2017-2020 جىلدارعا ارنالعان ءدىني ەكسترەميزممەن جانە تەرروريزممەن كۇرەس بويىنشا مەملەكەتتىك باعدارلامالار مەن كيبەرقاۋىپسىزدىك تۇجىرىمداماسى ازىرلەنەدى. سونىمەن قاتار, مەملەكەتتىك ساتىپ الۋلار سالاسىندا زاڭنامانى جەتىلدىرۋ ماقساتىندا ورتالىقتاندىرىلعان قىزمەت قاعيداتى بويىنشا مەملەكەتتىك ساتىپ الۋلاردىڭ بىرىڭعاي جۇيەسىن ەنگىزۋدى قاراستىراتىن زاڭ جوباسى ازىرلەنەدى. الداعى ونجىلدىقتا جاڭا يندۋستريالار مەن جاڭا ءوسىم مودەلىن قۇرۋ ءۇشىن قازاقستاندا ەلدىڭ جاڭا تەحنولوگيالىق قۇرىلىمعا كوشۋىنىڭ بىرىڭعاي ستراتەگياسى دايىندالادى. وسى ماقساتتا «قازاقستان 2025 – ۇلتتىق تەحنولوگيالىق باستاما» ستراتەگيالىق جوسپارى ازىرلەنەدى.جارتى جىلدا 148-دەن استام شارا اتقارىلماق
جيىندا قارالعان كەلەسى ماسەلە – ۇكىمەتتىڭ 2017 جىلدىڭ ءبىرىنشى جارتىجىلدىعىندا اتقاراتىن جۇمىس جوسپارى. بۇل رەتتە ۇلتتىق ەكونوميكا ءمينيسترى 9 ماڭىزدى باعىت بويىنشا 148-دەن استام شارا جوسپارلانعانىن اتاپ ءوتتى. ونىڭ ىشىندە ءىجو-ءنىڭ جوسپارلانعان ءوسۋ قارقىنىنا قول جەتكىزۋ, جەكە سەكتوردى دامىتۋعا قولايلى جاعدايلار جاساۋ, جەكە ينۆەستيتسيالاردى تارتۋ, جاپپاي كاسىپكەرلىكتى دامىتۋ جانە حالىق كىرىسىن ارتتىرۋ, ادامي كاپيتالدىڭ ساپاسىن ارتتىرۋداعى رەفورمالاردى نىعايتۋ ماسەلەلەرى قامتىلعان. ءمينيستردىڭ ايتۋىنشا, بيۋدجەتتى تەڭگەرىمدىلىكپەن قامتاماسىز ەتۋدى ارتتىرۋ ماقساتىندا اقپان ايىندا الەۋمەتتىك-ەكونوميكالىق دامۋ بولجامى مەن 2017 جىلدىڭ رەسپۋبليكالىق بيۋدجەت پارامەترلەرى قايتا قارالاتىن بولادى. جالپى, جيىن بارىسىندا وسى جىلدىڭ ءبىرىنشى جارتىجىلدىعىندا اتقارىلۋى ءتيىس جۇمىس جوسپارلارى تۋرالى بارلىق مينيسترلىك قىسقاشا بايانداپ, ۇكىمەت باسشىسىنا ەسەپ بەردى. سونىمەن, جوسپار بار, اتقارىلۋى ءتيىس شارالار رەتى جاقسىلاپ تىزبەكتەلگەن. ال ونىڭ نەگىزگى ناتيجەلەرى, ارينە, ۋاقىتتىڭ ەنشىسىندە. پرەمەر-مينيستر باقىتجان ساعىنتاەۆ ءوز كەزەگىندە اكىمدەر مەن مينيسترلەرگە الداعى حالىق الدىنداعى ەسەپتەرگە مۇقيات دايىندالۋدى تاپسىردى. بۇل رەتتە مەملەكەت باسشىسىنىڭ جارلىعىنا سايكەس, 15 اقپاننان باستاپ ءوڭىر اكىمدەرىنىڭ حالىق الدىندا ەسەپ بەرۋلەرى باستالاتىنىن ەسكە سالدى. مەملەكەت باسشىسىنىڭ بەرگەن تاپسىرمالارى مەن سىني ەسكەرتپەلەرىنىڭ باسىم بولىگى اكىمدەردىڭ جۇمىستارىنا دا قاتىستى ەكەنىن ايتىپ, سوندىقتان ەسەپ بەرۋلەر كەزىندە وسى ماسەلەلەردى كوتەرىپ, ءتۇسىندىرىپ, ولاردىڭ شەشىلۋ جولدارى تۋرالى حالىققا اقپارات بەرۋ كەرەكتىگىن جەتكىزدى. سونىمەن قاتار, پرەمەر-مينيستر اكىمدەردىڭ الداعى ەسەپ بەرۋىنە مينيسترلەردىڭ دە قاتىساتىنىن ايتىپ ءوتتى. ال مينيسترلەر قاتىسۋ قورىتىندىلارى بويىنشا ۇكىمەت باسشىسىنا ەسەپ بەرەدى.جەردى جالعا بەرۋ ينستيتۋتى ساقتالدى
وتىرىستا قارالعان ءۇشىنشى ماسەلە – قازاقستان رەسپۋبليكاسىنىڭ زاڭنامالىق اكتىلەرىنە جەر قاتىناستارىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى اۋىل شارۋاشىلىعى ۆيتسە-مينيسترى ە.نىسانباەۆ باياندادى. ۆيتسە-مينيستر 2015 جىلعى قاراشادا قابىلدانعان جەر كودەكسىنىڭ نورمالارى بويىنشا تۋىنداعان قوعامدىق رەزونانسقا بايلانىستى جەر رەفورماسى جونىندەگى كوميسسيانىڭ قۇرىلعانىن ەسكە سالدى. بارىنشا اشىقتىقپەن كەڭىنەن تالقىلاۋدى قامتاماسىز ەتۋ ءۇشىن زاڭ جوباسى مەن ونىڭ تۇجىرىمداماسى اشىق نورماتيۆتىك قۇقىقتىق اكتىلەر پورتالىندا, اشم رەسمي سايتىندا, 12 بۇقارالىق اقپارات قۇرالدارىندا جاريالانعان. بۇدان وزگە, مينيسترلىك جانىنداعى قوعامدىق كەڭەس وتىرىستارىندا تالقىلاۋلار جانە قوعامنىڭ قاتىسۋىمەن كوپشىلىك تالقىلاۋلار وتكىزىلدى, دەدى ۆيتسە-مينيستر. وسىلايشا, زاڭنامادا قازاقستاندىقتارعا اۋىلشارۋاشىلىق جەرلەرىن جالعا بەرۋ ينستيتۋتىن ساقتاي وتىرىپ, زاڭ جوباسىمەن اۋىل شارۋاشىلىعى جەرلەرىن كونكۋرستىق نەگىزدە بەرۋدىڭ جەكە ءتارتىبىن ەنگىزۋ قاراستىرىلعان. كورسەتىلگەن تارتىپكە سايكەس, جەردى بەرۋ اكىمدىكتە بەكىتىلگەن كونكۋرسقا شىعارىلاتىن جەرلەردىڭ ءتىزىمى بويىنشا جۇزەگە اسىرىلادى. ونى وتكىزۋدىڭ اشىقتىعى ءۇشىن كونكۋرستىق كوميسسيانىڭ قۇرامىنا قوعامدىق كەڭەستەر مەن ۇيىمداردىڭ وكىلدەرى ەنگىزىلەدى. بۇدان وزگە, جاريالىلىقتى جانە ونىڭ بارلىق الەۋەتتى قاتىسۋشىلارىنىڭ كونكۋرسقا تەڭ قولجەتىمدىلىگىن قامتاماسىز ەتۋ ماقساتىندا جاڭا ءتارتىپ باق-تا جانە اكىمدىك پەن اشم-نىڭ رەسمي ينتەرنەت-رەسۋرستارىندا كونكۋرس وتكىزۋ تۋرالى كەڭىنەن حابارلاۋدى قاراستىرادى. كونكۋرسقا قاتىسۋ ءۇشىن وعان تىلەك ءبىلدىرۋشىنىڭ كونكۋرسقا قاتىسۋ ۇسىنىسىن بەرۋى ءمىندەتتى شارت بولىپ تابىلاتىنىن ايتا كەتكەن ءجون. وندا اۋىل شارۋاشىلىعى ءوندىرىسىن جۇرگىزۋدىڭ بيزنەس جوسپارى, شارۋاشىلىق ىشىندەگى جەر قۇرىلىمى جوباسىن قۇرۋ جانە يگەرۋ بويىنشا, جەرگىلىكتى تۇرعىندار ءۇشىن جۇمىس ورىندارىن قۇرۋ بويىنشا, ينديكاتيۆتى كورسەتكىشتەردى ورىنداۋ بويىنشا ءمىندەتتەمەلەر قامتىلۋى ءتيىس. اتالعان تالاپتار بەرىلەتىن جەرلەردىڭ ءتيىمدى ءارى ۇتىمدى پايدالانىلۋى ماقساتىندا قويىلادى. بەرىلەتىن اۋىل شارۋاشىلىعى جەرلەرىنىڭ ۇتىمدى پايدالانىلۋىنا باقىلاۋدى كۇشەيتۋ ماقساتىندا زاڭ جوباسىندا تۇراقتى مونيتورينگ جۇرگىزۋ قاراستىرىلعان, ول جالعا العان العاشقى 5 جىلدا جىل سايىن, ودان كەيىنگى جىلدارى سۋارىلاتىن شابىندىقتاردا ءار 3 جىل سايىن, قولدان سۋارىلماعان جەرلەردە – ءار 5 جىل سايىن. اۋىلشارۋاشىلىق جەرلەرىنىڭ ۇلكەن اۋقىمىنىڭ «ءبىر قولعا» بەرىلۋىنە جول بەرمەۋ ماقساتىندا اۋىل شارۋاشىلىعى ماقساتىنداعى جەر تەلىمدەرىنىڭ ەڭ ۇلكەن كولەمىن بەلگىلەۋ قاراستىرىلعان. ولاردى قازاقستاندىقتار ءار وبلىستىڭ اكىمشىلىك اۋداندارى اۋماعىندا جالعا العان بولۋى مۇمكىن. سونىمەن قاتار, شەكارا سىزىعى مەن شەكارا ماڭى ايماعىندا ورنالاسقان جەر تەلىمدەرىن شەتەلدىكتەرگە, ازاماتتىعى جوق تۇلعالارعا ت.ب. بەرۋگە تىيىم سالۋ قاراستىرىلعان. جەكە قولدارداعى مالدى باعۋ ءۇشىن جايىلىمدىق جەرلەردىڭ جەتىسپەۋشىلىگىنە قاتىستى ماسەلەنى شەشۋ ءۇشىن ەلدى مەكەندەردىڭ ماڭىندا تۇرعىنداردىڭ ولاردىڭ جەكە قولىنداعى مالدى ۇستاۋ بويىنشا قاجەتتىلىكتەرىن قاناعاتتاندىرۋ ءۇشىن جايىلىمدار اۋماعى ايقىندالاتىن نورمالار قاراستىرىلعان. دينارا بىتىكوۆا, «ەگەمەن قازاقستان»