بۇگىن استانا ۋاقىتىمەن تاڭعى ساعات 09:00-دە برەنت ماركالى مۇناي قۇنى 1,89 پايىز ارزانداپ, 54,56 دوللارعا ءبىر-اق قۇلدىرادى.
قارا التىننىڭ ارزانداۋىنا سەبەپ بولعان اقش ءوندىرىسىنىڭ كۇرت ارتۋى مەن نارىقتا مۇنايعا دەگەن سۇرانىستىڭ ازايۋى, دەپ جازادى investing باسىلىمى.
سوڭعى ەكى اي بويى وپەك+ كەلىسىمىنىڭ ارقاسىندا مۇناي باعاسى باررەلىنە 56-57 دوللار ارالىعىندا ساقتالعان ەدى.
وتكەن جىلدىڭ جەلتوقسانىندا مۇناي ەكسپورتتاۋشى ەلدەر ۇيىمى مەن ۇيىمعا كىرمەيتىن مەملەكەتتەر جىلدىڭ ورتاسىنا دەيىن ءوندىرىستى تاۋلىگىنە 1,8 ملن باررەلگە ازايتامىز دەپ كەلىسكەن. ال قازىرگى تاڭدا وسى جوسپاردىڭ 1,1 ملن باررەلى ورىندالدى. قازاقستان بولسا, وزىنە تيەسىلى 20 مىڭ باررەلدى ارتىعىمەن ورىنداپ, وتكەن جىلعى كورسەتكىشپەن سالىستىرعاندلا قازىرگى تاڭدا ءوندىرىستى تاۋلىگىنە 30 مىڭ باررەلگە ازايتتى.
وسىنىڭ ناتيجەسىندە قىمباتتاي تۇسكەن مۇناي باعاسىنا اقش-تاعى WTI ماركالى مۇناي ءوندىرىسىنىڭ كوبەيتىلۋى كەرى اسەر ەتتى.
وسى اپتادا اقش-تاعى جۇمىس ىستەپ تۇرعان بۇرعىلاۋ قۇرىلعىلارىنىڭ سانى 2015 جىلدىڭ قازانىنان بەرگى رەكوردتىق كورسەتكىشكە جەتىپ, 583-كە جەتتى. ناتيجەسىندە ءوندىرىس كولەمى دە ارتا ءتۇستى.
سونىمەن قاتار الەم بويىنشا جانارماي سۇرانىسىنىڭ تومەندەۋى دە ينۆەستورلاردىڭ الاڭداۋشىلىعىن تۋدىرىپ وتىر.
قىتايدىڭ مۇناي يمپورتى دا ازداپ تومەندەگەنى ايتىلادى جەرگىلىكتى اقپارات قۇرالدارىندا. يمپورتقا سۇرانىستىڭ تومەندىگى قىتاي ەكونوميكاسىنىڭ دامۋ قارقىنىنىڭ باسەڭدەۋىمەن بايلانىستى.