ۋنيۆەرسيادا جارىستارى سپورتتىڭ 12 ءتۇرى بويىنشا وتەدى. ولاردىڭ اراسىندا تاۋ شاڭعىسى, بياتلون, شاڭعى جارىسى, شاڭعى قوسسايىسى, شاڭعىمەن ترامپليننەن سەكىرۋ, سنوۋبورد, فريستايل, مانەرلەپ سىرعاناۋ, شورت-ترەك, كونكيمەن جۇگىرۋ سپورتى, شايبالى حوككەي (ەرلەر جانە ايەلدەر اراسىندا) جانە كيورلينگ ويىندارى بار.
ۋنيۆەرسيادانى وتكىزۋگە 127 حالىقارالىق تورەشى مەن 600-گە جۋىق ۇلتتىق تەحنيكالىق ماماندار قاتىسادى. جارىستاردى وتكىزۋگە قاتىساتىن بارلىق تورەشىلىك القاسىن ءاربىر سپورت ءتۇرى بويىنشا ۇلتتىق جانە حالىقارالىق فەدەراتسيالار بەكىتەدى.
جارىستار «شىمبۇلاق» تاۋ شاڭعىسى كۋرورتى, «مەدەۋ» مۇز ايدىنى, «سۇڭقار» حالىقارالىق شاڭعى ترامپليندەر كەشەنى, بالۋان شولاق اتىنداعى سپورت جانە مادەنيەت سارايى, «الاتاۋ» شاڭعى جانە بياتلون كەشەنى, «تاباعان» سپورتتىق ويىن-ساۋىق كەشەنى, «الماتى ارەنا», «حالىق ارەنا» سپورت كەشەندەرى سەكىلدى 8 نىساندا وتەدى.
ۋنيۆەرسياداعا دەيىن «سۇڭقار» حشتك, «الاتاۋ» شبك, «شىمبۇلاق» تشك گومولوگاتسيانىڭ حالىقارالىق سەرتيفيكاتتارىن الدى. قالعان نىساندار سايكەستىك سەرتيفيكاتىن تراسسالاردى ازىرلەگەننەن كەيىن جانە مۇزدى نىسانداردا مۇز دايىندالعاننان كەيىن الۋعا ءتيىس. دايىندىق ۇدەرىسىن ىسكە اسىرۋ ءۇشىن ۇلگىلىك وپەراتسيالىق جوسپارلار ازىرلەندى, وندا نىساننىڭ بارلىق وپەراتسيالارى, باسقارۋ جۇيەسى مەن بارلىق قىزمەتتەردىڭ جالپىلاما جۇمىس ىستەۋى سيپاتتالعان.
وتكەن جىلدىڭ سوڭىنا دەيىن ۋنيۆەرسيادا نىساندارىندا 5 تەستىلىك ءىس-شارا وتكىزىلدى. ولاردى بالۋان شولاق اتىنداعى سپورت سارايىنداعى قازاقستاننىڭ شورت-ترەك چەمپيوناتىنىڭ II كەزەڭى, «حالىق ارەناداعى» ەل تاۋەلسىزدىگىنىڭ 25 جىلدىعىنا ارنالعان 18 جاسقا دەيىنگى جاسوسپىرىمدەردىڭ شايبالى حوككەيدەن رەسپۋبليكالىق چەمپيوناتى, «الماتى ارەناداعى» قازاقستاننىڭ مانەرلەپ سىرعاناۋدان اشىق چەمپيوناتى, «الاتاۋ» شاڭعى جانە بياتلون ستاديونىندا قازاقستان كۋبوگى اياسىنداعى FIS Race پەن بياتلوننان رەسپۋبليكا چەمپيوناتىن قۇرايدى.
ۇيىمداستىرۋشى كوميتەت حالىقارالىق ستۋدەنتتىك سپورت فەدەراتسياسىنىڭ (FISU) ەرەجەلەرىنە سايكەس, 2016 جىلدىڭ 29 قاڭتارىندا, ۋنيۆەرسيادانىڭ باستالۋىنا ءبىر جىل قالعاندا, ۇلتتىق ستۋدەنتتىك سپورت فەدەراتسيالارىنا جارىستارعا قاتىسۋعا شاقىرۋ قاعازدارىن جولدادى. قازىرگى تاڭدا 56 مەملەكەت اككرەديتاتسيادان ءوتتى. جارىس كۇندەرى «Almaty Towers» بيزنەس كەشەنىندە ويىنداردى باسقارۋ ورتالىعى جۇمىس ىستەيتىن بولادى. وسى جەردە ۋنيۆەرسيادانى وتكىزۋ بارىسىنىڭ تاۋلىكتىك ونلاين-مونيتورينگى جۇزەگە اسىرىلادى.
اتالعان جۇيە حالىقارالىق ستۋدەنتتىك سپورت فەدەراتسياسىنىڭ ۇسىنىستارىنا سايكەس ازىرلەنگەن. ورتالىق «س4 تۇجىرىمداماسى» ء(تورت اعىلشىن ءسوزىنىڭ اببرەۆياتۋراسى: كوماندا, باقىلاۋ, كوممۋنيكاتسيا جانە ۇيلەستىرۋ) دەپ اتالاتىن ۋنيۆەرسيادانىڭ زاماناۋي تۇجىرىمدامالىق يدەياسىن قولدانۋمەن ۇيىمداستىرىلادى.
«ەگەمەن-اقپارات»