ەۋرازيالىق توپ قۇرامىنداعى «قازاقستان ءاليۋمينيى» اق جاڭا جىل مەرەكەسى الدىندا ەرەكشە شىرشا ورناتتى. شىرشا جارقىراعان شامدارمەن ەمەس, كومپانيادا ەڭبەك ەتەتىن كوپ بالالى جانە از قامتىلعان وتباسى بالالارىنىڭ, سونداي-اق, زاۋىت قامقورلىعىنا العان جاڭابەت, ۇشق ۇلىن اۋىلدارى, وبلىس ورتالىعىنداعى №4, №9 مەكتەپتەر وقۋشىلارىنىڭ ارمان-تىلەكتەرى جازىلعان حاتتارمەن بەزەندىرىلدى.
ال, 8 جاسار بەكزات اياز اتادان دتسپ-عا شالدىققان ءىنىسى ميرحات ءۇشىن مەديتسينالىق ارنايى «جۇگىرۋ جولىن» سۇراعان ەكەن. ميرحاتتىڭ ساۋىعىپ كەتۋىنە وسىنداي وڭالتۋ قۇرالى قاجەت.
– مەنىڭ ۇلىم اياز اتاعا سەنەدى. ول جاڭا جىل مەرەكەسىن جاقسى كورەدى. وسى مەرەكەدە قانداي دا بولسىن سىيلىقتى اسىعا كۇتەدى. ءبىزدىڭ قىمبات سىيلىقتار ساتىپ الۋعا جاعدايىمىز كەلمەيدى, – دەيدى بەكزات پەن ميرحاتتىڭ اناسى جانار. – بەكزات تا مۇمكىندىگى شەكتەۋلى بالا, وعان 6 رەت وتا جاسالدى. ءبىزدىڭ بەكزات تۋعان باۋىرىنىڭ ءجۇرىپ كەتۋىن, ونىمەن بىرگە ويناپ, شانا تەۋىپ, جۇگىرۋدى ارماندايدى. ول: «اناشىم, ميرحات ءجۇرۋى ءۇشىن نە قاجەت؟» دەپ سۇراعان ەدى. ءىنىسى ءۇشىن ارنايى مەديتسينالىق جۇگىرۋ قۇرالى قاجەت ەكەنىن بىلگەسىن, وسى قۇرالدى اياز اتادان سۇراۋعا بەل بايلاپتى.
بەكزاتتىڭ ارمانىن «قازاقستان ءاليۋمينيى» اق پرەزيدەنتى ارمان ەسەنجولوۆ ورىندادى. كومپانيا باسشىسى اۋرۋ بالاعا جۇگىرۋ قۇرالىن عانا ەمەس, بەكزات ارمانداعان ۇيالى تەلەفوندى دا تارتۋ ەتتى.
حات جولداعاندار 5 پەن 12 جاس ارالىعىنداعى بالالار بولىپ شىقتى. اياز اتاعا جولداعان حاتتارىندا ولار وقۋداعى تابىسى مەن ۇلگىلى ءتارتىبى, بيىلعى جىلى دا اتا-انالارىن جەتىس- تىكپەن قۋانتا بەرەتىنىن جازىپتى.
جاڭاجىلدىق مۇنداي عاجايىپ ءىس-شارانى جاساۋعا «قازاقستان ءاليۋمينيى» اق پرەزيدەنتى ارمان ەسەنجولوۆ جانە قۇرىلىمدىق ءبولىمشەلەر مەن بولىمدەر باسشىلارى باستاما جاسادى. ءسويتىپ, بالالاردىڭ «ارمان-تىلەكتەرى» جازىلعان حاتتار ءبىر اپتا بويى قابىلداندى. بولىمشەلەر سىيلىقتار ازىرلەدى.
فاريدا بىقاي,
«ەگەمەن قازاقستان»
پاۆلودار