اقش باسىلىمدارى Facebook كومپانياسىنىڭ نەگىزىن قالاۋشى مارك تسۋكەربەرگتىڭ سوڭعى كەزدەرى سيليكون اڭعارىنداعى كومپانيا باسشىسىنان گورى, ۇكىمەتتىك ماسەلەلەرمەن اينالىساتىن ساياساتكەرلىك قىرلارىنىڭ بايقالىپ جۇرگەنىن جازادى.
بىرەر كۇن بۇرىن 2017 جىلعى جوسپارىمەن بولىسكەن كەزدە بيىلدان قالماي اقش-تىڭ بارلىق شتاتىن ارالاپ شىعاتىنىن ايتقان ەدى. جاس ونەرتاپقىشتىڭ بۇل ءسوزىن ساراپشىلار بيزنەسمەننىڭ ەمەس, ساياساتكەردىڭ سوزى ەكەنىن ايتادى.
سونىمەن قاتار سول جولى تسۋكەربەرگ ءوزىنىڭ ءدىندى ءومىردىڭ وتە ماڭىزدى بولشەگى رەتىندە تانيتىنىن مويىندادى. ەرتەرەكتە مارك اتەيستىك كوزقاراستا ەكەنىن مالىمدەگەن بولاتىن.
ال 2016 جىلى تسۋكەربەرگ سيليكون اڭعارىنداعى كومپانيا وكىلدەرىنىڭ بيلىكتە ءوز وكىلدەرىنىڭ بولۋى كەرەكتىگىن ايتقان كەزدەرى دە بولعان.
2015 جىلدىڭ تامىزىندا بولسا, تسۋركەبەرگ وتكەن جىلعى سايلاۋداعى ۇمىتكەر كلينتوننىڭ توبىنداعى ساراپشىلاردىڭ ءبىرى دجون پودەستامەن حات الماسىپ, وندا كوپشىلىك الدىندا ءوزىن ۇستاۋ ادەپتەرى تۋرالى اقىل سۇراعان كەزدەرى بولعان ەكەن. بۇل ءوزارا الماسقان حات ءماتىنى كەيىن Wikileaks سايتىنا دا شىعىپ كەتكەن ەدى.