ەل تاۋەلسىزدىگىنىڭ 25 جىلدىعى قۇرمەتىنە ەلوردادا «استانا ورمانى» جاسىل بەلدەۋىنىڭ «جول-سوقپاق جەلىسى» ۆەلوجولىنىڭ بازاسىندا جاڭاجىلدىق شاڭعى جارىسىنىڭ سالتاناتتى اشىلۋى ءوتتى, دەپ حابارلايدى حابار24.
شارانى ەلوردالىق دەنە شىنىقتىرۋ جانە سپورت باسقارماسى, استانا قالاسى اكىمدىگىنىڭ سپورتتىق-بۇقارالىق شارالاردى وتكىزۋ جونىندەگى ديرەكتسياسى جانە ەلوردا اكىمدىگىنىڭ №2 بالالار مەن جاسوسپىرىمدەردىڭ سپورتتىق مەكتەبى ۇيىمداستىردى.
جارىستا بارلىق جاس ساناتتارى بويىنشا ەرلەر مەن ايەلدەر, قىزدار مەن جىگىتتەر قاتىسادى.
سايىس ەرەجەسىنە سايكەس, ءاربىر جاس كاتەگورياسىنىڭ وكىلدەرىنە بەلگىلى ءبىر قاشىقتىق بەرىلگەن. شاڭعىمەن جۇگىرۋدەن ەرلەر اراسىنداعى ورتاشا قاشىقتىق 2 كم بولسا, ايەلدەر 1 شاقىرىمدى ەڭسەرۋگە ءتيىس. 18 جاستاعى جاسوسپىرىمدەر اراسىندا ورتاشا قاشىقتىق 5 كم, قىزداردا 3 كم, ال 10-12 جاس ارالىعىنداعى كىشكەنتاي سپورتشىلار كيلومەترلىك قاشىقتىقتى ەڭسەرەدى.
«بۇل – ءداستۇرلى تۇردە وتەتىن شارا, بيىل ءبىز ونى العاش رەت «استانا ورمانى» جاسىل بەلدەۋىنىڭ اۋماعىندا وتكىزۋدى شەشتىك. جارىستارعا قاتىسۋ ءۇشىن 90 ادام تىركەلگەن, بۇل 2009 جىلى تۋعان جانە ودان ۇلكەن بالالار, ارداگەرلەر دە كەلىپ جاتىر. جالپى, رەگلامەنت بويىنشا 7 جاس توبى بار. جەڭىمپازدار ءۇشىن ەستەلىك سىيلىقتار مەن جۇلدەلەر قاراستىرىلعان», - دەيدى №2 بالالار مەن جاسوسپىرىمدەردىڭ سپورتتىق مەكتەبى باسشىسىنىڭ ورىنباسارى پەتر بەلىي.
ۇيىمداستىرۋشىلار «استانا ورمانى» جاسىل بەلدەۋىنىڭ اۋماعى بولاشاقتا قالا تۇرعىندارى مەن سپورت سۇيەر قاۋىمنىڭ بەلسەندى دەمالىس وتكىزەتىن سۇيىكتى ورنىنا اينالادى.