استانا قالاسى اكىمىنىڭ ءبىرىنشى ورىنباسارى سەرگەي حوروشۋن ەلوردانىڭ تەمىرجول ۆوكزالى ماڭىنداعى اقىلى تۇراقتىڭ اقىسىنا قاتىستى پىكىر ءبىلدىردى, دەپ حابارلايدى قازاقپارات.
«مەنىڭشە, بۇل پروتسەسكە قاتىسۋشىلاردىڭ بارلىعىنا جايلى جاعداي جاساۋ قاجەت. ويتكەنى, قازىرگى ۋاقىتتا وزدەرىڭىز دە كورىپ وتىرعانداي, بۇل تۇراقتاردا كولىكتەر تاۋلىكتەپ, ايلاپ تۇرادى. ال جولاۋشىلار بولسا ول جەرلەردەن وتە الماي اۋرەگە تۇسەدى. سوندىقتان بۇل ەرەجە بارلىعىنا بىردەي مىندەتتى بولادى», - دەدى حوروشۋن باق وكىلدەرىنىڭ «تۇراققا 200 تەڭگە تولەۋ تىم قىمبات ەمەس پە؟» دەگەن ساۋالىنا وراي.
ەستەرىڭىزگە سالا كەتسەك, تاياۋدا استانا قالاسىنىڭ اكىمى اسەت يسەكەشەۆ ەلوردانىڭ تەمىرجول ۆوكزالىنىڭ ماڭىنداعى جاعدايدى تەكسەردى. سول كەزدە تەمىرجول ۆوكزالى مەن «ساپارجاي» باسشىلارى اكىمگە اقىلى اۆتوتۇراق جۇيەسى اۋەجاي ماڭىنداعى اۆتوتۇراق سياقتى جۇمىس ىستەيتىن بولاتىندىعىن ايتقان ەدى. بۇل جەردە دە باستاپقى 20 مينۋتى تەگىن بولسا, كەيىن ءار ساعاتى ءۇشىن 200 تەڭگە الىنادى. تەگىن ورىندار اككرەديتاتسيادان وتكەن تاكسي جۇرگىزۋشىلەرىنە عانا بەرىلەدى. ال, «ساپارجاي» اۆتوۆوكزالىمەن ىنتىماقتاستىققا كەلمەگەن تاكسي جۇرگىزۋشىلەرىنە تەگىن ورىندار بەرىلمەيدى. بۇل تاكسي جۇرگىزۋشىلەرى كوبىنە استانا-پاۆلودار, استانا -قاراعاندى, استانا-كوكشەتاۋ باعىتتارىندا جولاۋشى تاسىمالداپ كەلەدى. ەگەر ولار اككرەديتاتسيادان وتپەسە, باسقا اۆتوكولىك يەلەرى سياقتى اقشا تولەيتىن بولادى.