استانا قالاسىنىڭ حالىقارالىق اۋەجايىندا ورنالاسقان شەكارا باقىلاۋ-وتكىزۋ بەكەتىنىڭ شەكاراشىلارى 32 سۇڭقاردى زاڭسىز جولمەن اكەتۋگە تىرىسقانداردى ۇستادى.
ناقتىراق ايتقاندا, «استانا – شارجى» باعىتىمەن ۇشقالى تۇرعان G9-252 رەيسىنە جۇك تيەۋ جۇمىستارى جۇرگىزىلىپ جاتقان كەزدە شەكاراشىلاردىڭ نازارىن قوماقتى 4 سومكە ەرىكسىز اۋداردى. ول سومكەلەردىڭ تىركەۋ «جاپسىرمالارىنىڭ» (بيركا) جوق ەكەندىگى بايقالدى. شەكاراشىلار سومكەلەردى اشىپ, تەكسەرۋ كەرەكتىگىن تالاپ ەتتى. ال تەكسەرۋ كەزىندە سومكەلەردەن ءبىر ەمەس باقانداي 32 سۇڭقار شىعا كەلگەندە, تۇرعانداردىڭ تاڭدانىسىندا شەك بولمادى. قازىرگى باعامەن ولاردىڭ ورتاشا قۇنىن ەسەپتەگەندە ارتىق-كەمى جوق 380 000 000 تەڭگەدەن اسىپ جىعىلدى. اتالعان جىرتقىش قۇستار الەمدە سيرەك كەزدەسەدى, دەپ حابارلادى ۇقك شق ءباسپاسوز قىزمەتى.