وتكەن جىلعا وكپە جوق
قازاقستان – قىتاي ماگيسترالدى مۇناي قۇبىرلارى جۇيەسىن دامىتۋ بۇگىنگى كۇنى دە ەكى ەل اراسىنداعى مۇناي-گاز سالاسىنداعى قارىم-قاتىناستىڭ ماڭىزدى فاكتورى بولىپ تابىلادى. بۇل تۇرعىدا ۇزىندىعى 965 شاقىرىمنان استام اتاسۋ – الاشاڭقاي مۇناي قۇبىرى وسى ءىرى ءارى ستراتەگيالىق ماڭىزى زور جوبانى جۇزەگە اسىرۋداعى العاشقى كەزەڭ بولدى. جوبا «قازترانسويل» اق جانە CNODC مۇناي مەن گازدى بارلاۋ جانە وڭدەۋ بويىنشا قىتاي ۇلتتىق كورپوراتسياسى اراسىندا قۇرىلعان «قازاقستان – قىتاي قۇبىرى» جشس بىرگە باقىلاناتىن ۇيىمى تاراپىنان جۇزەگە اسىرىلدى. سونىمەن قاتار, قازاقستان – قىتاي ماگيسترالدى مۇناي قۇبىرلارى جۇيەسىنىڭ قۇرىلىسىن ءارى قاراي جۇزەگە اسىرۋ جوباسىنىڭ ءبىر بولىگى بولىپ تابىلاتىن اتاسۋ – الاشاڭقاي ەلىمىزدەگى ەنەرگەتيكالىق قاۋىپسىزدىك ماسەلەسىن شەشۋگە دە باعىتتالعان. ياعني پاۆلودار مەن شىمكەنتتەگى مۇناي وڭدەۋ زاۋىتتارىن شيكىزاتپەن قامتاماسىز ەتەدى. 2013 جىلعى جەلتوقسان ايىندا اتاسۋ – الاشاڭقاي مۇناي قۇبىرى الەۋەتىن ءارى قاراي دامىتۋ جانە جۇزەگە اسىرۋ ماقساتىندا «قازترانسويل» اق پەن «روسنەفت» ۇك» ااق اراسىندا 2014 جىلدىڭ 1 قاڭتارىنان باستاپ جىلىنا 7 ميلليون توننا مۇناي تاسىمالداۋ تۋرالى كەلىسىمشارتقا قول قويىلدى. كەلىسىمشارت مەرزىمى – 5 جىل, ونى اۆتوماتتى تۇردە قوسىمشا تاعى 5 جىلعا سوزۋ مۇمكىندىگى بار. اتاسۋ – الاشاڭقاي مۇناي قۇبىرىنىڭ قارقىندى دامۋى قازاقستاننىڭ مۇناي تاسىمالداۋ جۇيەسىنىڭ كوپباعىتتى جۇيەسىن ىسكە اسىرۋمەن قاتار, قاتاڭ باسەكەلەستىك جاعدايىندا ستراتەگيالىق شيكىزاتتى وتكىزۋدىڭ سەنىمدى ارناسىن قامتاماسىز ەتۋگە مۇمكىندىك بەردى. 2006 جىلى اتاسۋ – الاشاڭقاي مۇناي قۇبىرى پايدالانۋعا بەرىلگەن ۋاقىتتان باستاپ 2016 جىلدىڭ جەلتوقسانىنا دەيىن مۇناي قۇبىرى ارقىلى قىتايعا 96 ميلليون توننادان استام مۇناي تاسىمالداندى. اتاسۋ – الاشاڭقاي مۇناي قۇبىرىنىڭ قۇرىلىسى مەن قولدانىسقا بەرىلۋى ايماقتاردىڭ الەۋمەتتىك دامۋىنا ايتارلىقتاي اسەر ەتتى. 2006 جىلى اتاسۋ – الاشاڭقاي مۇناي قۇبىرى ءبولىگىن پايدالانۋ, تەحنيكالىق قىزمەت كورسەتۋ جانە جوندەۋ جۇمىستارى بويىنشا وپەراتورلىق قىزمەت كورسەتۋ ماقساتىندا ءۇشارالدا ءۇشارال مۇناي قۇبىرى باسقارماسى قۇرىلدى (قازىرگى اتاۋى – «قازترانسويل» اق شىعىس فيليالى وپەراتورلىق قىزمەتتەر باسقارماسى. اۆت. ەسكەرتۋى). جاڭا جۇمىس ورىندارىنىڭ اشىلۋىمەن قاتار ءۇشارالدا 2010 جىلى ءۇشارال مۇناي قۇبىرى باسقارماسى قىزمەتكەرلەرى ءۇشىن ينفراقۇرىلىم مەن كوممۋنيكاتسيالىق جەلىسى قاراستىرىلعان, اباتتاندىرىلعان تۇرعىن ۇيلەر تۇرعىزىلدى. كەيىن «قازترانسويل» اق دەمەۋشىلىگىمەن وسى قالادا ەكى سپورت الاڭى سالىندى. ستراتەگيالىق جانە كولەمدى حالىقارالىق جوبانى جۇزەگە اسىرۋ اياسىندا قاراعاندى وبلىسى اتاسۋ كەنتى دە جاڭاشا دامۋدى بەتكە الدى. 2012 جىلى كومپانيا قاراعاندى وبلىسى, جاڭاارقا اۋدانى, اتاسۋ اۋىلىندا 170 بالاعا ارنالعان زاماناۋي بالاباقشا قۇرىلىسىن قارجىلاندىرىپ, سىيعا تارتتى. بۇنى كومپانيانىڭ ءوز قىزمەتكەرلەرىنە دەگەن قامقورلىعى دەپ باعالاعان ابزال. ويتكەنى, اۋىلدان جەتى شاقىرىم قاشىقتىقتا ورنالاسقان «اتاسۋ» باس مۇناي ايداۋ ستانساسىندا ەڭبەك ەتەتىن جۇمىسشىلار نەگىزىن جەرگىلىكتى تۇرعىندار قۇرايدى. كومپانيا حالىقارالىق ساپا, ەكولوگيا مەن قاۋىپسىزدىك ستاندارتىن باسىمدىققا الۋمەن قاتار, ايقىن الەۋمەتتىك ساياساتتى دا ۇستانادى. ول ساياسات مىناعان سايادى: ءوزىڭنىڭ وندىرىستىك مۇددەڭدى عانا ەسكەرمەي, تۇرعىندارعا قايىرىمدىلىق جانە دەمەۋشىلىك كومەك كورسەتىپ, ايماقتىڭ قاجەتتىلىگىن دە وتەگەن ءجون. 19 جىل قىزمەت بارىسىندا «قازترانسويل» اق ەلىمىز بويىنشا الەۋمەتتىك ماڭىزى بار كوپتەگەن نىسانداردى سالدى, ولار – بالاباقشالار, مەكتەپتەر, مەديتسينالىق مەكەمەلەر, سپورت كەشەندەرى جانە ت.ب. ءۇستىمىزدەگى جىلدىڭ قىركۇيەك ايىندا وقو, سوزاق اۋدانى, شولاققورعان اۋىلىندا «قازترانسويل» اق-تىڭ دەمەۋشىلىك قارجىسىنا جاڭا بالاباقشا سالىنىپ, سالتاناتتى اشىلۋ ءراسىمى ءوتتى. مەكتەپكە دەيىنگى بۇل مەكەمە وبلىستاعى جەر كولەمى بويىنشا ەڭ ۇلكەن اۋداندا تۇراتىن جاس وتباسىلار ءۇشىن تاپتىرماس كومەك بولدى. قازىرگى ەكونوميكا ءۇشىن قيىن كەزەڭدە دە ەلىمىزدىڭ مۇناي قۇبىرى جۇيەسى تۇراقتى جۇمىس جاساۋدا – بەلگىلەنگەن جوسپارلار ورىندالۋدا, ال جاڭا جوبالار بەلگىلەنگەن ولشەمدەرگە سايكەس جۇزەگە اسىرىلۋدا. «قازترانسويل» اق باس ديرەكتورى (باسقارما توراعاسى) ديماش دوسانوۆتىڭ ايتۋىنشا, كومپانيا ەكونوميكاداعى وزگەرىستەردى مۇقيات قاداعالاۋدا جانە بۇل سالانىڭ تۇراقتى جۇمىس جاساۋىن جايلى جاعدايداعى ۋاقىتتا عانا ەمەس, ۇنەمى وزگەرمەلى جاعدايدا دا قامتاماسىز ەتۋگە ءازىر. «ءبىز بەلگىلەنگەن جوسپاردى ورىنداۋعا ۇمتىلامىز, بىراق سىرتقى تاۋەكەل ۇلعايا باستاعان كەزدە, جاعدايدىڭ الدىن الا وتىرىپ جۇمىس ىستەۋگە دە ءازىرمىز», – دەيدى ديماش دوسانوۆ. وسىلايشا, 2016 جىلدىڭ 9 ايىنىڭ ناتيجەسى بويىنشا, مۇناي تاسىمالىنىڭ شوعىرلاندىرىلعان كولەمى 42,4 ميلليون توننانى قۇرادى. بۇل جوسپارلى كورسەتكىشتەن 1%-عا جوعارى. سول سەكىلدى «قازترانسويل» اق-تىڭ ماگيسترالدى مۇناي قۇبىرلارى بويىنشا شوعىرلاندىرىلعان جۇك اينالىمى 2016 جىلدىڭ 9 ايى ىشىندە شاقىرىمىنا 32,5 ميلليارد توننانى قۇرادى, بۇل – جوسپاردان 2%-عا جوعارى. «قازترانسويل» اق «استراحان – ماڭعىشلاق» سۋ قۇبىرى ارقىلى ۆولگا سۋىن اتىراۋ جانە ماڭعىستاۋ وبلىستارىنىڭ تۇرعىندارىنا جەتكىزەدى. 2016 جىلعى قاڭتار-قىركۇيەك ايىندا سۋ جەتكىزۋ كولەمى 19,2 ميلليون تەكشە مەتردى قۇرادى, بۇل 2015 جىلدىڭ سايكەس كەزەڭىمەن سالىستىرعاندا 1%-عا كوپ جانە جوسپاردان 8%-عا ارتىق. قارجىلىق كورسەتكىشتەرگە دە كوڭىل توق. بيىلعى جىلدىڭ 9 ايى ىشىندە «قازترانسويل» اق-تىڭ شوعىرلاندىرىلعان تازا كىرىسى 43,02 ميلليارد تەڭگەنى قۇرادى, بۇل 2015 جىلعى سايكەس كەزەڭمەن سالىستىرعاندا 11%-عا جوعارى. اتالمىش كەزەڭدەگى كومپانيانىڭ شوعىرلاندىرىلعان ءتۇسىمى 154,4 ميلليارد تەڭگەنى قۇرادى, بۇل 2015 جىلعى 9 اي ۋاقىت ىشىندەگى تۇسىمنەن 2%-عا كەم. مۇناي تاسىمالى كولەمى قىسقارىپ, ءتۇسىمنىڭ ازايۋىنا قاراماستان, كومپانيا وندىرىستەگى جۇمىسشىلارعا جالاقىنى يندەكستەۋ مۇمكىندىكتەرىن ءىزدەستىردى. وسىلايشا, «قازترانسويل» اق ءوز جۇمىسشىلارىنىڭ جانە ولاردىڭ وتباسىلارىنىڭ قوسىمشا الەۋمەتتىك قورعالۋىن قامتاماسىز ەتۋدە, ساتىپ الۋ قابىلەتى مەن تۇتىنۋشىلىق سۇرانىستى قولداۋدا. بۇل – ەلىمىزدەگى ەكونوميكالىق تۇراقتىلىقتىڭ ماڭىزدى كورسەتكىشتەرى. جانە كومپانيا ەلىمىزدىڭ ءىرى سالىق تولەۋشىسى بولىپ وتىر, ول ەلىمىزدىڭ بيۋدجەتىنە تۇراقتى سالىق مولشەرىن جىبەرۋدە, ياعني سالىق تولەۋشى رەتىندەگى ءمىندەتىن ادالدىقپەن اتقارۋدا. مۇنداي جۇمىس ەسكەرۋسىز قالمادى: بيىلعى جىلى قاراشا ايىندا قازاقستان رەسپۋبليكاسى قارجى مينيسترلىگى مەملەكەتتىك كىرىستەر كوميتەتىنىڭ استانا قالاسى مەملەكەتتىك كىرىستەر دەپارتامەنتى 2015 جىل ناتيجەسى بويىنشا «قازترانسويل» اق-تى استانانىڭ ەڭ ۇزدىك سالىق تولەۋشىسى رەتىندە اتاپ ءوتتى. 2015 جىل ناتيجەسى بويىنشا, «قازترانسويل» اق-تىڭ مەملەكەتتىك بيۋدجەتكە تولەگەن سالىق مولشەرى مەن باسقا دا مىندەتتى تولەمدەر كولەمى 29,2 ميلليارد تەڭگەنى قۇرادى.تيىمدىلىكتى ارتتىرۋ
قۇرىلعانىنا 20 جىل تولاتىن مەرەيتوي قارساڭىندا «قازترانسويل» اق قىزمەتىنىڭ جوعارى دەڭگەيىن كورسەتۋدە. ويتكەنى, كومپانيا ءوز قىزمەتىنىڭ ءتيىمدىلىگىن ارتتىرىپ, شىعىنداردى وڭتايلاندىرۋ ماسەلەسىنە كوپ كوڭىل بولەدى. وسى جۇمىس اياسىندا 2015 جىلى كومپانيادا تيىمدىلىكتى ارتتىرۋ بويىنشا 2,3 ميلليارد تەڭگەگە باعالانعان ءىس-شارالار جۇزەگە اسىرىلدى. 2013-2015 جىلدارى بۇل كورسەتكىش 7,7 ميلليارد تەڭگەنى قۇرادى. تيىمدىلىكتى ۇلعايتۋ ءۇشىن رەزەرۆتەر ءار ءتۇرلى سالادان قاراستىرىلادى. ماسەلەن, جەلىلىك مۇناي قۇبىرلارىن شولعىنداۋ ساعاتتارىن ازايتۋ, تەحنيكالىق يننوۆاتسيالاردى ەنگىزۋ, رەزەرۆتى اۆتوماتتى تۇردە قوسىپ, جىلدام اسەر ەتەتىن قۇرىلعى مەن ءجيىلىك-رەتتەلمەلى تارتپا ەنگىزۋ ارقىلى ايتارلىقتاي ۇنەمدەۋ جوسپارلانۋدا. بۇل وزگەرىستەردىڭ «قازترانسويل» اق قىزمەتكەرلەرى «وڭتايلاندىرۋدى قاجەت ەتپەيدى» دەپ اتايتىن بىرقاتار باعىتتارعا اسەرى بولمادى. بۇلار – ەڭبەك قاۋىپسىزدىگى, قورشاعان ورتانى قورعاۋ, ونەركاسىپتىك جانە ءورت قاۋىپسىزدىگى. كومپانيا قىزمەتىنىڭ بۇل باعىتتارى اسا ماڭىزدى سانالادى. ويتكەنى, بۇل ماسەلەلەرگە نەمقۇرايدى قارايتىن كومپانيا جۇمىسىن تابىستى بولادى دەپ ايتۋ قيىن. قورشاعان ورتاعا جۇكتەمەنى ۇنەمى تومەندەتىپ وتىرۋ – «قازترانسويل» اق ءۇشىن نەگىزگى ستراتەگيالىق مىندەت. بۇعان, ەڭ الدىمەن, قۇبىر جەلىسى جۇيەسىنىڭ اپاتسىز جۇمىس ىستەۋى كومەگىمەن قول جەتكىزىلدى, ال تابيعاتتى قورعاۋدىڭ بارلىق قىزمەتى حالىقارالىق ستاندارت تالاپتارىنا ساي جۇرگىزىلەدى. بۇل سالاداعى جۇمىستى جۇيەلەندىرۋ ماقساتىندا كومپانيادا كەشەندى ەكولوگيالىق باعدارلاما دايىندالعان. مۇناي كەن ورىندارىن دايىنداۋدىڭ باستاپقى كەزەڭىندە جانە مۇناي تاسىمالى جۇيەسىن جولعا قويعان كەزدە پايدا بولاتىن «تاريحي» لاستانۋدىڭ كوزىن جويۋعا ايتارلىقتاي كوڭىل بولىنەدى. وندىرىستىك قىزمەتتىڭ قورشاعان ورتاعا اسەر ەتۋ دەڭگەيىن انىقتاۋ ءۇشىن مامانداندىرىلعان ۇيىمدار «قازترانسويل» اق نىساندارى ماڭايىنداعى اۋانىڭ, توپىراقتىڭ, جەر استى سۋلارىنىڭ مونيتورينگىن وتكىزەدى. زەرتتەۋ ناتيجەلەرى كومپانيانىڭ وندىرىستىك نىساندارىنان قورشاعان ورتاعا ەشقانداي جاعىمسىز اسەر بولمايتىنىن راستايدى. قازىر كومپانيادا ەڭبەك قاۋىپسىزدىگى مەن ەڭبەكتى قورعاۋ سالاسىندا «التىن ەرەجەلەر» دەپ اتالاتىن «قازترانسويل» اق كودەكسى دايىندالىپ جاتىر. بۇل – جۇمىستى ورىنداۋ بارىسىنداعى قاۋىپسىزدىكتى ساقتاۋ تالاپتارى. ولار كومپانيانىڭ ەڭبەك قاۋىپسىزدىگى مەن ەڭبەكتى قورعاۋ سالاسىنداعى, ونەركاسىپتىك جانە ءورت قاۋىپسىزدىگى, قورشاعان ورتانى قورعاۋ ساياساتىن جۇزەگە اسىرۋعا, قازاقستان رەسپۋبليكاسى زاڭناماسى مەن حالىقارالىق ستاندارتتار تالاپتارىن ورىنداۋعا جاعداي جاسايدى. بۇل كودەكس «قازمۇنايگاز» ۇك» اق-تىڭ التىن ەرەجەلەرى», قازاقستان رەسپۋبليكاسى زاڭناماسى, كومپانيانىڭ نورماتيۆتىك اكتىلەرى, الدىڭعى قاتارلى مۇناي-گاز كومپانيالارىنىڭ ەڭبەك قاۋىپسىزدىگى مەن ەڭبەكتى قورعاۋ سالاسىنداعى حالىقارالىق وزىق تاجىريبەلەرى, سونداي-اق بۇرىن بولعان جازاتايىم جاعدايلار, كەلەڭسىز وقيعالار جانە اپاتتار جونىندەگى رەسمي اقپاراتتاردى ساراپتاۋ نەگىزىندە دايىندالدى. – قىزمەتكەرلەرىمىزدىڭ قاۋىپسىزدىگى ءاردايىم جۇمىسىمىزدىڭ باستى ارتىقشىلىعى بولىپ كەلدى جانە بولا بەرمەك. ءبىز ءوز قىزمەتكەرلەرىمىزگە ەڭبەك ەتۋدە جايلى جاعداي جاساپ بەردىك, قاۋىپتى وندىرىستىك جانە تابيعي فاكتورلاردىڭ جاعىمسىز اسەرىن تومەندەتۋگە باعىتتالعان جان-جاقتى جۇمىس جۇرگىزۋدەمىز, – دەپ اتاپ ءوتتى ديماش دوسانوۆ. جانە بۇل قىزمەت ناتيجەلەرى كوزگە كورىنىپ تۇر. بيىل قازان ايىندا وتكەن «قازترانسويل» اق مەنەدجمەنتىنىڭ بىرىكتىرىلگەن جۇيەسىنىڭ ينسپەكتسيالىق ءاۋديتى ناتيجەسى بويىنشا, SGS كومپانياسى ورگانى وسى كومپانيا قىزمەتىنىڭ تومەندەگى حالىقارالىق ستاندارت تالاپتارىنا ساي كەلەتىنىن راستادى: ISO 9001:2015 ساپا مەنەدجمەنتى جۇيەسى, ISO 14001:2015 ەكولوگيالىق مەنەدجمەنت جۇيەسى, OHSAS 18001:2015 دەنساۋلىقتى قورعاۋ جانە ەڭبەك قاۋىپسىزدىگىن قامتاماسىز ەتۋ مەنەدجمەنتى جۇيەسى جانە ISO 50001:2011 ەنەرگەتيكالىق مەنەدجمەنت جۇيەسى.جاڭا جوبالار يگىلىككە باستايدى
ەكسپورتتىق مۇمكىندىكتى دامىتۋمەن قاتار, «قازترانسويل» اق-تا ىشكى مۇناي قۇبىرى جەلىلەرىن دامىتۋ دا ماڭىزدى مىندەت بولىپ سانالادى. بۇل ءۇشىن كومپانيا ءوزىنىڭ وندىرىستىك نىساندارىنىڭ سەنىمدىلىگىن جوعارىلاتۋ ماقساتىندا وعان قارجى قۇيادى. قۇبىر جەلىسى ينفراقۇرىلىمىن جاڭعىرتۋ بويىنشا ءىرى جوبالاردىڭ ءىشىندە قالامقاس – قاراجانباس – اقتاۋ جانە وزەن – جەتىباي – اقتاۋ ماگيسترالدى مۇناي قۇبىرلارىن قالپىنا كەلتىرۋ جۇمىستارى بار. سوڭعىسىن قايتا جوندەۋ اياقتالدى, ول قولدانىسقا ەنگىزىلدى. كەلەسى جوبا 2019 جىلى باستاۋ الادى. ورىندالعان جۇمىستاردىڭ ناتيجەسىندە بوزاششى مۇنايىن اقتاۋدان اتىراۋ باعىتىنا ۇزدىكسىز تاسىمالداۋ ءۇشىن قازاقستان مۇناي قۇبىرى جۇيەسىنىڭ سەنىمدىلىگى مەن قاۋىپسىزدىك دەڭگەيى ارتتىرىلادى. «قازترانسويل» اق مەملەكەتتىك جانە نەسيەلىك قارجىلاردى پايدالانباي, بارلىق جوبالاردى ءوز قاراجاتىمەن قارجىلاندىرىپ وتىر. جاقىندا كومپانيا تۋيمازى – ومبى – ءنوۆوسىبىر-2 (تون-2) ماگيسترالدى قۇبىر جەلىسىنىڭ قازاقستانعا تيەسىلى تەلىمىنىڭ جەلىلىك بولىگىن اۋىستىرۋ بويىنشا كولەمدى جوبانى اياقتادى. تون-2 قۇبىر جەلىسىنىڭ كۇردەلى جوندەۋ جۇمىستارى سوڭعى ءۇش جىل بويى جۇرگىزىلدى. بۇل قازاقستاندىق قۇبىر جەلىسىنىڭ تەلىمى بويىنشا مۇناي تاسىمالى سەنىمدىلىگىن قامتاماسىز ەتۋ ءۇشىن, سونىڭ ىشىندە, وتاندىق مۇنايدى پاۆلودار مۇناي-حيميا زاۋىتىنا جەتكىزۋ ءۇشىن جانە قازاقستان اۋماعى ارقىلى رەسەي مۇنايىن قحر باعىتىنا تاسىمالداۋ ءۇشىن جاسالىندى. ورىندالعان جۇمىستار ناتيجەسىندە بۇگىندە تون-2-ءنىڭ وتكىزۋ قابىلەتى جىلىنا 10 ميلليون تونناعا دەيىن جەتكىزىلدى. جالپى, تون-2 مۇناي قۇبىرىن كۇردەلى جوندەۋ جوباسى اياسىندا 185,6 شاقىرىم قۇبىر جەلىسى اۋىستىرىلدى. بۇل وسى حالىقارالىق كولىك تارماعىنىڭ تاسىمالداۋ مۇمكىندىكتەرىن ايتارلىقتاي ۇلعايتاتىن بولادى.ادام رەسۋرستارىن دامىتۋ
بيىلعى جىلى مۇناي قۇبىرى جۇمىسشىلارى كاسىبي تۇرعىدان جانە سپورتتىق جارىستاردا دا جەتىستىكتەرگە جەتتى. «قازترانسويل» اق-تىڭ بەس جۇمىسشىسى «قازمۇنايگاز» كومپانياسىنىڭ اقتاۋ قالاسىندا العاش وتكىزگەن «ۇزدىك مامان-2016» كاسىبي شەبەرلىك سايىسىندا ءوز ماماندىقتارى بويىنشا جەڭىمپاز اتاندى. كومپانيانىڭ مىڭداعان ادامنان تۇراتىن ۇجىمى وزدەرىنىڭ ارىپتەستەرى داۋلەن جاپارحانوۆ, زينايدا داۋلەتوۆا, داستان قانىباەۆ, جانات ەرتاسوۆ جانە ارتۋر سلادكوۆتىڭ مۇناي-گاز سالاسىنداعى ۇزدىك كاسىبي شەبەرلەر كونكۋرسىندا جەڭىسكە جەتكەنىنە شىن جۇرەكتەن قۋاندى. 2016 جىلى قىركۇيەكتە استانادا «قازمۇنايگاز» ۇك» اق سپارتاكياداسىندا سپورت الاڭىندا مۇناي قۇبىرى قىزمەتكەرلەرى كەرەمەت ناتيجە كورسەتتى. سپارتاكيادا 9 سپورت ءتۇرى بويىنشا ءوتتى. وعان «قازمۇنايگاز» كومپانياسىنىڭ 30 ۇيىمىنان 500 قىزمەتكەر قاتىستى. «قازترانسويل» اق قىزمەتكەرلەرى جەكە سايىستاردا دا جانە كوماندالىق جارىس تۇرلەرىندە دە سانى جاعىنان ءجۇلدەلى ورىندارعا يە بولدى. ءسويتىپ, جالپىكوماندالىق ەسەپتە ءبىرىنشى ورىندى جەڭىپ الدى. سپورتشىلاردىڭ جەتىستىكتەرى مۇنىمەن شەكتەلىپ قالمادى – «قازترانسويل» اق-تىڭ قۇراما كومانداسى ماسكەۋدە وتكەن رەسەي فەدەراتسياسى جانە تمد ەلدەرىنىڭ مۇناي-گاز سالاسىنداعى كاسىپورىندارى اراسىنداعى تابيعي قورلار كۋبوگىندا ميني-فۋتبول بويىنشا ەكىنشى ورىندى يەلەندى. 2016 جىلى كومپانيادا كاسىپوداق قوزعالىسىنىڭ بەلسەندى دامۋىنا جول اشىلدى. ونىڭ قىزمەتى كومپانيا قىزمەتكەرلەرى مۇددەسىن قورعاۋعا جانە ۇسىنۋعا باعىتتالعان. بۇگىندە ورتالىق اپپاراتتا جانە «قازترانسويلدىڭ» بارلىق 4 فيليالىندا, قازاقستاننىڭ بۇكىل وبلىستارىندا ورنالاسقان قۇرىلىمدىق بولىمشەلەرىندە قىزمەتكەرلەردىڭ كاسىپوداق ۇيىمدارى قۇرىلعان, كاسىپوداق كوميتەتتەرىنىڭ توراعالارى سايلانعان. 27 جەلتوقساندا ورتالىق اپپاراتپەن وعان قاراستى فيليالداردىڭ قىزمەتكەرلەردىڭ وكىلدەرى اراسىندا كەلىسىمشارتقا قول قويىلدى. مۇنداعى ماقسات – «قازترانسويل» اق قىزمەتكەرلەرىنە الەۋمەتتىك قولداۋ كورسەتۋ. باسقاشا ايتساق, «قازترانسويل» اق 2017 جاڭا جىلعا ۇلكەن جەتىستىكتەرىمەن جانە جوسپارلارىمەن كىرەدى. كومپانيانىڭ ماگيسترالدى مۇناي قۇبىرى جۇيەلەرى ارقىلى ۇزدىكسىز مۇناي تاسىمالىن قامتاماسىز ەتە وتىرىپ, جاڭا باعىتتار اشىپ, نىساندار سالىپ, ءوز ۇجىمى جانە ەلىمىزدىڭ ايماقتاعى تۇرعىندارىنىڭ الەۋمەتتىك قاناعاتتانۋىنا قامقورلىق جاساي وتىرىپ, «قازترانسويل» اق مۇناي ءوندىرۋشى جانە مۇناي وڭدەۋشى ونەركاسىپ اراسىنداعى, شيكىزات جانە يندۋستريالدىق ايماقتار اراسىنداعى بايلانىستىرۋشى بۋىن بولا وتىرىپ, ەلىمىزدىڭ بىرەگەي ترانزيتتىك ءمۇمكىندىكتەرىن جۇزەگە اسىرىپ وتىرعان تاۋەلسىزدىكتىڭ مىقتى تاسىمال تامىرىنا اينالدى. مارات اققۇل, «ەگەمەن قازاقستان»