تسەلينوگراد اۋدانىنداعى «رودينا» اۋىلىنىڭ مەكتەپ وقۋشىلارى قۋانىش قۇشاعىندا. مۇندا جۇمىس تەحنيكاسى كابينەتىنىڭ تانىستىرىلىمى وتكىزىلدى. بۇل تاماشا دا اسا پايدالى ءتالىم ورداسىن بارلىق قاجەتتى جابدىعىمەن «رودينا» اگروفيرماسىنىڭ» ديرەكتورى, قازاقستاننىڭ ەڭبەك ەرى يۆان ساۋەر تارتۋ ەتتى.
جاڭا جۇمىس تەحنيكاسى كابينەتىندە وقۋشىلار فيزيكا, ينفورماتيكا, ماتەماتيكا, تاعى باسقا پاندەر بويىنشا وزدەرىنىڭ ءبىلىمدەرىن زامانالىق تالاپتار دەڭگەيىندە جەتىلدىرۋگە مۇمكىندىك الادى. ماسەلەن, ماتەماتيكا بويىنشا باعدارلامالار ءتۇزۋ ارقىلى الگوريتمدەر سىرىنا قانىعۋعا, ينفورماتيكا سالاسىندا كۇردەلى باعدارلامالارعا بويلاۋعا بولادى. سونداي-اق, اۋىل بالالارى جوعارى تەحنولوگيالىق جۇيەلەر سىرىن ۇعىنىپ, يگى ارماندارىنا جول سالاتىنى دا انىق.
اۋىل بالالارىنىڭ قۋانىشىنا جەرگىلىكتى تۇرعىندارمەن ءبىرگە پارلامەنت ءماجىلىسىنىڭ دەپۋتاتى يۋري تيموشەنكو, قازاقستان حالقى اسسامبلەياسى ءتوراعاسىنىڭ ورىنباسارى ەرالى توعجانوۆ, تسەلينوگراد اۋدانىنىڭ اكىمى مالعاجدار ءتاتكەەۆ تە ورتاقتاسىپ, زامانالىق ءبىلىم جولىندا تابىستار تىلەدى.
باقبەرگەن امالبەك,
«ەگەمەن قازاقستان».
اقمولا وبلىسى