شىعىس وڭىرىندە تاۋەلسىزدىكتىڭ شيرەك عاسىرلىق مەرەكەسى كەڭ كولەمدە اتالىپ ءوتتى. ەل تاۋەلسىزدىگىنىڭ 25 جىلدىعى اياسىندا وبلىستىڭ اۋداندارى مەن قالالارىندا بىرقاتار الەۋمەتتىك نىساندار پايدالانۋعا بەرىلدى. ماسەلەن, زىريان اۋدانىندا اشىلعان 80 ورىندىق وڭالتۋ ورتالىعى مۇمكىندىگى شەكتەۋلى ازاماتتارعا مەديتسينالىق قىزمەت كورسەتەدى. بۇعان دەيىن زىريان اۋدانىنىڭ تۇرعىندارى ەم-دوم الۋ ءۇشىن وبلىس ورتالىعىنداعى وڭالتۋ ورتالىعىنا ارنايى كەلەتىن. ەندى زىرياندىقتار پسيحولوگيالىق قولداۋ كورسەتۋ, فيزيوەمدەۋ جانە ەمدىك دەنە شىنىقتىرۋ بولمەلەرىمەن, سونداي-اق ۆاكۋمدىق, اسپالى ەمدەۋ جۇيەسى اپپاراتتارىمەن جانە جاتتىعۋ قۇرالدارىمەن جابدىقتالعان وڭالتۋ نىسانىنىڭ قىزمەتىن پايدالانا الادى.
جاڭا نىساننىڭ اشىلۋ سالتاناتىنا وبلىس اكىمىنىڭ ورىنباسارى اسەم ءنۇسىپوۆا قاتىسىپ, الەۋمەتتىك الەۋەتتى ارتتىرۋ جولىندا مەملەكەتتىك قولداۋ جىلدان جىلعا ارتىپ كەلە جاتقانىن جەتكىزدى.
ايتا كەتكەن ءلازىم, بۇل نىساننىڭ قۇرىلىسى ۇزاق ۋاقىتقا سوزىلعان ەدى. وبلىس اكىمى د.احمەتوۆ نازارعا العانان كەيىن جاندانىپ سالا بەرگەن قۇرىلىسقا رەسپۋبليكالىق بيۋدجەتتەن 409,9 ميلليون, وبلىستىق بيۋدجەتتەن 22,8 ميلليون تەڭگە جۇمسالدى.
سونىمەن بىرگە ريددەر قالاسىندا 200 ورىندىق كوپسالالى سپورت كەشەنى اشىلدى. كەشەننىڭ اشىلۋ سالتاناتىنا وبلىس اكىمىنىڭ ورىنباسارى قۋات تۇماباەۆ قاتىستى. قۇنى 180 ميلليون تەڭگەنى قۇراعان كەشەندە باسكەتبول, فۋتبول, ۆولەيبول سىندى سپورت تۇرلەرىنەن بولەك, جەڭىل اتلەتيكا, كۇرەس, دزيۋدودان جاتتىعۋ جۇمىستارى جۇرگىزىلەدى. سونداي-اق, جۋىقتا كەشەنگە قاراستى كوركەم گيمناستيكا مەكتەبى اشىلادى دەپ جوسپارلانۋدا.
– وليمپيادالىق سپورت تۇرىنە جاتاتىن كوركەم گيمناستيكاعا جاستار اراسىندا قىزىعۋشىلاردىڭ قاتارى ارتىپ كەلەدى. سوندىقتان الداعى ۋاقىتتا كوركەم گيمناستيكا مەكتەبىن اشۋدى جوسپارلاۋدامىز, – دەدى ريددەر قالالىق مادەنيەت, تىلدەردى دامىتۋ, دەنە شىنىقتىرۋ جانە سپورت ءبولىمىنىڭ باسشىسى الماس نۇرعاليەۆ.
كەشەننىڭ اشىلۋ سالتاناتىنا وراي, 2003-2004 جىلى تۋعان جاسوسىپىرىمدەر اراسىندا شاعىن فۋتبولدان وبلىس بىرىنشىلىگى ءوتتى.
دۋمان اناش, «ەگەمەن قازاقستان».
شىعىس قازاقستان وبلىسى