2016 جىلى اوك ەلىمىزدىڭ ەكونوميكالىق ءوسىمىنىڭ قوزعاۋشى كۇشىنە اينالدى بۇعان ەلىمىزدىڭ اۋىل شارۋاشىلىعىنداعى وڭ كورسەتكىشتەر دالەل بولا الادى. بۇل تۋرالى كەزەكتى ۇكىمەت وتىرىسىندا اۋىل شارۋاشىلىعى ءمينيسترىنىڭ ءبىرىنشى ورىنباسارى قايرات ايتۋعانوۆ باياندادى.
"مال شارۋاشىلىعى سالاسىندا مال باسىنىڭ ورتا ەسەپپەن 1,3% ارتۋى بايقالدى. ەت ءوندىرىسى 3,5%, ءسۇت - 3,1%, جۇمىرتقا - 0,1% ءوستى. جالپى استىق جيناۋ بۋنكەرلىك سالماعىندا 23,7 ملن توننانى قۇرادى, بۇل وتكەن جىلعىدان 3 ملن 900 مىڭ تونناعا ارتىق. ورتاشا استىق ءتۇسىمى 15,4 تس/گا قۇرادى. جينالعان كولەم ەلدىڭ ىشكى قاجەتتىلىگىن جانە ەكسپورتتىق الەۋەتتى 8,5–9 ملن توننا دەڭگەيىندە تولىقتاي قامتاماسىز ەتەدى", - دەدى اگرارلىق ۆەدومستۆو باسشىسىنىڭ ءبىرىنشى ورىنباسارى.
سپيكەردىڭ ايتۋىنشا, الماتى, جامبىل, وڭتۇستىك قازاقستان وبلىستارىندا 2,5 ملن توننا كوكونىس, 1,7 ملن توننا باقشا ءونىمى جينالعان بۇل وتكەن جىلعى دەڭگەيمەن سالىستىرعاندا 439 مىڭ تونناعا ارتىق. وڭتۇستىك قازاقستان جانە الماتى وبلىستارىندا الما جيناۋ جوعارى دەڭگەيدە – سايكەسىنشە 114 جانە 70 مىڭ توننا بولدى. 270 مىڭ توننا ماقتا الىندى, بۇل وتكەن جىلعىمەن سالىستىرعاندا 3 ەسەگە ارتىق, ءتۇسىم 24,6 تس/گا. جالپى 503 مىڭ توننا كۇرىش جينالدى, ءتۇسىمى 53,6 تس/گا. كۇرىشتىڭ رەكوردتى ءتۇسىمى - 55 تس/گا جۋىعى قىزىلوردا وبلىسىندا جينالدى. سونىمەن قاتار سوڭعى 20 جىلدا العاش رەت سقو-دا قانت قىزىلشاسى ەگىلگەنىن ايتا كەتكەن ءجون. 14 مىڭ توننا قىزىلشا جينالدى, ءتۇسىمى 350 تس/گا. بۇل ورتاشا رەسپۋبليكالىق كورسەتكىشتەن 15% ارتىق. ءزايتۇن داقىلدارى بويىنشا جالپى ءتۇسىم 2 ملن توننانى قۇرادى, بۇل وتكەن جىلمەن سالىستىرعاندا ءبىر جارىم ەسەگە كوپ.
«ەسەپتى كەزەڭدە ازىق-ت ۇلىك ونىمدەرىن ءوندىرۋ 3,8% ارتىپ, 1,2 ترلن تەڭگەدەن استى. جارما ءوندىرۋ - 36%, قانت - 49%, ۇن - 13%, وسىمدىك مايىن ءوندىرۋ - 14%, شۇجىق جانە سول سياقتى ەت ونىمدەرىن ءوندىرۋ - 10% ارتتى», – دەپ ءسوزىن قورىتىندىلادى ق.ايتۋگانوۆ.
ارنۇر اسقاروۆ, "ەگەمەن قازاقستان".