قازاقستان حالقى اسسامبلەياسى وبلىستىق فيليالى جانىنداعى انالار كەڭەسى ورتتەن زارداپ شەككەن جاس بازاروۆتار وتباسىنا جاڭادان ءۇي ساتىپ الىپ بەردى.
بيىل قازان ايىنىڭ اياعىندا قوستاناي اۋدانىنىڭ پولوۆنيكوۆ سەلوسىندا تۇراتىن بازاروۆ ەربولدىڭ ءۇيى ەلەكتر جەلىسىنىڭ تۇيىقتالۋىنان ورتەنىپ كەتكەن بولاتىن. بۇگىنگە دەيىن جاس وتباسى ءتورت بالاسىمەن كورشىسىنىڭ ءۇيىن پانالاپ كەلدى.
وسى حاباردى مۇعالىمدەر قاۋىمىنان ەستىگەن سوڭ قازاقستان حالقى اسسامبلەياسى وبلىستىق فيليالىنىڭ جانىنداعى انالار كەڭەسى قاراپ وتىرۋدى ءجون كورمەپتى. سەبەبى, وزبەكستاننان قونىس اۋدارعان ورالمان وتباسىنىڭ وبلىستا جاقىن تۋىستارى جوق. ەربول مەكتەپتە ماتەماتيكادان ساباق بەرەدى, ءۇش بالاسى جانە بالالار ۇيىنەن اسىراپ العان تاعى ءبىر قىزى بار. «ەڭ ءبىرىنشى بىزگە ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ رەكتورى حۇسەيىن ۆالەەۆ جانە وسى ءبىلىم ورداسىنداعى ۇستازدار قاۋىمى كومەك قولىن سوزدى. ولار ارنايى شوتقا ءبىر اۋىز سوزگە كەلمەستەن ءبىر كۇندىك جالاقىلارىن اۋداردى. بۇل قايىرىمدىلىق ىستەن ستۋدەنتتەر كەڭەسى دە سىرت قالمادى, بارلىعى 1,5 ميلليون تەڭگە جينالدى. بۇل قارجى ءۇيى ورتەنىپ دالادا قالعان وتباسىعا جاڭا ءۇي عانا ەمەس جانە جيھاز ساتىپ الۋعا دا جەتتى», – دەدى انالار كەڭەسىنىڭ ءتورايىمى شۋشانيك ساركيسيان.
«ادامداردىڭ قايىرىمدىلىعىنان اسقان قاسيەتتى دۇنيە جوقتىعىنا كوزىم جەتىپ تۇر. ءوزىمنىڭ ايلىق جالاقىما مۇنداي ءۇي ساتىپ الا الماس ەدىك. قىستىڭ كوزى قىراۋدا نە ىستەرىمىزدى بىلمەي, اڭتارىلعان جايىمىز بار ەدى. بىزگە كومەك قولىن سوزعان قايىرىمدى جانداردىڭ بارلىعىنا العىسىم شەكسىز», – دەدى ەربول بازاروۆ.
سونىمەن قاتار, وبلىستىق دوستىق ءۇيىنىڭ وكىلدەرى جاس, كوپ بالالى وتباسىنا سىيلىقتار جانە قوستاناي قالاسىنداعى №24 «ا» باستاۋىش مەكتەبىنىڭ وقۋشىلارى سالىپ بەرىپ جىبەرگەن سۋرەتتەردى تاپسىردى.
ءنازيرا جارىمبەتوۆا,
«ەگەمەن قازاقستان»