امەريكالىق دەنيەل دجەيكوبس جەڭىلىپ كورمەگەن قازاقستاندىق گەننادي گولوۆكينمەن الداعى جەكپە-جەگىنە قاتىستى پىكىر ءبىلدىردى, - دەپ حابارلايدى Vesti.kz. دجەيكوبس Instagram جەلىسىندەگى پاراقشاسىندا جەكپە-جەك جايلى ۆيدەوۇندەۋ جاريالادى.
"جاڭالىعىم بار. مەن 18 ناۋرىزدا Madison Square Garden ارەناسىندا GGG-مەن جۇدىرىقتاسامىن. كۇتتىرىپ قويعانىم ءۇشىن كەشىرىم سۇرايمىن. ءبىر جاعدايلاردى رەتتەۋ كەرەك بولدى, ەندى بارلىعى ءوز ورنىنا كەلدى, ءۇمىتىم زور. مەن الەمدى تاڭعالدىرۋعا دايىنمىن. برۋكلين, بۇل قولىمنان كەلەدى", - دەيدى دجەيكوبس.
ايتا كەتەيىك, وسىعان دەيىن قازاقستاندىق بوكسشى گەننادي گولوۆكين امەريكالىق دەنيەل دجەيكوبسپەن جەكپە-جەككە قاشان شىعاتىنىن جاريالاعان ەدى. GGG دەنني دجەيكوبسپەن 18 ناۋرىزدا نيۋ-يوركتەگى Madison Square Garden ارەناسىندا جۇدىرىقتاسادى. جەكپە-جەكتى HBO (PPV) ارناسى تىكەلەي ەفيردە كورسەتەدى.