قىرعىزستاندا قازاقستاننىڭ تاۋەلسىزدىك كۇنىنە ارنالعان قابىلداۋ ءوتتى

ەلىمىزدىڭ تاۋەلسىزدىك كۇنىنە وراي قىرعىزستانداعى قازاقستاننىڭ ەلشىلىگىندە رەسمي قابىلداۋ ۇيىمداستىرىلدى, دەپ حابارلايدى قازاقپارات.

بىشكەك قالاسىنداعى «الا-توو» مەيرامحاناسىندا وتكەن اتالعان ءىس-شاراعا قىرعىزستانداعى ديپلوماتيالىق كورپۋس, اككرەديتتەلگەن حالىقارالىق ۇيىمدار, زاڭ شىعارۋشى جانە اتقارۋشى بيلىك, عىلىمي جانە شىعارماشىلىق زيالىلارى قاتىستى. شارا قازاقستان مەن قىرعىزستاننىڭ مەملەكەتتىك ءانۇرانىن ورىنداۋمەن باستالدى. قازاقستان رەسپۋبليكاسىنىڭ قىرعىزستانداعى توتەنشە جانە وكىلەتتى ەلشىسى ايىمدوس بوزجىگىتوۆ كەلگەن قوناقتاردى جىلى قارسى الدى. «قازاقستان وتكىزىپ جاتقان الەۋمەتتىك جانە ەكونوميكالىق رەفورمالاردىڭ ارقاسىندا بۇگىندە الەمنىڭ دامىعان 50 ەلىنىڭ قۇرامىنا كىرىپ, باسەكەگە قابىلەتتى جانە تولىققاندى مەملەكەت رەتىندە مويىنداتىپ كەلەدى. قر پرەزيدەنتى ن.نازارباەۆتىڭ سارابدال ساياساتىنىڭ كومەگىمەن ءوزىنىڭ دارا جولىن تاڭداپ, ۇلكەن جەتىستىكتەرگە جەتۋدە. تۇراقتى دامۋ, ەتنيكاارالىق جانە كونفەسسياارالىق تۇسىنىستىك پەن تولەرانتتىلىقتىڭ بىرەگەي مودەلى قازاقستاننىڭ حالىقارالىق برەندى بولىپ تابىلادى», – دەدى ا. بوزجىگىتوۆ. ءسوز بارىسىندا مەملەكەت باسشىسى ن.نازارباەۆتىڭ ورتالىق ازيا ەلدەرىن يادرولىق قارۋدان ازات ەتۋ تۋرالى بەيبىت جانە ينتەگراتسيالىق باستامالارى ايتىلدى. قازاقستاندىق ديپلومات قارعىزستانمەن جوعارى دەڭگەيدەگى مەملەكەتارالىق ەكىجاقتى قارىم-قاتىناس پەن بولاشاقتا ونى ارى قاراي دامىتۋ ءارى نىعايتۋ كەرەكتىگىن اتاپ ءوتتى.