بۇكىلالەمدىك بوكس كەڭەسىنىڭ (WBC) كەلەسى جىلعى كونۆەنتسياسى استانا قالاسىندا وتەدى, دەپ xابارلايدى قازاقپارات.
«قازاقستان, 2017 جىلدا كورىسكەنشە. WBC جىل سايىنعى 55-ءشى كونۆەنتسياسى», - دەلىنگەن ۇيىمنىڭ تۆيتتەردەگى رەسمي پاراقشاسىندا. اقش-تىڭ فلوريدا شتاتىندا وتكەن بۇكىلالەمدىك بوكس كەڭەسىنىڭ 54-ءشى كونۆەنتسياسىندا استانا قالاسى كەزەكتى وتىرىستىڭ قالاسى رەتىندە تانىستىرىلعان بولاتىن. كونۆەنتسيانى ەكسپو-2017 كورمەسى اياسىندا وتكىزۋ جوسپارلانعان.
ايتا كەتەيىك, بۇكىلالەمدىك بوكس كەڭەسىنىڭ (WBC) كونۆەنتسياسى جىل سايىن ءوتىپ تۇرادى. وعان اتالعان كەڭەستىڭ چەمپيوندارى مەن الەمدىك بوكس جۇلدىزدارى قاتىسادى. سول جەردە جىلدىڭ ۇزدىك بوكسشىلارى ماراپاتتالادى. ماسەلەن, بيىلعى كونۆەنتسيادا WBA (Super), IBO, WBC جانە IBF بويىنشا ورتا سالماقتاعى الەم چەمپيونى گەننادي گولوۆكين كەلل برۋكپەن وتكىزگەن جەكپە-جەگى ءۇشىن ارنايى سىيلىققا يە بولىپ, ەڭ دومينانتتى بوكسشى رەتىندە تانىلدى. بۇدان بولەك, ونىڭ ەسىمى گيننەستىڭ رەكوردتار كىتابىنا جازىلدى. گولوۆكين وسى ماراپاتقا ەڭ ۇزدىك نوكاۋتەر رەتىندە يە بولىپ وتىر. GGG-مەن بىرگە ۇيىمنىڭ سالتاناتتى جيىنىنا ميگەل كوتتو, رومان گونسالەس, ۆيتالي كليچكو, كىشى روي دجونس, ەۆاندەر حوليفيلد سياقتى ۇيىمنىڭ چەمپيوندارى مەن بوكس جۇلدىزدارى قاتىستى.