بۇگىن سالتانات سارايىندا ەلباسى جارلىعىمەن ماراپاتتالعان ازاماتتارعا مەملەكەتتىك ناگرادالار تابىس ەتىلدى, دەپ حابارلايدى قازاقپارات. سالتاناتتى شارادا وبلىس اكىمى التاي كولگىنوۆ تاۋەلسىزدىكتىڭ 25 جىلدىعىنا وراي ەلباسى جارلىعىمەن ماراپاتتالىپ وتىرعانداردىڭ قاي-قايسىسى دا قۇرمەتكە لايىق ەكەنىن اتاپ ءوتتى.
«ەلباسىمىزدىڭ تاپسىرماسىنا سايكەس مەملەكەتتىك ناگرادالاردى تابىس ەتىپ وتىرمىز. ماراپاتتالعاندار اراسىندا الەۋمەتتىك سالا قىزمەتكەرلەرى, كاسىپكەرلەر, شارۋا ادامدارى بار. تاۋەلسىز ەلىمىزدىڭ قارىشتاپ دامۋى ءۇشىن ولاردىڭ الداعى ۋاقىتتا قاجىرلى ەڭبەك ەتەرى انىق. ەڭ باستىسى, ەلباسىمىز ۇنەمى ايتاتىنىنداي, ورتاق ماقسات جولىندا بىرىگە بىلەيىك. ەلدىگىمىز بەن بىرلىگىمىز مىقتى بولسىن», - دەدى اكىم.
جيىنعا قاتىسقان قر اقپارات جانە كوممۋنيكاتسيالار ءمينيسترى داۋرەن اباەۆ باتىسقازاقستاندىقتاردى تاۋەلسىزدىكتىڭ تورقالى تويىمەن قۇتتىقتاپ, ەلىمىز وسى جىلدار ىشىندە تولاعاي تابىستارعا قول جەتكىزگەنىن اتاپ ءوتتى.
«اق جايىق وڭىرىندە ازاتتىق ءۇشىن جانىن قيعان يساتاي مەن ماحامبەتتەي باتىرلار بارشىلىق. قازاقتىڭ اقيىق اقىنى جۇبان مولداعاليەۆتىڭ ايتقانىنداي, «مىڭ ءولىپ, مىڭ تىرىلگەن» حالقىمىزدىڭ تاۋەلسىزدىككە قولى جەتتى. بابالارىمىزدىڭ اڭساعان ارمانى ورىندالدى. ءوز الدىنا بولەك ەل بولعان قازاقستان ەلباسىمىزدىڭ باستاۋىمەن قارىشتاپ دامىپ, بۇكىل الەم تانىعان مەملەكەتكە اينالدى. وسىنىڭ ءبارى - ەلباسى ساياساتىنىڭ ناقتى ناتيجەسى, ەل بىرلىگىنىڭ جەمىسى», - دەدى مينيستر.
بۇدان كەيىن ءوڭىر باسشىسى مەن اقپارات جانە كوممۋنيكاتسيالار ءمينيسترى مەملەكەتتىك ناگرادالاردى تاپسىردى.
«پاراسات» وردەنىمەن تەرەكتى اۋدانىنداعى «اقاس» شارۋا قوجالىعىنىڭ جەتەكشىسى, وبلىستىق ءماسليحات دەپۋتاتى قاتاۋوللا اشىعاليەۆ, زەلەنوۆ اۋدانىنان «ماتەۆوسيان» شق باسشىسى الەكساندر ماتەۆوسيان, ەڭبەك ارداگەرى تولەگەن مەرعاليەۆ ماراپاتتالدى. «قۇرمەت» وردەنىن بەلگىلى ايتىسكەر اقىن شولپان قىدىرنيازوۆا, ع.قۇرمانعاليەۆ اتىنداعى وبلىستىق فيلارمونيانىڭ داۋلەتكەرەي اتىنداعى قازاق حالىق اسپاپتار وركەسترىنىڭ باس ديريجەرى ءارى كوركەمدىك جەتەكشىسى ەركىن نۇرىمبەتوۆ, «قپو ب.ۆ.» كومپانياسى باس ديرەكتورىنىڭ ورىنباسارى مارات كارىموۆ, زەلەنوۆ اۋدانىنان «كيرگەنەۆ» شق باسشىسى قايىرجان كيرگەنوۆ جانە باسقالار يەلەندى. تاعى ءبىر توپقا ءۇشىنشى دارەجەلى ەڭبەك داڭقى وردەنى, «ەرەن ەڭبەگى ءۇشىن» مەدالى جانە قازاقستان رەسپۋبليكاسىنىڭ قۇرمەت گراموتاسى تابىس ەتىلدى.