قازاقستان پرەزيدەنتى نۇرسۇلتان نازارباەۆ 2016 جىلعى ادەبيەت پەن ونەر سالاسىنداعى مەملەكەتتىك سىيلىقتاردى تابىس ەتتى.
سالتاناتتى شارادا پرەزيدەنت وسى جىلى مەملەكەتتىك سىيلىق جونىندەگى كوميسسيا 4 تۋىندىنى ىرىكتەپ العانىن ايتتى.
«جوعارى ماراپاتقا ەلوردامىزداعى «ماڭگىلىك ەل» مونۋمەنتىنىڭ اۆتورلارى لايىق بولىپ تانىلدى. استانادا مۇنداي عيماراتتار از ەمەس. دەگەنمەن «ماڭگىلىك ەل» ماعىناسى جاعىنان دا, كوركەمدىك جاعىنان دا وزىمىزگە دە, باسقالارعا دا بەلگىلى بولىپ كەلە جاتقان عيمارات. بۇل تاۋەلسىز ەلىمىزدىڭ مارتەبەسىن ساۋلەت ونەرى ارقىلى ءساتتى ايشىقتايتىن تۋىندى دەپ سانايمىز», – دەدى نۇرسۇلتان نازارباەۆ.
كەلەسى سىيلىق «قۇنانباي» ءفيلمىن تۇسىرگەن شىعارماشىلىق توپقا بەرىلدى.
«كينودا ۇلى ابايدىڭ اكەسى قۇنانباي تاعدىرى ارقىلى حالىق ءومىرىنىڭ كۇردەلى كەزەڭى بەينەلەندى», – دەپ اتاپ ءوتتى ەلباسى. سونداي-اق, مەملەكەت باسشىسى كەزەكتى سىيلىقتى بەلگىلى جازۋشى بەكسۇلتان نۇرجەكەەۆكە «ءاي, دۇنيە-اي» رومانى ءۇشىن تابىستادى.
«بۇل شىعارما ەلىمىزدىڭ تاۋەلسىزدىككە دەيىنگى 75 جىل تاريحىن قامتيدى. 1916 جىلعى ۇلت-ازاتتىق كوتەرىلىس كەزىندە جەتىسۋ حالقى باسىنان وتكىزگەن قيلى كەزەڭ روماننىڭ وزەگىنە اينالعان. بۇكىل قازاق حالقىنىڭ باسىنان وتكەن زۇلماتتىڭ كورىنىسى بولىپ سانالادى», – دەدى پرەزيدەنت. مۇنان سوڭ ەلباسى 4-ءشى مەملەكەتتىك سىيلىقتى قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان «تاۋەلسىزدىككە تارتۋ» جۇمىستار تسيكلى ءۇشىن سۋرەتشى كاميل مۋللاشەۆقا بەردى.