«حالىق بانك» اق-نىڭ باسقارما توراعاسى ءۇمىت شاياحمەتوۆا International Banker حالىقارالىق باسىلىمىنىڭ «شىعىس ەۋروپاداعى جىل بانكيرى» نوميناتسياسى بويىنشا جەڭىمپاز اتاندى. سونداي-اق, حالىق بانك قازاقستانداعى ۇزدىك بانكتىك توپ رەتىندە ماراپاتقا يە بولدى. بۇل تۋرالى بانكتىڭ ءباسپاسوز قىزمەتىنە سىلتەمە جاساپ 7kun.kz حابارلادى.
باسىلىم شاياحمەتوۆانىڭ باسقارۋ ءستيلى ۇتىمدى, كورەگەندى جانە ستراتەگيالىق تەكسەرىسكە نەگىزدەلگەنىن, ونى Halyk Group-تىڭ قارجىلىق ناتيجەلەرىنەن بايقاۋعا بولاتىنىن اتاپ ءوتتى.
سونداي-اق, ساراپشىلار ءۇمىت شاياحمەتوۆا بانك بيزنەسى مەن كليەنتتەردىڭ قاجەتتىلىكتەرىن تەرەڭ تۇسىنە الادى جانە قارجى سەكتورىندا قالىپتاسقان تاجىريبەسى بار دەپ ەسەپتەيدى.
International Banker ساراپشىلارىنىڭ سوزىنشە, قازىرگى كەزە قازاقستاننىڭ بانك سەكتورىنداعى جاعداي وڭاي ەمەس, ال بانكتەر قيىن كەزەڭدە جۇمىس ىستەۋدە. سوندىقتان حالىق بانكتى قازاقستانداعى بانك ىسىندە ۇلگى ەتۋگە بولادى.
بانك بيزنەستىڭ بارلىق سالالارىندا بالانستىڭ ءوسۋىن باقىلاپ جانە نەسيە پورتفەلىنىڭ ساپاسىن ساقتاپ قالۋ ءۇشىن جۇمىس ىستەپ وتىر. ايتا كەتەيىك, ءۇمىت شاياحمەتوۆا حالىق بانكتى 2009 جىلدان بەرى باسقارىپ كەلەدى.