اقتوبە وبلىسىنىڭ ايتەكە بي ەسكەرتكىشى اشىلدى. بيىكتىگى 7 مەتر بولاتىن ايتەكە ءبيدىڭ ەسكەرتكىشى قارابۇتاق اۋىلىنا كىرەبەرىستەگى ءۇش جولدىڭ, «باتىس ەۋروپا –باتىس قىتاي» حالىقارالىق كولىك ءدالىزىنىڭ قىزىلوردا باعىتىنا جانە قوستاناي باعىتىنا بۇرىلاتىن ايرىعىنا ورناتىلعان.
بۇل ەسكەرتكىشتى ورناتۋعا «قازاۆتوجول» ۇك» اق اقتوبە وبلىستىق فيليالىنىڭ ديرەكتورى باعلان بايماعامبەتوۆ پەن باس مەردىگەر, «قازاۆتوجول» رەسپۋبليكالىق مەملەكەتتىك كاسىپورىنى اقتوبە وبلىستىق فيليالىنىڭ ديرەكتورى اكىمجان وتەمۇراتوۆ باستاماشى بولدى.
- ايتەكە بي بابامىزعا 1993 جىلى 350 جىلدىعى مەرەكەلەنگەندە وسىندا ءبيۋستى ورناتىلعان. كوكەيىمىزدە ءبىر ادەمى ەسكەرتكىش ورناتۋ كوپتەن بەرى ءجۇر ەدى. سونى اقىلداسا كەلە, وسى ءۇش جولدىڭ ايرىعىنا قويۋدى شەشتىك. جەر جۇمىستارىن اقتوبەلىك جولشىلار ءوز كۇشتەرىمەن اتقاردى, ال, ەسكەرتكىشى دەمەۋشىلەردىڭ قارجىسىنا جاسالدى. ءمۇسىنشى اياپبەرگەن قارپىقوۆتىڭ قولىنان شىققان ەسكەرتكىش ەڭسەلى دە كورنەكى. بۇل اقتوبەلىك جولشىلاردىڭ تاۋەلسىزدىكتىڭ 25 جىلدىعىنا جاساعان تارتۋى دەسە دە بولادى. باتىرلارىمىزدى, حاندارىمىزدى جانە بيلەرىمىزدى, الاشتىڭ ايتۋلى تۇلعالارىن ەستە قالدىرۋ ارقىلى تاۋەلسىزدىكتىڭ قادىر – قاسيەتىن جاستارعا ونەگە –ۇلگى ەتۋدىڭ تاربيەلىك ءمانى زور, - دەيدى «قازاۆتوجول» ۇك» اق اقتوبە وبلىستىق فيليالىنىڭ ديرەكتورى باعلان بايماعامبەتوۆ.
ونىڭ ايتۋىنشا, ەسكەرتكىش ماڭايىن كورىكتەندىرۋ جانە كوگالداندىرۋ جۇمىستارى كوكتەمدە باستالادى. ەسكەرتكىش تۇعىرىنا كەلەر ۇرپاققا جولداۋ جازىلعان كاپسۋلا سالىندى. وسى جەرگە «قازاقستان رەسپۋبليكاسىنىڭ تاۋەلسىزدىگىنە 25 جىل» دەپ جازىلعان ستەللا ورناتىلعان. ەسكەرتكىشتى ايتەكە بي اۋدانىنىڭ اكىمى مالىمبەت ىبراشەۆ پەن ەڭبەك ارداگەرى, ايتەكە ءبيدىڭ تىكەلەي ۇرپاعى سارسەنالى قالتاەۆ اشتى. ايتەكە بي بابامىزعا اس بەرىلىپ, قۇران باعىشتالدى.
ساتىبالدى ءساۋىرباي, «ەگەمەن قازاقستان».
اقتوبە وبلىسى, ايتەكە بي اۋدانى.