بۇل – اقتوبە وڭىرىندە شىعاتىن بىردەن-ءبىر رەسپۋبليكالىق ادەبي –كوركەم, كوپشىلىك جۋرنال. وبلىستىق اكىمدىكتە وسى «ادىرنا» رەسپۋبليكالىق ادەبي-كوركەم, كوپشىلىك جۋرنالىنىڭ تۇساۋكەسەرى ءوتتى.
وعان جۋرناليستەر, ادەبيەتسۇيەر قاۋىم قاتىستى. باسىلىمنىڭ باس رەداكتورى اقىن, كوسەمسوزشى مەيىرحان اقداۋلەت ۇلى جۋرنالدىڭ ۇستانعان باعىت-باعدارى, الداعى شىعارماشىلىق جۇمىستارى تۋرالى اڭگىمەلەدى. ول جاڭا جۋرنالدىڭ تۇساۋكەسەرى الماتىدا قازاقستان جازۋشىلار وداعىندا دا وتكەنىن, وداق باسشىلارى مەن شىعارماشىلىق قاۋىمنىڭ جىلى قارسى العانىن تىلگە تيەك ەتە كەلىپ, جۋرنالدى قازاق ادەبيەتىنىڭ دامۋىنا سەرپىن بەرەتىن باسىلىم جاساۋعا تالاپتانىپ جاتقانىن اتاپ ءوتتى. – وسىنداي ءبىر ادەمى جۋرنال شىعارۋدى 2012 جىلدان ويلاپ ءجۇر ەدىم. سونىڭ ءساتى بيىل ءتۇستى.
بۇل باستامامىز وبلىس اكىمى بەردىبەك ساپارباەۆ تاراپىنان قولداۋ تاپتى. ءوڭىر باسشىسىنىڭ قولداۋىمەن وسىنداي جۋرنال دۇنيەگە كەلدى. العاشقى سانى ۇستىمىزدەگى جىلعى قاراشا ايىندا جارىق كوردى. قازىر ەكىنشى سانى دا دايىندالدى, باسپاحانادان كەلەسى اپتادا شىعادى. «قازپوشتا»اق ارقىلى جازىلدىرۋدى ويلاستىرىپ جاتىرمىز. جۋرنالدى ەلىمىزدىڭ بارلىق وڭىرلەرىنە تاراتۋ كوزدەلۋدە. مۇندا ەڭ ۇزدىك تۋىندىلاردى جاريالايمىز دەگەن ءۇمىتىمىز بار, – دەيدى مەيىرحان اقداۋلەت ۇلى. جۋرنال اقتوبەدەگى «ا-پوليگرافيا» جشس باسپاحاناسىندا باسىلىپ, شىعارىلادى.
ازىرگە 2 مىڭ دانامەن شىعۋدا. قۇرىلتايشىسى «IDEA ltd» جشس بولىپ تابىلادى. جۋرنالدىڭ تۇساۋكەسەرىندە ءسوز العان «قازاقستان رترك» اقتوبە وبلىستىق تەلەكومپانياسىنىڭ ديرەكتورى راۋكەن وتىنشين اقىن مەيىرحان اقداۋلەت ۇلىنىڭ كەزىندە «التىن وردا» گازەتىن اقتوبەدە جانە اتىراۋدا شىعارىپ, رەسپۋبليكالىق دەڭگەيدەگى باسىلىمعا اينالدىرعانىن, بۇل جۋرنالدى دا وقىرمانداردىڭ كوڭىلىنەن شىعاتىنداي دەڭگەيگە كوتەرۋگە شىعارماشىلىق ىزدەنىسى جەتەتىنىن اتاپ ءوتتى. سونىمەن اقتوبەدە «ادىرنا» رەسپۋبليكالىق ادەبي-كوركەم, كوپشىلىك جۋرنالى الاشىنا جول تارتتى. جاڭا باسىلىمنىڭ قازاق ادەبيەتىنە قوسار ۇلەسى, وقىرماندارىن ويلى شىعارمالارمەن سۋسىنداتۋداعى قادامى قۇتتى بولسىن دەيمىز ءبىز دە.
ساتىبالدى ءساۋىرباي,
«ەگەمەن قازاقستان»
اقتوبە