«استانا» پرەزيدەنتتىك كاسىپتىك سپورت كلۋبىنىڭ «فيزكۋلت-ۋرا» الەۋمەتتىك جوباسى اياسىندا وليمپيالىق ويىندار چەمپيوندارى مەن بەلگىلى سپورتشىلار وبلىس قالالارى مەن اۋداندارىنداعى مەكتەپتەردە بولىپ, وقۋشىلارمەن كەزدەسىپ, دەنەشىنىقتىرۋ ساباعىن وتكىزگەن بولاتىن.
ريو-دە-جانەيرو وليمپياداسىنىڭ كۇمىس جۇلدەگەرى ۆاسيلي لەۆيت تۋعان جەرىندەگى ءوزى وقىعان №1 دميتروۆ مەكتەبىنە كەلدى. مەكتەپ وقۋشىلارى مەن ۇستازدارى ونى زور قۋانىشپەن كۇتىپ الدى. تۋعان جەردىڭ اۋەنى – دومبىرادان كۇي توگىلىپ تۇردى. ۆاسيليمەن بىرگە ونىڭ وسكەن اۋىلىنا گرەك-ريم كۇرەسىنەن 1996 جىلعى اتلانتا وليمپياداسىنىڭ چەمپيونى يۋري مەلنيچەنكو دە كەلدى. ايتا كەتەتىنى, ءۆاسيليدىڭ اناسى تاتيانا بوريسوۆنا لەۆيت ۇلى وقىعان مەكتەپتى كوپ جىلدان بەرى باسقارىپ كەلەدى.
مەكتەپتەگى سالتاناتتى كەزدەسۋدە اۋدان اكىمىنىڭ ورىنباسارى مۇرات ساندىباەۆ چەمپيوندار ۆاسيلي لەۆيت پەن يۋري مەلنيچەنكونى سپورتتاعى جەتىستىكتەرىمەن قۇتتىقتادى. چەمپيوندار وقۋشىلاردى دەنەشىنىقتىرۋمەن اينالىسۋعا, سپورتتى جانىنا سەرىك ەتۋگە شاقىردى.
– سپورت ادامدى شىنىقتىرىپ, دەنساۋلىعىنىڭ مىقتى بولۋىنا اسەر ەتىپ قانا قويمايدى, ول جاستاردى ەڭبەكقورلىققا, ادالدىققا تاربيەلەيدى. سپورتتى جاقسى كورگەن بالا شىمىر, كۇشتى بولادى. ال كۇشتى ادامدار وتىرىك ايتپايدى, اينالاسىنا قۇرمەتپەن قارايدى جانە وتانىنىڭ پاتريوتى بولادى, – دەدى ۆاسيلي لەۆيت وقۋشىلارمەن كەزدەسۋىندە. بالالار سپورتشىعا: «وليمپيادا چەمپيونى بولۋ وڭاي ما؟» دەگەن سۇراق قويدى.
– ىلعي ەڭبەكتەنىپ, جىگەرمەن, تاباندىلىقپەن جۇمىس ىستەسەڭ, تەك سپورتتا عانا ەمەس, ومىردە كوپتەگەن جەڭىستەرگە جەتۋگە بولادى, – دەدى ۆاسيلي.
– سەنى اينالاڭداعى جاقىن ادامدارىڭ, وتباسىڭ, جانكۇيەرلەرىڭ قولداعاندا, ۇلكەن سپورتتاعى قيىندىقتاردى جەڭىپ, بيىك بەلەستەردى باعىندىرۋعا بولادى. بىراق ەڭبەكقورلىق پەن سپورتقا دەگەن ىنتا-ىقىلاس قازىردەن باستالۋى ءتيىس, – دەپ تولىقتىردى ارىپتەسىنىڭ ءسوزىن يۋري مەلنيچەنكو.
اۋىل بالالارى سپورتشىلاردىڭ اڭگىمەسىن زەيىن سالا تىڭدادى. ۆاسيلي مەن يۋري وقۋشىلارعا قولتاڭبا بەرىپ, ولاردىڭ قالاۋىنشا سۋرەتكە تۇسكەننەن كەيىن, سپورت زالعا ءوتىپ, 8-سىنىپقا دەنەشىنىقتىرۋدان اشىق ساباق وتكىزدى. وقۋشىلار سپورتشىلار كورسەتكەن بارلىق جاتتىعۋلاردى ورىندادى. ايتپاقشى, مۇنداي كەزدەسۋلەردى قوستاناي قالاسىنداعى مەكتەپتەردە بوكستان لوندون جانە ريو-دە-جانەيرو وليمپيادالارىنىڭ قولا جۇلدەگەرى يۆان دىچكو دا وتكىزدى.
ءنازيرا جارىمبەتوۆا
«ەگەمەن قازاقستان»
قوستاناي وبلىسى,
فەدوروۆ اۋدانى
سۋرەتتى تۇسىرگەن
ءماريام ورازباەۆا