ماڭعىستاۋ – قالىپتاسقان ءان مەن جىر, كۇي مەكتەبى بار ءوڭىر. اسىرەسە, ماڭعىستاۋ دەسە حالىقتىڭ كوكەيىنە, الدىمەن جەتى قىردان ءان اسىرعان جەتى قايقىنىڭ ەسىمى ورالادى.
ءانشى كۇرىش تاسبولاتوۆ – وزىندىك ورىنداۋ مانەرى بار جەتى قايقىنىڭ مۇراسىن جالعاپ, ۇرپاق جادىنا ءسىڭىرىپ كەلە جاتقان اعا بۋىن وكىلدەرىنىڭ ءبىرى. ءانشى ەلىمىزدىڭ ۇلىق مەرەكەسى – تاۋەلسىزدىكتىڭ 25 جىلدىعى قارساڭىندا اقساقالدىق جاسقا جەتكەن بولاتىن. قوس مەرەكەنى نەگىزگە العان ماڭعىستاۋ وبلىستىق مادەنيەت باسقارماسى مەن وبلىستىق عىلىمي-ادىستەمەلىك جانە مادەني قىزمەت كورسەتۋ ورتالىعى ءىى رەسپۋبليكالىق «قايقىلاردان قالعان ساز» دەگەن اتپەن ماڭعىستاۋدىڭ ءداستۇرلى اندەرىن ورىنداۋشىلاردىڭ بايقاۋىن وتكىزدى.
عاسىرلار بويى سان بۋىن ۇرپاقتىڭ جەتە الماي كەتكەن ارمانىنا اينالعان ەگەمەندىكتىڭ قادىر-قاسيەتىن ۇعىندىرۋ, شيرەك عاسىردا قازاقستاننىڭ جەتكەن جەتىستىكتەرىن دارىپتەۋ جانە ماڭعىستاۋدىڭ ءداستۇرلى ءانشىلىك مەكتەبىنىڭ, اسىرەسە, جەتى قايقىنىڭ قازاقتىڭ مۋزىكالىق مادەنيەتىندەگى تاريحي ءرولىن رەسپۋبليكا كولەمىندە ايقىنداپ, رۋحاني مۇرالارىن جاس ورىنداۋشىلار اراسىندا كەڭىنەن ناسيحاتتاۋ ماقساتىنداعى بايقاۋعا رەسپۋبليكامىزدىڭ تۇكپىر-تۇكپىرىنەن باتىس قازاقستان, شىعىس قازاقستان, اتىراۋ, اقتوبە, ماڭعىستاۋ وبلىستارى مەن الماتى قالاسىنان 22 تالاپكەر قاتىستى.
– ەلىمىزدىڭ بارلىق ءوڭىرى ءان مەن جىرعا وتە باي جانە ءار ءوڭىر وزىنە ءتان ماقاممەن, مانەرمەن قازاق ونەرىن دامىتا وركەندەتىپ كەلەدى. ءار ءوڭىردىڭ ونەردەگى ەرەكشەلىگىن تەك سول ايماقتىڭ وزىندە قالدىرماي, بۇكىل رەسپۋبليكا بويىنشا ناسيحاتتاۋعا, ۇلتتىق ونەرىمىزدى ورتاق مادەني قۇندىلىق رەتىندە جاستارعا ۇيرەتۋگە ءتاۋەلسىزدىك العان سوڭ قول جەتتى. بايقاۋدا ءبىز ماڭعىستاۋدىڭ, جەتى قايقىنىڭ اندەرىن جاتسىنباي, ناقىشىنا كەلتىرە ورىنداعان ەلىمىزدىڭ تۇكپىر-تۇكپىرىنەن كەلگەن جاستاردىڭ تالانتىنا ءتانتى بولدىق, – دەيدى ماڭعىستاۋ وبلىستىق عىلىمي-ءادىستەمەلىك جانە مادەني قىزمەت كورسەتۋ ورتالىعىنىڭ ديرەكتورى ا.زەيىلوۆا.
قازاق ءداستۇرلى ءان ونەرىنىڭ وكىلدەرى – جەلكىلدەگەن جاستاردىڭ دومبىرانى شەبەر مەڭگەرىپ, اۋەلەتە ءان سالىپ, تاۋەلسىزدىككە تارتۋ جاساۋى كوڭىل كوتەردى. جاستار جالىندى, ۇلتتىق مۇراعا مۇقيات بولسا, مادەني مۇرالاردىڭ مۇقالماسى بەلگىلى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى